ខេត្តកំពត ៖ កម្លាំងមន្ទីរយុត្តិធម៌កងរាជអាវុធហត្ថខេត្តបានការសម្របសម្រួលពីលោក ខៃ សម្ផស្ប័ ព្រះរាជអាជ្ញារងអមសាលាដំបូងខេត្ត ដឹកនាំកម្លាំងដោយលោកវរសេនីយទោ ហែម ចន្ទ័ដារ៉ា មេបញ្ជាការរងនិងជាប្រធានមន្ទីរយុត្តិធម៌ នៃកងរាជអាវុធហត្ថខេត្ត បានចុះទៅបង្ក្រាបការប្រើប្រាស់ និងចែកចាយគ្រឿងញៀនមួយកន្លែងនៅចំណុចកាស៊ីណូ ហាទៀងវេហ្គ្រាស ស្ថិតក្នុងភូមិថ្កូវ ឃុំឬស្សីស្រុកខាងលិច ស្រុកកំពង់ត្រាច ខេត្តកំពត កាលពីវេលាម៉ោង១២និង១៥នាទីរំលងអាធ្រាត្រ ឈានចូលថ្ងៃទី៧ ខែធ្នូ ឆ្នាំ២០១៦។
ក្នុងករណីចុះប្រតិបត្តិការបង្ក្រាបខាងលើ កម្លាំងកងរាជអាវុធហត្ថបានឃាត់ខ្លួនជនសង្ស័យដែលកំពុងធ្វើសកម្មចែកចាយជាក់ស្តែងបានចំនួន៣នាក់ និងរឹបអូសវត្ថុតាងថ្នាំញៀនចំនួន៥កញ្ចប់ និងកង់មួយគ្រឿង។ លោកវរសេនីយទោ ហែម ចន្ទ័ដារ៉ា មេបញ្ជាការរង និងជាប្រធានមន្ទីរ នៃកងរាជអាវុធហត្ថខេត្តបានឲ្យដឹងថា ជនសង្ស័យដែលកម្លាំងយើងឃាត់ខ្លួនទាំង៣នាក់មាន ទី១-ឈ្មោះ សាន សម្បត្តិភេទប្រុស អាយុ៣៧ឆ្នាំ(ជាម្ចាស់ថ្នាំ) ទី២-ឈ្មោះ សុខ ផាន់ណា ភេទប្រុស អាយុ២០ឆ្នាំ ឈ្មោះនេះជាអ្នកយកថ្នាំពីឈ្មោះ សាន សម្បត្តិ ទៅលក់។
ទី៣-ឈ្មោះ យ៉ង វុទ្ធី ភេទប្រុស អាយុ២២ឆ្នាំ ជាបក្ខពួក របស់ សុខ ផាន់ណា ជនសង្ស័យខាងលើមានទីលំនៅកន្លែងកើតហេតុខាងលើ។ វត្ថុតាងមានថ្នាំញៀនចំនួន៥កញ្ចប់មិនទាន់ថ្លឹង និងកង់មួយគ្រឿង។ លោក ហែម ចន្ទ័ដារ៉ា ឲ្យដឹងទៀតថា បច្ចុប្បន្នជនសង្ស័យទាំង៣នាក់ រួមនឹងវត្ថុតាង ត្រូវបានឃាត់ខ្លួនដើម្បីសាកសួរ នៅមន្ទីរយុត្តិធម៌ និងកសាងសំណុំរឿងចាត់ការបន្តតាមនីតិវិធី។ យោងតាមប្រភពព័ត៌មានមិនផ្លូវការថ្មីៗនេះបានឲ្យដឹងថា អ្នកទោសគ្រឿងញៀននៅក្នុងខេត្តកំពត ស្ទើរតែរកគុកមិនបានទៅហើយ ដោយសារតែបទល្មើសគ្រឿងញៀនកើនឡើងជាងបទល្មើសផ្សេងៗក្នុងឆ្នាំ២០១៦នេះ៕
ចែករំលែកព័តមាននេះ