ជួលម៉ូតូឱ្យគេជិះ ស្រាប់តែបាត់ លុះឆែក GPS ក៏ឃើញក្រោយសាលាសង្កាត់ផ្សារកណ្តាល
- បន្ទាយមានជ័យ
ក្រុងប៉ោយប៉ែត ៖ ជនសង្ស័យជាមុខសញ្ញាកាច់សោ កម៉ូតូចំនួន៤នាក់ ត្រូវនគរបាលក្រុងប៉ោយ
ក្រុងប៉ោយប៉ែត ៖ ជនសង្ស័យជាមុខសញ្ញាកាច់សោ កម៉ូតូចំនួន៤នាក់ ត្រូវនគរបាលក្រុងប៉ោយប៉ែតឃាត់ខ្លួន ក្នុងពេលប្រតិបត្តិការចុះបង្ក្រាបនោះ ជនសង្ស័យចំនួន២នាក់ ត្រូវបាននគរបាលរៀបចំសំណុំរឿងបញ្ជូនទៅស្នងការដ្ឋាននគរបាលខេត្តបន្ទាយមានជ័យ ដើម្បីអនុវត្តតាមនិតិវិធី ចំណែក២នាក់ទៀត មិនពាក់ព័ន្ធ ត្រូវបានដោះលែងឲ្យមានសេរីភាពឡើងវិញ ។
លោកវរសេនីយ៍ឯក សៅ សារឿន អធិការនគរបាល្រុងប៉ោយប៉ែត បានឲ្យដឹងថា កាលពីវេលាម៉ោង៦និង៤០នាទីព្រឹកថ្ងៃទី២ ខែ កក្កដា ឆ្នាំ២០២២ មានប្រជាពលរដ្ឋឈ្មោះ ប៊ឺ ណៃស្រី ភេទប្រុស អាយុ៤២ឆ្នាំ រស់នៅភូមិបាលិលេយ្យ១ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ បានមកប្ដឹងរាយការណ៍ថា មានករណីចោរកាច់កម៉ូតូមួយគ្រឿងម៉ាក ZOOMER-X ពណ៌ខ្មៅ ពាក់ស្លាកលេខ បាត់ដំបង 1AF-8726 ជារបស់គាត់ដែលបានជួលទៅឲ្យឈ្មោះ ប៊ុន ចាន់ឌឿន ភេទស្រី អាយុ២០ឆ្នាំ នៅភូមិបាលិលេយ្យ១ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ ។ លុះពេលគាត់ឆែកតាមប្រព័ន្ធ GPS ឃើញម៉ូតូមួយគ្រឿងនោះ ត្រូវចោរយកទៅទុកនៅចំណុចក្រោយសាលាសង្កាត់ផ្សារកណ្ដាល ស្ថិតក្នុងភូមិផ្សារកណ្ដាល សង្កាត់ផ្សារកណ្ដាល ក្រុងប៉ោយប៉ែត ខេត្តបន្ទាយមានជ័យ។
លោកអធិការបានបញ្ជាក់ថា ក្រោយពីទទួលបានបណ្តឹងភ្លាម រូបលោកបានចាត់តាំងកម្លាំងរបស់ប៉ុស្តិ៍នគរបាលរដ្ឋបាលផ្សារកណ្ដាលនិងកម្លាំងជំនាញព្រហ្មទណ្ឌ ចុះទៅតាមប្រព័ន្ធ GPS ដែលបានបង្ហាញ ពេលទៅដល់ចំណុចនោះក៏បានឃាត់ខ្លួនជនសង្ស័យចំនួន៤នាក់ ១-ឈ្មោះបូលី ពៅ ហៅង៉ោល ភេទប្រុស អាយុ២៨ឆ្នាំ ២-ឈ្មោះ សុវណ្ណ បូលី ភេទប្រុស អាយុ៣០ឆ្នាំ ៣-ឈ្មោះកៅ ដុល្លា ភេទប្រុស អាយុ១៧ឆ្នាំ និង៤-ឈ្មោះ ជឿន ជាង ហៅទក់ ភេទប្រុស អាយុ២៨ឆ្នាំ ស្នាក់នៅភូមិផ្សារកណ្តាល ទាំងអស់គ្នា ។
លោកអធិការបានបញ្ជាក់បន្តថា ក្នុងប្រតិបត្តិការចុះបង្ក្រាប និងឃាត់ខ្លួនជនសង្ស័យខាងលើ សមត្ថកិច្ចក៏បានដកហូតម៉ូតូចំនួន៣គ្រឿង រួមមាន ១-ម៉ូតូមួយគ្រឿងម៉ាក YAMAHA AEROX ពណ៌ប្រផេះ លាយទឹកប៊ិក គ្មានស្លាកលេខ ២-ម៉ូតូមួយគ្រឿងម៉ាក ZOOMER -X ពណ៌ខ្មៅ ដែលបាត់ និង៣-ម៉ូតូមួយគ្រឿងម៉ាក CBR 150 គ្មានស្លាកលេខ និងឧបករណ៍ដូចជាសោរ ដែកគាស់ ស្នាប់ដៃ និងដែកកេសកែច្នៃមួយចំនួន ។ បន្ទាប់មកទាំងជនសង្ស័យ និងវត្ថុតាង ត្រូវបាននាំយកទៅកាន់អធិការដ្ឋាននគរបាលក្រុង ដើម្បីធ្វើការសួរនាំកសាងសំណុំរឿង បញ្ជួនតាមនីតិវិធី។
អធិការនគរបាលក្រុងប៉ោយប៉ែត លោកវរសេនីយ៍ឯក សៅ សារឿន បានបញ្ជាក់បន្ថែមថា ជនសង្ស័យឈ្មោះបូលី ពៅ ហៅង៉ោល បានឆ្លើយសារភាពថា ខ្លួននិងបក្ខពួកឈ្មោះ កៅ ដុល្លា ហៅ ឡា ពិតជាបានធ្វើសកម្មភាពលួចម៉ូតូខាងលើពិតប្រាកដមែន និងធ្លាប់ជាប់ពន្ធនាគារ ពាក់ព័ន្ធ ជួញដូរគ្រឿងញៀ.នផងដែរ ។ ដោយឡែកឈ្មោះ សុវណ្ណ បូលី ភេទប្រុស អាយុ៣០ឆ្នាំ និង ជឿន ជាង ហៅទក់ ភេទប្រុស អាយុ២៨ឆ្នាំ សមត្ថកិច្ចស្រាវជ្រាវឃើញរកថា ពុំមានការជាប់ពាក់ព័ន្ធនឹងអំពើលួចឡើយ ទើបកម្លាំងជំនាញស្នើសុំធ្វើការអប់រំ កិច្ចសន្យា រួចឲ្យត្រឡប់ទៅផ្ទះវិញ។ ដោយឡែក ម៉ូតូរបស់ជនរងគ្រោះទាំង២នាក់ ត្រូវបានកម្លាំងជំនាញប្រគល់ទៅឱ្យម្ចាស់វិញ ដើម្បីយកទៅប្រើប្រាស់ ៕
ចែករំលែកព័តមាននេះ