ខេត្តកំពង់ធំ ៖ ផ្ទះ១ធ្វើអំឈើដំបូលប្រក់សង្ក័សី ជញ្ជាំងបាំងស្លឹកទំហំ៦ម៉ែត្រ គុណនឹង៧ម៉ែត្រ ស្មើនឹង២ខ្នងស្ថិតនៅក្នុងភូមិឈើទាល ឃុំត្បែង ស្រុកកំពង់ស្វាយ ខេត្តកំពង់ធំ ត្រូវបានអគ្គិភ័យលេបត្របាក់រាបដល់ដីកាលពីព្រឹកថ្ងៃទី០៦ ខែធ្នូ ឆ្នាំ២០១៦នេះ។
ប្រភពព័ត៌មានពីលោកវរសេនីយ៍ត្រី យន់ ឆៃយាន អធិការងនគរបាលស្រុកកំពង់ស្វាយប្រាប់ថា ករណីអគ្គិភ័យនេះបានកើតឡើងកាលពីព្រឹកថ្ងៃទី០៦ ខែធ្នូ ឆ្នាំ២០១៦ ខណៈឪពុកម្តាយទៅច្រូតស្រូវអស់ ម្ចាស់ផ្ទះប្តីឈ្មោះ ទុំ ធឿន អាយុ៥៨ឆ្នាំ មានប្រពន្ធឈ្មោះ រ៉េត យ៉ម អាយុ៤៦ឆ្នាំ រស់នៅភូមិឃុំកើតុហេតុខាងលើមានកូន៦នាក់ ប្រុស៤ និងស្រី២នាក់ នៅពេលឪពុកម្តាយមិននៅផ្ទះទៅច្រូតស្រូវអស់នៅសល់តែកូនៗ ពួកគេនាំគ្នាដាំបាយចោលហើយនាំគ្នាប្រឡែងគ្នាលេងនៅក្រោមផ្ទះ។
ដោយខែនេះជារដូវរំហើយ និងមានខ្យល់បក់ផងនោះ គ្រាន់តែមួយព្រព្រិចភ្នែកសោះបណ្តាលឲ្យអណ្តាតភ្លើងឆេះយ៉ាងសន្ធោសន្ធៅពេញបន្ទុកតែម្តង ប្រជាពលរដ្ឋនាំគ្នាជួយពន្លត់ដែរ តែពុំអាចគ្រប់គ្រងស្ថានភាពបានបណ្តាលឲ្យភ្លើងឆេះតាមកម្លាំងខ្យល់ឆេះអស់ទាំងស្រុងនូវទ្រព្យសម្បត្តិជាច្រើនរួមមាន ម៉ូតូ១គ្រឿង កង់ ស្រូវ៣តោន លុយខ្មែរ១លានរៀល និងសម្ភារជាច្រើនមុខទៀត។ គួរឲ្យសោកស្តាយក្រៃលែងសម្រាប់ប្រជាពលរដ្ឋក្រីក្រ លោកមានតែប៉ុណ្ណឹង ក្នុងហេតុការណ៍នេះពុំបណ្តាលឲ្យមានគ្រោះថ្នាក់ដល់អាយុជីវិតមនុស្សនោះឡើយ៕
ចែករំលែកព័តមាននេះ