រាជធានីភ្នំពេញ ៖ ស្របពេលវិស័យសំណង់នៅក្នុងប្រទេសកម្ពុជាកំពុងសាងសង់ជាបន្តបន្ទាប់នៅតាមបណ្ដាខេត្ត ជាពិសេស រាជធានីភ្នំពេញ អ្នកវិនិយោគខ្មែរ និងថៃបានចាប់ដៃគ្នាបង្កើតរោងចក្រផលិតបេតុងសម្រាប់
រាជធានីភ្នំពេញ ៖ ស្របពេលវិស័យសំណង់នៅក្នុងប្រទេសកម្ពុជាកំពុងសាងសង់ជាបន្តបន្ទាប់នៅតាមបណ្ដាខេត្ត ជាពិសេស រាជធានីភ្នំពេញ អ្នកវិនិយោគខ្មែរ និងថៃបានចាប់ដៃគ្នាបង្កើតរោងចក្រផលិតបេតុងសម្រាប់ផ្គត់ផ្គង់ដល់ក្រុមហ៊ុនសំណង់ និងជួយជំរុញល្បឿននៃការសាងសង់ឲ្យកាន់តែឆាប់រហ័ស ។
លោក ហែម សុជាតិ អ្នកគ្រប់គ្រងទូទៅ នៃក្រុមហ៊ុនបេតុង Phnom Penh Precast Construction បាននិយាយក្នុងថ្ងៃដាក់ដំណើរការក្រុមហ៊ុនផលិតបេតុងនៅស្រុកឧដុង្គ ខេត្តកំពង់ស្ពឺថា កិច្ចសហការជាមួយក្រុមហ៊ុនថៃ ក្នុងការផលិតបេតុងសម្រាប់ផ្គត់ផ្គង់ដៃគូអ្នកសាងសង់នៅក្នុងប្រទេសកម្ពុជានេះ ជាដំបូងបានដាក់ទុនប្រមាណ២លានដុល្លារអាមេរិក ក្នុងនោះកម្ពុជាមានភាគហ៊ុន៥១% និង៤៩%ទៀតជាភាគហ៊ុនភាគីថៃ ។ លោកនិយាយថា ៖ «ការបើកដំណើរការក្រុមហ៊ុនផលិតបេតុងរបស់យើងនៅពេលនេះ វាមានសារសំខាន់ណាស់ក្នុងការជួយជំរុញវិស័យសំណង់ឲ្យមានការសាងសង់កាន់តែលឿន និងមានគុណភាព ។ ក្រុមហ៊ុនបាននាំយកអ្នកជំនាញខាងបេតុងមកធ្វើការជាក់ស្ដែង ដើម្បីបង្ហាញដល់កម្មកររបស់យើង » ។
លោកបន្តថា ក្រៅពីការផលិតបេតុងជូនដល់ក្រុមហ៊ុនដៃគូហើយ ក្រុមហ៊ុននេះក៏បានផ្ដល់ឱកាសការងារជាច្រើនដល់ប្រជាពលរដ្ឋកម្ពុជាផងដែរ ក្នុងនោះមានកម្មករដែលបំពេញការងារនៅក្នុងក្រុមហ៊ុន និងរោងចក្រផលិតបេតុងជាជនជាតិខ្មែរ៩៩%ទៅហើយ ។ ម្យ៉ាងទៀត ដើម្បីជំរុញការសាងសង់ឲ្យលឿន ក្រុមហ៊ុននឹងប្រើបច្ចេកវិទ្យាទំនើបសម្រាប់ផលិតបេតុង និងចាក់បេតុងជូនក្រុមហ៊ុនដៃគូ ។ ជាក់ស្ដែង បើតាមបច្ចេកទេសបុរាណ ចាក់ប្លង់សេ ឬចាក់បេតុងមួយ គឺត្រូវការមនុស្ស២០ទៅ៣០នាក់ដើម្បីធ្វើការនោះ ប៉ុន្តែក្រុមហ៊ុន Phnom Penh Precast Construction នឹងកាត់បន្ថយការប្រើប្រាស់មនុស្ស ដោយងាកមកប្រើប្រាស់បច្ចេកទេសទំនើប និងមានគុណភាពជាង ។
លោកបន្ថែមថា បច្ចុប្បន្ន ក្រុមហ៊ុនមានដៃគូជាមួយក្រុមហ៊ុនធំៗមួយចំនួនហើយដូចជា ក្រុមហ៊ុនទទួលសាងសង់ព្រលានយន្តហោះអន្តរជាតិភ្នំពេញ និងក្រុមហ៊ុនសាងសង់សណ្ឋាគារ និងខុនដូជាដើម ។ ដូចនេះ នៅថ្ងៃអនាគត ក្រុមហ៊ុន Phnom Penh Precast Construction នឹងពង្រីកវិសាលភាពផលិតរបស់ខ្លួនឲ្យកាន់តែធំឡើងទៀត ។ លោកនិយាយថា ៖ « ពេលនេះ ក្រុមហ៊ុនយើងមានសមត្ថភាពផលិតបេតុងបានប្រមាណ៦០០ទៅ៧០០ម៉ែត្រការ៉េក្នុង១ថ្ងៃ ទាំងប្លង់សេ និងជញ្ជាំង ហើយនៅថ្ងៃក្រោយយើងអាចផលិតបានដល់១.០០០ម៉ែត្រការ៉េក្នុង១ថ្ងៃ។ ប៉ុន្តែបើសិនជាទីផ្សារនៅតែដើរល្អនោះ យើងគ្រោងនឹងបើករោងចក្រផលិតបេតុងផ្គត់ផ្គង់ក្នុងវិស័យសំណង់បន្ថែមទៀត » ។
តាមរបាយការណ៍ពីក្រសួងរៀបចំដែនដីនគរូបនីយកម្ម និងសំណង់ បញ្ជាក់ថា នៅក្នុងឆ្នាំ២០១៦ វិស័យសំណង់បានស្ទុះងើបឡើងខ្លាំង ដែលធ្វើឲ្យទុននៅក្នុងវិស័យនេះកើនរហូតដល់ជាង៧ពាន់លានដុល្លារអាមេរិក គឺកើន២ដងបើធៀបនឹងឆ្នាំ២០១៥ កន្លងទៅ ៕
ចែករំលែកព័តមាននេះ