វៀតណាម ៖ នៅវេលាម៉ោង៤ល្ងាចថ្ងៃទី៧ ធ្នូ ស្អែកនេះ ក្រុមបឹងកេតអង្គររបស់កម្ពុជា នឹងប្រកួតចុងក្រោយដើម្បីដណ្ដើមពិន្ទុក្នុងពូលA ឆ្ពោះទៅកាន់ការប្រកួតវគ្គពាក់កណ្ដាលផ្ដាច់ព្រ័ត្រនៅក្នុងព្រឹត្តិការណ៍ BTV Cup នៅក្នុងប្រទេស
វៀតណាម ៖ នៅវេលាម៉ោង៤ល្ងាចថ្ងៃទី៧ ធ្នូ ស្អែកនេះ ក្រុមបឹងកេតអង្គររបស់កម្ពុជា នឹងប្រកួតចុងក្រោយដើម្បីដណ្ដើមពិន្ទុក្នុងពូលA ឆ្ពោះទៅកាន់ការប្រកួតវគ្គពាក់កណ្ដាលផ្ដាច់ព្រ័ត្រនៅក្នុងព្រឹត្តិការណ៍ BTV Cup នៅក្នុងប្រទេសវៀតណាម ។ បើទោះជាលទ្ធផលនៅល្ងាចស្អែកនេះយ៉ាងណាក៏ដោយ ក៏ក្រុមបឹងកេតអង្គររបស់កម្ពុជានៅតែបានឈានឡើងដោយស្វ័យប្រវត្តិដោយសារតែមានពិន្ទុខ្ពស់ក្នុងពូលរួចទៅហើយ ។
យោងតាមការប្រកួតដែលបានធ្វើឡើងនៅខេត្តប៊ិញយឿង ប្រទេសវៀតណាម គឺក្រុមបឹងកេតអង្គររបស់កម្ពុជា នឹងបានឈានឡើងក្នុងវគ្គពាក់កណ្ដាលផ្ដាច់ព្រ័ត្រដោយមិនចាំបាច់គិតពិន្ទុចាញ់ឈ្នះ ដោយសារតែក្នុងដៃមាន៦ពិន្ទុនាំមុខរួចទៅហើយ ។ ទោះបីយ៉ាងណា ក្រុមបឹងកេតអង្គរ ក៏ត្រូវការពិន្ទុខ្ពស់ដើម្បីឈរលេខ១ក្នុងពូលគេចពីការប្រកួតជាមួយក្រុមលេខ១ ពូលBនៅវគ្គបន្ទាប់ផងដែរដើម្បីដណ្ដើមយកឱកាសទៅកាន់វគ្គផ្ដាច់ព្រ័ត្រដោយមិនលំបាក ។
នេះជាការប្រកួតអន្តរជាតិក្នុងចំណោមក្រុមល្អៗមកពីប្រទេសមួយចំនួននៅតំបន់អាស៊ាន និងកូរ៉េ និងប្រទេសមួយចំនួនទៀត ទើបគេកត់សម្គាល់ថា ជ័យជម្នះរបស់ក្រុមបឹងកេតអង្គរនៅក្នុងព្រឹត្តិការណ៍ BTV Cup ដែលបានធ្វើឡើងនៅក្នុងប្រទេសវៀតណាម គឺជាមុខមាត់មួយរបស់ក្រុមបាល់ទាត់កម្ពុជា ។ ជាមួយនឹងវត្តមានចូលប្រកួត ហើយបានជ័យជម្នះ២ប្រកួតក្នុងចំណោម៣ប្រកួតក្នុងពូលបានជួយក្រុមបឹងកេតអង្គរមានឈ្មោះបោះសំឡេងយ៉ាងខ្លាំងជាពិសេសគឺកីឡាករ ចាន់ វឌ្ឍនាកា បន្ទាប់ពីគេបានតំណែងជា Man Of The Match ដោយសារតែគេបញ្ជូនបាល់បានល្អ និងស៊ុតបានល្អនៅក្នុងព្រឹត្តិការណ៍ BTV Cup ដែលរៀបចំដោយខេត្តប៊ិញយឿង ប្រទេសវៀតណាម ។
កម្ពុជាបានយកឈ្នះក្រុមសាកលវិទ្យាល័យប្រទេសវៀតណាម និងក្រុមខ្លាំងមួយរបស់ម្ចាស់ផ្ទះ ទើបធ្វើឱ្យក្រុមបឹងកេតអង្គរជិះសេះលែងដៃសម្រាប់ការប្រកួតនៅល្ងាចថ្ងៃទី៧ ធ្នូ ស្អែកនេះ នៅក្នុងប្រទេសវៀតណាម ។ ការប្រកួតចុងក្រោយក្នុងពូលនៅក្នុងវគ្គនេះ នឹងក្លាយជាការកាត់ក្ដីថាតើក្រុមកម្ពុជានឹងទទួលបានចំណាត់ថ្នាក់លេខ១ ឬលេខ២ក្នុងពូលដើម្បីបោះជំហានទៅវគ្គពាក់កណ្ដាលផ្ដាច់ព្រ័ត្រ ដោយមិនមែនជាការប្រកួតអស់សង្ឃឹមដូចការចូលរួមរបស់ក្រុមកម្ពុជាផ្សេងទៀតនៅលើទឹកដីបរទេសនោះទេ ទើបធ្វើឱ្យការប្រកួតរបស់ពួកគេទទួលបានការចាប់អារម្មណ៍នៅក្នុងចំណោមអ្នកគាំទ្របាល់ទាត់នៅក្នុងស្រុក ។
ការប្រកួតរបស់ក្រុមជើងឯកលីកកំពូលកម្ពុជាគឺបឹងកេតអង្គរល្ងាចនេះ នឹងប៉ះជាមួយក្រុម Than Quan Ninh របស់ប្រទេសវៀតណាម ដែលជាក្រុមខ្លាំងមួយផងដែរ ។ ប៉ុន្តែវាលែងជាឧបសគ្គសម្រាប់ក្រុមកម្ពុជាទៀតហើយ ដោយសារតែការប្រកួតចាញ់ក៏បាន៧ពិន្ទុឈរលេខ២ក្នុងពូល និងបើឈ្នះក៏បាន៩ពិន្ទុ ហើយបានឡើងដោយស្វ័យប្រវត្តិ ។
ការប្រកួតលា្ងចនេះត្រូវគេរំពឹងថា មិនមានភាពស្វិតស្វាញច្រើនទេ ខណៈដែលកីឡាករល្អៗក៏ត្រូវបានប្រកាសថា នឹងទុកជើងសម្រាប់វគ្គឆ្លងពូលដែលនឹងធ្វើការប្រកួតក្នុងពេលខាងមុខនេះ ។ ពានរង្វាន់ទូរទស្សន៍ខេត្តប៊ិញយឿងរបស់ប្រទេសវៀតណាមនេះ ឬ BTV Cup 2016 នេះ បានចាប់ផ្ដើមឡើងកាលពីថ្ងៃទី២ ធ្នូ ដោយគ្រោងបញ្ចប់នៅថ្ងៃ១១ ធ្នូ ខាងមុខ ទើបក្រុមបឹងកេតអង្គរបានចំណាយពេលយ៉ាងសកម្មហ្វឹកហាត់បាល់ទាត់នៅក្នុងប្រទេសវៀតណាម ដើម្បីដណ្ដើមយកមុខមាត់ជូនដល់កម្ពុជា ខណៈដែលក្ដីរំពឹងនោះ ក៏មើលឃើញខ្ពស់ដោយសារតែការប្រកួតនាពេលកន្លងមក គឺក្រុមកម្ពុជាជោគជ័យរហូត ។ បើក្រុមបឹងកេតអង្គរបានឈ្នះសម្រាប់ការប្រកួតល្ងាចនេះ នោះគេនឹងប៉ះក្រុមដែលឈរលំដាប់លេខ២ក្នុងពេលពូលB ដែលមានន័យថា ក្ដីរំពឹងក៏ច្រើនដូចគ្នាសម្រាប់ជំហានបន្តទៅកាន់វគ្គផ្ដាច់ព្រ័ត្រនៅថ្ងៃទី១១ ធ្នូ ។
គួរបញ្ជាក់ថា ពានរង្វាន់ BTV Cup ក្រុមបឹងកេតអង្គរស្ថិតនៅពូលA ដោយមានក្រុមម្ចាស់ផ្ទះ Becamex Binh Duong, Than Quang Ninh និងក្រុមតំណាងសាកលវិទ្យាល័យកូរ៉េខាងត្បូង ឬ Korea University Selection ។
នៅពូលB មាន៤ក្រុមចូលរួមដូចគ្នា រួមមានក្រុម Hai Phong និងក្រុម SHB Da Nang របស់វៀតណាម, ក្រុម Bangu Atlético Club មកពីប្រេស៊ីល និងក្រុម Shonan Bellmare កំពុងលេងក្នុងលីគកំពូលជប៉ុន (J-League) ទៀតផង ។
ចាន់ វឌ្ឍនាកា ត្រូវគេរំពឹងថា នឹងក្លាយជាកីឡាករកាន់តែលេចធ្លោនៅក្នុងព្រឹត្តិការណ៍នេះ ខណៈដែលការប្រកួតល្ងាចស្អែកនេះ ក៏ជាឱកាសដែលអាចឱ្យគេទទួលបានការចាប់អារម្មណ៍ផងដែរ ប្រសិនបើគេអាចរកគ្រាប់បាល់បានបន្ថែមធ្វើឱ្យក្រុមលេចធ្លោ និងមានការកត់សម្គាល់លើសដើម ។ ការប្រកួតល្ងាចថ្ងៃស្អែកនេះ នឹងមានការផ្សាយផ្ទាល់លើគេហទំព័រមួយចំនួនបន្ថែមពីលើទូរទស្សន៍បាយ័នដែលបានទទួលសិទ្ធិផ្សាយបន្តផ្ទាល់ចាប់ពីម៉ោង៤ល្ងាចតទៅ ៕
ចែករំលែកព័តមាននេះ