កងទ័ពអ៊ុយក្រែនបានចោទប្រកាន់រុស្ស៊ីថា បានវា.យប្រហារកោះពស់ដោយប្រើប្រាស់គ្រាប់បែកផូស្វ័រ មួយថ្ងៃប៉ុណ្ណោះ ក្រោយពេលទីក្រុងម៉ូស្កូដកទ័ពចេញពីកោះថ្មនោះដែលស្ថិតនៅក្នុងសមុទ្រខ្មៅ។
មេបញ្ជាការកងទ័ពអ៊ុយក្រែនលោក លោក Valeriy Zaluzhnyi បាននិយាយនៅលើតេឡេក្រាម កាលពីថ្ងៃសុក្រ ទី០១ កក្កដាថា យន្តហោះចម្បាំងSu-30 របស់រុស្ស៊ីដែលទម្លាក់គ្រាប់បែកផូស្វ័របានហោះហើរពីលើកោះពីឧបទ្វីបគ្រីមៀដែលគ្រប់គ្រងដោយរុស្ស៊ី។
«ថ្ងៃនេះម៉ោងប្រហែល១៨:០០ យន្តហោះប្រភេទ Su-30 នៃកងទ័ពអាកាសរុស្ស៊ីបានធ្វើការវា.យប្រហារចំនួន ២ដងដោយប្រើគ្រាប់បែកផូស្វ័រនៅលើកោះពស់»។ នេះជាការថ្លែងរបស់កងទ័ពអ៊ុយក្រែននៅក្នុងសេចក្តីប្រកាស។
កាលពីថ្ងៃព្រហស្បតិ៍ ទី ៣០ រុស្ស៊ីបានដកទ័ពចេញពីកោះពស់ ហើយក្រសួងការពារជាតិរុស្ស៊ីនិយាយថា ការដកទ័ពចេញនោះជាកាយវិការមនុស្សធម៌ដែលបង្ហាញថា រុស្ស៊ីនឹងមិនជ្រៀតជ្រែកកិច្ចប្រឹងប្រែងរបស់អង្គការសហប្រជាជាតិក្នុងការរៀបចំការនាំចេញគ្រាប់ធុញ្ញជាតិអ៊ុយក្រែនពីកំពង់ផែននៅសមុទ្រខ្មៅ។
អ៊ុយក្រែនបានចោទប្រកាន់រុស្ស៊ីថា មិនអាចអនុវត្តន៍ការប្រកាសរបស់ខ្លួន ខណៈអង់គ្លេសនិយាយថា រុស្ស៊ីដកទ័ពចេញពីកោះពស់នោះមិនមែនជាកាយវិការមនុស្សធម៌នោះទេ ប៉ុន្តែខ្លាចការវា.យប្រហារពីសំណាក់មីស៊ីលរបស់អ៊ុយក្រែន។
សូមបញ្ជាក់ថា កោះពស់របស់អ៊ុយក្រែន ដែលត្រូវរុស្ស៊ីវា.យដណ្តើមយកបាននៅថ្ងៃដំបូងនៃការឈ្លានពានលើអ៊ុយក្រែន ទទួលបានភាពល្បីល្បាញទូទាំងពិភពលោក នៅពេលកងទ័ពអ៊ុយក្រែនដែលឈរជើងនៅទីនោះ បានបដិសេធចុះចាញ់ចំពោះការទាមទាររបស់នាវាចម្បាំងរុស្ស៊ី៕ (យោងតាមប្រភព៖ Aljazeera)
ចែករំលែកព័តមាននេះ