ខេត្តមណ្ឌលគិរី ៖ ករណីស្ត្រីជនបរទេសម្នាក់ឈ្មោះ ALIANCHE Iris អាយុ៤៦ឆ្នាំ ជាជនជាតិបារាំង មានមុខរបរគ្រូបង្រៀនតាមអនឡាញ កាន់លិខិតឆ្លងដែនស្របច្បាប់ ស្នាក់នៅបណ្ដោះអាសន្ន…
ខេត្តមណ្ឌលគិរី ៖ ករណីស្ត្រីជនបរទេសម្នាក់ឈ្មោះ ALIANCHE Iris អាយុ៤៦ឆ្នាំ ជាជនជាតិបារាំង មានមុខរបរគ្រូបង្រៀនតាមអនឡាញ កាន់លិខិតឆ្លងដែនស្របច្បាប់ ស្នាក់នៅបណ្ដោះអាសន្ន ក្នុងភូមិពូតាំង សង្កាត់រមនា ក្រុងសែនមនោរម្យ បានបាត់បង់ជីវិត ដោយសារតែជំងឺប្រចាំកាយ ។
ក្រោយទទួលបានដំណឹងខាងលើនេះភ្លាម កម្លាំងជំនាញការិយាល័យបច្ចេកទេសវិទ្យាសាស្ត្រ សហការជាមួយកម្លាំងអធិការដ្ឋាននគរបាលក្រុងសែនមនោរម្យ និង ក្រុមគ្រូពេទ្យជំនាញ នៃមន្ទីរពេទ្យបង្អែក សែនមនោរម្យ ព្រមទាំងមានការដឹកនាំសម្របសម្រួលពីលោក មាស វឌ្ឍនា ព្រះរាជអាជ្ញារងអមសាលាដំបូងខេត្តមណ្ឌលគិរី បានចុះទៅកន្លែងកើតហេតុ និងពិនិត្យសាកសព នៅវេលាម៉ោង១៦និង០០នាទីរសៀលថ្ងៃសុក្រ ទី០១ ខែកក្កដា ឆ្នាំ២០២២ ។
ក្រោយពិនិត្យវិភាគនៅកន្លែងកើតហេតុ និងសាកសពយ៉ាងយកចិត្តទុកដាក់ ពីសមត្ថកិច្ចជំនាញ និងក្រុមគ្រូពេទ្យ បានសន្និដ្ឋានថា សាកសពជនរងគ្រោះ បានស្លាប់ដោយសារជំងឺប្រចាំកាយ (គឺជំងឺហឺត) ។
យោងតាមការបំភ្លឺពីម្ដាយជនជាតិបារាំង នៃសពខាងលើ បានបញ្ជាក់ថា កូនស្រីរបស់គាត់មានជំងឺហឺត និងប្រើប្រាស់ថ្នាំហឺត ជាយូរឆ្នាំណាស់មកហើយនាង ព្រមទាំងផឹកស្រា ជក់បារី ជាប្រចាំផងដែរ ។
ក្រោយពិនិត្យចប់សព្វគ្រប់ កម្លាំងសមត្ថកិច្ច ក៏បានធ្វើការប្រគល់សាកសពជូនក្រុមគ្រួសារ ដើម្បីទទួលយកទៅតំកល់ទុកធ្វើបុណ្យតាមប្រពៃណី ៕
ចែករំលែកព័តមាននេះ