ខេត្ដកំពង់ស្ពឺ ៖ រថយន្ត០១គ្រឿង ម៉ាកតូយ៉ូតា អាល់ហ្វាត បានជួបគ្រោះថ្នាក់ចរាចរណ៍ លើកំណាត់ផ្លូវល្បឿនលឿន បណ្ដាលអោយ រថយន្តក្រឡាប់ រងរបួសធ្ងន់ស្រាលដល់មនុស្សចំនួន០៤នាក់ នៅវេលាម៉ោង០៣និង៤៥នាទីរសៀលថ្ងៃទី០១ ខែកក្កដា ឆ្នាំ២០២២នេះ ត្រង់ចំណុច ភូមិពាមទុង ឃុំត្រែងត្រយឹង ស្រុកភ្នំស្រួច ខេត្ដកំពង់ស្ពឺ ។
បើតាមជំនាញចរាចរណ៍ស្រុកភ្នំស្រួច លោកវរសេនីយ៍ទោ ពៅ នឿន បានអោយដឹងថា រថយន្ត០១គ្រឿងដែលជួបគ្រោះថ្នាក់ ម៉ាកតូយ៉ូតា អាល់ហ្វាត (Alphard) ពណ៍ស ស្លាកលេខភ្នំពេញ 2BF-8590 បើកបរដោយឈ្មោះ ប៉ក់ ពឿន ភេទប្រុស អាយុ៣៩ឆ្នាំ រស់នៅភូមិព្រៃខ្លា ឃុំព្រៃកណ្ដៀង ស្រុកពាមរក៍ ខេត្តព្រៃវែង អ្នករួមដំណើរចំនួន ០៤នាក់ (ក្នុងនោះមានស្រីម្នាក់) រួមមាន ៖
ទី១- ឈ្មោះ អាន់ ជុងហូ ភេទប្រុស អាយុ៥៧ឆ្នាំ (ជនជាតិកូរ៉េ)
ទី២- ឈ្មោះ អ៊ី សហា ភេទប្រុស អាយុ៤០ឆ្នាំ(ជនជាតិកូរ៉េ)
ទី៣- ឈ្មោះ គីម យ៉ុងហ៊ុន ភេទប្រុស អាយុ ៤៦ឆ្នាំ (ជនជាតិកូរ៉េ)
និងទី៤- ឈ្មោះ មីន ធីតា ភេទស្រី អាយុ១៨ឆ្នាំ (ជនជាតិខ្មែរ)។
លោកវរសេនីយ៍ទោ ពៅ នឿន អធិការរងនគរបាលស្រុកភ្នំស្រួច បានបន្តថា រថយន្ដបើកបរ ក្នុងទិសដៅពីខាងកើត ទៅទិសខាងលិច (រាជធានីភ្នំពេញ ឆ្ពោះទៅខេត្តព្រះសីហនុ) ក្នុងគន្លងខាងឆ្វេងដៃ លុះដល់ចំណុចខាងលើ បានគេចរថយន្តមួយគ្រឿងទៀត មិនស្គាល់ម៉ាក រួចហើយអ្នកបើកបរជាន់ហ្វ្រាំងភ្លាមៗក្នុងពេលរថយន្ដកំពុងស្ថិតក្នុងល្បឿនលឿនផងនោះ បណ្ដាលឲ្យក្រឡាប់ជាច្រើនជុំ បង្កគ្រោះថ្នាក់មនុស្សនៅក្នុងរថយន្ដ (ចំនួន០៤នាក់) និងខូចខាតរថយន្ដ ទាំងស្រុង ។
សមត្ថកិច្ចនគរបាល បានជួយសង្គ្រោះបញ្ជូនជនរងគ្រោះ ទៅកាន់មន្ទីរពេទ្យ ចំណែកឯរថយន្តបានយកមករក្សាទុកនៅអធិការដ្ឋាននគរបាលស្រុកភ្នំស្រួច ៕
ចែករំលែកព័តមាននេះ