ក្រោយពេលដែលអតីតតារាសម្តែងនាង គង់ ចាន់ស្រីមុំ បានបង្ហាញរូបភាពក្រុមរបស់នាងបាននាំគ្នាតុបតែងខ្លួនស្លៀកពាក់បែបបុរាណនៅថ្ងៃខួបកំណើតរបស់នាង ដែលបាន
រាជធានីភ្នំពេញ ៖ ក្រោយពេលដែលអតីតតារាសម្តែងនាង គង់ ចាន់ស្រីមុំ បានបង្ហាញរូបភាពក្រុមរបស់នាងបាននាំគ្នាតុបតែងខ្លួនស្លៀកពាក់បែបបុរាណនៅថ្ងៃខួបកំណើតរបស់នាង ដែលបានធ្វើឡើងកាលពីពេលថ្មីៗនេះ ស្រាប់តែមានមហាជនមួយចំនួនបានផ្ទុះការរិះគន់ ដោយលើកឡើងថា ឈុតទាំងអស់នោះ មើលទៅមិនមែនជាបែបផែនរបស់ខ្មែរឡើយ ពោលគឺដូចជារបស់ថៃទៅវិញ។
រឿងខាងលើនេះ បានក្លាយជាប្រធានបទក្តៅមួយ ដែលត្រូវបានមហាជន ជាពិសេសអ្នកនិយមលេងហ្វេសប៊ុក បាននាំគ្នាជជែកវែកញែកគ្នា ក្រោយមានផេកហ្វេសប៊ុកពីរ គឺហ្វេសប៊ុកក្រុមព្រះសុរិយា និងផេក បុរាណាចារ្យ បានធ្វើការបង្ហោះដោយបានចាត់ទុកសម្លៀកបំពាក់ដែលគ្រងដោយក្រុមអ្នកនាង គង់ ចាន់ស្រីមុំ នាពេលនេះ គឺមិនមានលក្ខណៈជាខ្មែរចំឡើយ គឺវាស្រដៀងទៅនឹងឈុតបុរាណរបស់ថៃ។
ជាមួយនឹងរូបភាពមួយសន្លឹក ដែលបង្ហាញពីការស្លៀកពាក់ឈុតបុរាណរបស់ គង់ ចាន់ស្រីមុំ ផេកហ្វេសប៊ុកក្រុមព្រះសុរិយា បានភ្ជាប់ជាមួយនឹងសារបង្ហោះថា «ឃើញថា បច្ចុប្បន្ននេះ ដោយសារតែពាក្យស្រលាញ់ លើកតម្កើង ថែរក្សា មរតកដូនតា គ្រប់គ្នា ឲ្យតែឃើញអ្វីនៅប្រទេសជិតខាងប្រើប្រាស់ចេះតែនាំគ្នាយកមកស្លៀកក្នុងន័យផ្សព្វផ្សាយថា របស់ទាំងអស់នោះ ជារបស់ដូនតាខ្មែរដែលបានបន្សល់ទុកតាំងពីសម័យបុព្វកាលមកម្ល៉េះ» ។
ប្រភពដដែលបន្តថា «តែបើពិនិត្យឲ្យបានត្រឹមត្រូវទៅ ទោះបីជាប្រទេសជិតខាងនោះ បានយករបស់ដូនតាខ្មែរប្រើប្រាស់ច្រើនយ៉ាងក៏ដោយ តែមកពេលនេះ របស់ខ្លះវាបានក្លាយរបៀបជីវភាពរបស់ប្រជាជនគេ ទោះមិនបានច្រើន យ៉ាងហោចណាស់ក៏បន្តិចបន្តួចដែរ វាក៏មិនមែនសុទ្ធតែរបស់ដូនតាខ្មែរទាំងអស់ទេ គេក៏ទទួលយករបស់អ្នកជិតខាងផ្សេងទៀតយកមកកែច្នៃដើម្បីបង្កើតរបស់ថ្មីសម្រាប់គេដែរ ។ ដូច្នោះរបស់ដែលនៅប្រទេសជិតខាង កំពុងមានមិនប្រាកដថាវាសុទ្ធតែជារបស់ដូនតាខ្មែរយើងទេ» ។
ចំណែកផេកហ្វេសប៊ុកឈ្មោះថា បុរាណាចារ្យ ក៏បានបង្ហោះសារខ្លីមួយដោយភ្ជាប់ជាមួយនឹងរូបភាពដូចគ្នានេះថា «ស្អាតណាស់ឈុតថៃ អរគុណខ្មែរយើង ដែលតែងតែគាំទ្រឈុតថៃ ផលិតផលសិល្បៈថៃ។ (លើកលែងម្ចាស់កម្មវិធី និងស្វាមីដែលពាក់ឈុតខ្មែរ ក្រៅពីហ្នឹងភ្ញៀវចូលរួមពាក់ឈុតថៃទាំងអស់ ទាំងដុល ម៉ែចាន់វ៉ាត ម៉ែការៈកេត)» ។
ជាការកត់សម្គាល់ បន្ទាប់ពីផេកហ្វេសប៊ុកទាំងពីរខាងលើនេះ បានបង្ហោះនូវរឿងរ៉ាវខាងលើនេះ គេឃើញមានមហាជនជាច្រើនបានចូលទៅខំមិនពីក្រោម ដោយអ្នកខ្លះបានធ្វើការស្តីបន្ទោសទៅក្រុមរបស់នាង គង់ ចាន់ស្រីមុំ ដោយធ្វើឲ្យខូចតម្លៃសិល្បៈវប្បធម៌ខ្មែរ ខណៈពេលដែលមួយចំនួនទៀត ក៏បានដាក់បន្ទុកទៅលើម្ចាស់សម្អាងការដែលតុបតែងឲ្យក្រុមរបស់នាង ដែលហាក់មិនមានការយល់ដឹងច្បាស់ពីសម្លៀកបំពាក់បុរាណខ្មែរ។
យ៉ាងណា បើយោងតាមការបញ្ជាក់បន្ថែមពីហ្វេសប៊ុកបុរាណាចារ្យ បានលើកឡើងពាក់ព័ន្ធបញ្ហាខាងលើនេះថា «ក្នុងរយៈកាលប៉ុន្មានឆ្នាំចុងក្រោយ ខាងសំអាងការខ្មែរចាប់ផ្តើមបោះបង់ការស្លៀកពាក់ ការចាប់សំពត់បែបខ្មែរជាបណ្តើរៗ ងាកត្រឡប់មកទិញសំពត់ថៃដែលគេដេរស្រាប់ៗ ងាយស្រួលមិនពិបាកស្លៀក។ ការដេរបែបថៃអាចថា ងាយស្រួលម្យ៉ាង តែក៏នឹងធ្វើអោយបាត់បង់លក្ខណៈពិសេសនៃជាតិខ្មែរ។ ចូរយើងចង់ចាំថា ការស្លៀកពាក់ខ្មែរបុរាណមានច្រើនយ៉ាងច្រើនបែបណាស់ យើងមានទាំងឯកសារជារូបថត ឯកសារជាគំនូរ ចម្លាក់ផ្សេងៗ រាប់មិនអស់ ហេតុអ្វីយើងមិនសិក្សាស្រាវជ្រាវបង្កើតដោយខ្លួនឯង ជារបៀបរបបរបស់យើង ជាជាងទិញស្រាប់ៗពីថៃ ឬចម្លងតាមថៃមក ទាំងដែលឈុតខ្មែរពីបុរាណមកយើងក៏ស្រស់ស្អាត និងមានតម្លៃ។
អ្វីដែលរាប់ថា ជាមហន្តរាយចំពោះវប្បធម៌ខ្មែរនោះ គឺការបាត់បង់អត្តសញ្ញាណជាតិ ។ វត្តមានរបស់ឈុតថៃ ឈុតថៃព្រះរាជនិយម គ្រឿងថៃ កម្រងផ្កាថៃ ធ្វើអោយបាត់បង់ផលិតកម្មក្នុងស្រុក សិប្បករ សិល្បករ ដែលមាននាទីផលិតសម្ភារៈវប្បធម៌ខ្មែរ ចាប់ផ្តើមបាត់បង់ចំណូល ឱកាសនៃការបញ្ជាទិញ អ្វីដែលពួកគេខិតខំនឹងក្លាយជាអសាបង់ ។
ងក្រោយដែលជាគ្រោះមហន្តរាយបំផុត គឺសិប្បករខ្មែរបញ្ឈប់ការផលិតសម្ភារៈវប្បធម៌ខ្មែរ ធ្វើអោយវប្បធម៌ខ្មែរក៏បាត់បង់រលត់អស់វិញ្ញាណ សល់តែរូបសណ្ឋានដែលសំអាងការចាត់ចែង អោយមានរូបរាងស្រដៀងសភាពវប្បធម៌ខ្មែរ តែចិត្តវិញ្ញាណ ព្រលឹងនៃឈុតជារបស់ថៃ។
ទោះជាយ៉ាងណា ពាក់ព័ន្ធបញ្ហាខាងលើនេះ រហូតមកទល់នាពេលនេះគេនៅមិនទាន់ឃើញមានការចេញបកស្រាយណាមួយពីអ្នកនាង គង់ ចាន់ស្រីមុំ នៅឡើយទេ ខណៈពេលដែលខាងសម្អាងការដែលបានតុបតែងក្នុងពិធីខួបកំណើតរបស់នាងនោះ ក៏នៅមិនទាន់បញ្ចេញប្រតិបត្តិណាមួយដូចគ្នា៕
ចែករំលែកព័តមាននេះ