តារាកំប្លែងម្នាក់ទៀតចេញពី CTN ហើយ តើអ្នកណាមកជំនួសក្រុមតារាកំប្លែងទាំងនេះ?
- ភ្នំពេញ
តារាកំប្លែងម្នាក់ទៀតហើយ បានប្រកាសចាកចេញពីក្រុមកំប្លែងរបស់ស្ថានីយទូរទស្សន៍ CTN នោះ គឺ
រាជធានីភ្នំពេញ ៖ នៅថ្ងៃទី ០៣ ខែកក្កដា ឆ្នាំ២០២២នេះ តារាកំប្លែងម្នាក់ទៀតហើយ បានប្រកាសចាកចេញពីក្រុមកំប្លែងរបស់ស្ថានីយទូរទស្សន៍ CTN នោះ គឺ នាយ គ្រឿន ដែលជាប្អូនប្រុសបង្កើតរបស់តារាកំប្លែងជួរមុខ នាយ ពាក់មី ។
វាហាក់ដូចជាមិនមែនជារឿងចម្លែកទៀតនោះទេ សម្រាប់ការប្រកាសចាកចេញរបស់នាយគ្រឿន ព្រោះមួយរយៈពេលចុងក្រោយនេះ គឺមានតារាកំប្លែងជាច្រើនរូប រួមមាន ៖ នាយពាក់មី នាយក្រូច និងអ្នកដឹកនាំក្រុមកំប្លែងផ្ទាល់ គឺលោក សុវណ្ណរិទ្ធី ហៅ តាវិចទ័រ ។ ប៉ុន្តែអ្វីដែលកំពុងតែបង្កើតនូវចម្ងល់ដល់មហាជននោះ គឺក្រុមតារាកំប្លែងណានឹងត្រូវមកជំនួសកន្លែងក្រុមនាយពាក់មី ខណៈអ្នកនាង យុគ ចិន្តា ពិធីការិនីចាស់វស្សា ត្រូវបានថ្នាក់លើរបស់ស្ថានីយទូរទស្សន៍ CTN ប្រគល់តំណែងថ្មីបន្ថែមទៀតឱ្យគ្រប់គ្រងដឹកនាំជំនួសតំណែងលោក តាវិចទ័រនោះ។
ងាកមកតារាកំប្លែង នាយគ្រឿន វិញ តារាកំប្លែងមុខស្រស់ល្បីឈ្មោះខ្លាំងក្នុងរឿងជាតួអង្គ «នាយស៊យ» នោះ បានសរសេរបង្ហោះសារនៅលើបណ្ដាញសង្គមហ្វេសប៊ុកដោយមានភ្ជាប់ជាមួយនឹងរូបប៉ុន្មានសន្លឹកថា «រីករាយនៅអ្វីដែលយើងមាន ហើយបាត់បង់ទៅវិញ លាហើយ ស៊ី ធី អិន ទីកន្លែងផ្ដល់កំណើតសិល្បៈដល់រូបខ្ញុំ លាបងប្អូន ធ្លាប់រួមការងារគ្រប់កម្មវិធីនៅទីនេះ អរគុណ ស៊ី ធី អិន អរគុណពូមីង ពុកម៉ែបងប្អូនដែលស្រឡាញ់ និងគាំទ្រខ្ញុំរហូតមក»។
គេឃើញមានមតិពីមហាជន និងអ្នកគាំទ្រមួយចំនួនបានបង្ហាញនូវការសោកស្ដាយ ដែលនាយគ្រឿន ចាកចេញពី CTN ហើយក៏មានពាក្យជូនពរ និងលើកទឹកចិត្តតារាកំប្លែងរូបនេះដែរ។
ក្នុងសំណេរនេះដែរ លោកក៏មិនបានបង្ហាញពីមូលហេតុ នៃការចេញរបស់លោកអោយពិតប្រាកដនោះទេ ប៉ុន្តែមហាជនអាចទាយដឹងថា ការចាកចេញរបស់លោក មានមូលហេតុមិនខុសពីបងប្រុសរបស់លោកប៉ុន្មានទេ ដោយសារតែកន្លងមក នាយពាក់មី បានប្រកាសលាឈប់ការងាររបស់ខ្លួនពីស៊ីធីអិននេះ ដោយសារការមិនពេញចិត្តការដឹកនាំរបស់អ្នកគ្រប់គ្រងថ្មី។
ចំណែក នាយពែកមី ក៏ធ្លាប់បាននិយាយថា លោកត្រូវបានថ្នាក់ដឹកនាំថ្មីដកចេញពីកម្មវិធី «My boss» ឬ «បាទមេ» និងបាននិយាយបន្ថែមថា ខ្លួនមិនចង់ចាកចេញពីស៊ីធីអិន ដែលជាផ្ទះ ជាកន្លែងផ្តល់កំណើតសិល្បៈអោយលោកមានកិត្តិយសមុខមាត់ដូចថ្ងៃនេះ។
គេសង្កេតឃើញថា ការលាឈប់របស់តារាកំប្លែង CTN មិនមែនធ្វើឡើងភ្លាមៗនោះទេ គឺមានការបង្ហើបគម្រោងចាកចេញពីនាយពាក់មី និងតារាកំប្លែងជាច្រើនរូប ប្រមាណជាងមួយខែមកហើយ ប៉ុន្តែមិនមានដំណោះស្រាយសមស្របណាមួយត្រូវបានកើតឡើងនោះទេ ។
ដូច្នេះ មហាជនកំពុងរង់ចាំមើលវត្តមានតារាកំប្លែងនៅក្នុងក្រុមពាក់មីរូបណាទៀត ដែលនឹងចាកចេញ ហើយក៏កំពុងរង់ចាំមើលថា តើក្រុមកំប្លែងក្រុមថ្មីណា នឹងមកជំនួសក្រុមកំប្លែងប្រចាំស្ថានីយទូរទស្សន៍ CTN នោះទេ? តែកន្លងមក ក្នុងកម្មវិធី «បាទមេ» គឺមានវត្តមានតារាកំប្លែងដែលពោរពេញដោយសមត្ថភាពកំពុងមានវត្តមានសម្តែងដែរនោះគឺ «ពូណុយ»។
ចែករំលែកព័តមាននេះ