ថៃព្រមានពីគ្រោះថ្នាក់របស់កញ្ឆា ក្រោយដកដំណាំនេះចេញពីបញ្ជីគ្រឿងញៀ.ន
ថៃ ៖ ក្រសួងសុខាភិបាលថៃបានព្រមានថា ការជក់កញ្ឆាអាចបណ្តាលឱ្យអ្នកប្រើប្រាស់កើតជំងឺហឺត
ថៃ ៖ ក្រសួងសុខាភិបាលថៃបានព្រមានថា ការជក់កញ្ឆាអាចបណ្តាលឱ្យអ្នកប្រើប្រាស់កើតជំងឺហឺត រលាកទងសួត និងជំងឺស្ទះសួតដ៏រ៉ាំរ៉ៃ។ ខណៈដែលការព្រមាននេះ កើតឡើងនៅរយៈពេលជិត១ខែ បន្ទាប់ពីប្រទេសនេះ បានដកដំណាំកញ្ឆាចេញពីបញ្ជីគ្រឿងញៀ.នហាមឃាត់របស់ខ្លួន កាលពីខែមិថុនាកន្លងទៅ។ គួររំលឹកថា ចាប់ពីថ្ងៃទី៩ នេះទៅ! ដំណាំកញ្ឆាលែងជារបស់ហាមឃាត់នៅថៃហើយ
ប្រភពពីបាងកកប៉ុស្តិ៍ ចេញផ្សាយកាលពីថ្ងៃទី៣ ខែកក្កដា បានរាយការណ៍ថា លោកស្រី Napapan Nanthapong ប្រធានការិយាល័យសុខភាពបរិស្ថាន បានលើកឡើងថា អ្នកជក់កញ្ឆាប្រឈមនឹងការវិវត្តន៍នៃជម្ងឺធ្ងន់ធ្ងរ។ ខណៈកុមារ និងទារកដែលស្រូបផ្សែងវា ប្រឈមនឹងបញ្ហាសុខភាព និងបញ្ហាផ្លូវចិត្តធ្ងន់ធ្ងរ ហើយការសិក្សា ក៏បានបង្ហាញថា ផ្សែងកញ្ឆាអាចបញ្ចេញភាគល្អិត PM2.5 ក្នុងបរិមាណខ្ពស់ជាងបារីធម្មតារហូតដល់៣,៥ដង។
លោកស្រីបន្តថា ប្រជាជនគួរតែយល់ថា ការជក់កញ្ឆាអាចធ្វើឱ្យសុខភាពពួកគេកាន់តែអាក្រក់ ជាពិសេសអ្នកដែលទទួលរងផលប៉ះពាល់ដោយផ្សែងរបស់វា។ ប្រតិបត្តិករអាជីវកម្ម ដែលរៀបចំឱ្យមានការជក់កញ្ឆា ត្រូវបានស្នើឱ្យមានការគ្រប់គ្រងផ្សែងឱ្យបានត្រឹមត្រូវបំផុត។ ដូច្នេះវានឹងមិនប៉ះពាល់ដល់មនុស្សរស់នៅក្បែរតំបន់នោះ។ ស្របពេលមន្ត្រីមូលដ្ឋាន ដែលរកឃើញថា មានការជក់នៅកន្លែងណាមួយ ពួកគេអាចចាត់វិធានការតាមផ្លូវច្បាប់ចំពោះអ្នកពាក់ព័ន្ធ។ ហើយជាមួយគ្នានោះ មន្ត្រីសុខាភិបាលសាធារណៈទូទាំងប្រទេស មានកាតព្វកិច្ចចុះអប់រំប្រជាជនក្នុងតំបន់អំពីគ្រោះថ្នាក់នៃផ្សែងបារី ឬកញ្ឆា។
ពាក់ព័ន្ធបញ្ហានេះ លោកស្រី Neeranuch Arphajarat ប្រធានផ្នែកកិច្ចការច្បាប់ បានអះអាងថា ការជក់បារីនៅទីសាធារណៈ ត្រូវបានចាត់ទុកជាភាពរំខានមួយក្រោមការប្រកាសផ្នែកសុខភាពសាធារណៈ ដែលបានចូលជាធរមាន កាលពីថ្ងៃទី១៥ ខែមិថុនា កន្លងទៅ។ ហើយអ្នករំលោភនឹងត្រូវទទួលការស៊ើបអង្កេតពីអាជ្ញាធរ។ ខណៈដែលការជក់កញ្ឆា អាចប្រឈមនឹងការជាប់ពន្ធនាគាររយៈពេល៣ខែ ឬត្រូវពិន័យជាប្រាក់រហូតដល់ ២៥,០០០បាត ដែលស្មើនឹងជាង៧០០ដុល្លារ។
សូមជម្រាបថា បើទោះបីជារដ្ឋាភិបាលដកដំណាំកញ្ឆាចេញពីបញ្ជីគ្រឿងញៀ.នហាមឃាត់ក៏ពិតមែន។ ប៉ុន្តែការប្រើប្រាស់ជាការកម្សាន្តដោយខុសច្បាប់ នៅតែត្រូវបានហាមឃាត់ស្ថិតក្រោមច្បាប់កំណត់ដដែល ជាពិសេសក្នុងចំណោមមនុស្សវ័យក្មេង៕
ចែករំលែកព័តមាននេះ