នៅទីបំផុត អ្នកដឹកនាំកម្មវិធីកំសាន្តលោក សុវណ្ណ រិទ្ធី ហៅតាវ៉ិចទ័រ ក៏បានសម្រេចចិត្តដើរចេញពីការងារនៅស្ថានីយទូរទស្សន៍ CTN ដូចទៅនឹងក្រុមកំប្លែងនាយ ពាក់មី ផងដែរ
រាជធានីភ្នំពេញ ៖ នៅទីបំផុត អ្នកដឹកនាំកម្មវិធីកំសាន្តលោក សុវណ្ណ រិទ្ធី ហៅតាវ៉ិចទ័រ ក៏បានសម្រេចចិត្តដើរចេញពីការងារនៅស្ថានីយទូរទស្សន៍ CTN ដូចទៅនឹងក្រុមកំប្លែងនាយ ពាក់មី ផងដែរ បន្ទាប់ពីលោកក៏ហាក់សម្តែងការមិនពេញចិត្តទៅនឹងអ្នកដឹកនាំថ្មីដែលជាជនជាតិឥណ្ឌានោះដែរ។
អ្នកដឹកនាំក្រុមកំប្លែងនៅ CTN លោក សុវណ្ណ រិទ្ធី ហៅតាវ៉ិចទ័រ បានបញ្ជាក់តាមរយៈសារនៅក្នុងគ្រុបការងាររបស់លោក និងត្រូវបានគេបញ្ចេញតាមបណ្តាញសង្គមហ្វេសប៊ុកថា «ថ្ងៃនេះ ជាថ្ងៃចុងក្រោយរបស់លោកនៅ CBS កន្លងមក បើមានខុសឆ្គង ឬសំដីតូចធំចំពោះបងប្អូន ខ្ញុំសូមការអភ័យទោស»។ លោកបញ្ជាក់ថា «ខ្ញុំសូមអរគុណ អ្នកឧកញ៉ា ដែលផ្តល់ឱកាសឲ្យខ្ញុំបាទបានរៀនសូត្រពីការងារក្នុងវិស័យនេះ ខ្ញុំសូមអរគុណ»។
ការសម្រេចដើរចេញពីលោក សុវណ្ណ រិទ្ធី នាពេលនេះ ក៏បានធ្វើឡើងជាបន្តបន្ទាប់គ្នា ក្រោយតារាកំប្លែងនាយ ក្រូច និងអ្នកនាង អ៊ីត ក៏បានប្រកាសបញ្ចប់ការងារនៅ CTN នេះដូចគ្នា។ យ៉ា់ងណាពាក់ព័ន្ធបញ្ហាខាងលើនេះ កោះសន្តិភាពនៅមិនទាន់អាចស្វែងរកការបកស្រាយបន្ថែមពីលោក សុវណ្ណ រិទ្ធី ហៅតាវ៉ិចទ័រ បាននៅឡើយទេ ខណៈពេលការសាកសួរនៅមិនទាន់មានការឆ្លើយតប។
ប៉ុន្តែកន្លងមក លោកធ្លាប់បានលើកឡើងពីបញ្ហាខាងលើនេះថា រូបលោក និងតារាកំប្លែងទាំងអស់នៅ CTN គឺជាក្រុមតែមួយ ហើយក៏បានសម្តែងការមិនពេញចិត្តផងដែរ នូវការអនុវត្តការងារបែបរឹតត្បិតខ្លាំងពេកពីអ្នកដឹកនាំមកថ្មី ដែលជាជនជាតិឥណ្ឌា ក្នុងពេលកន្លងមក លោកតែងតែយល់ស្របទៅតាមការសម្រេចចិត្តពីថ្នាក់ដឹកនាំរបស់ស្ថានីយប៉ុណ្ណោះ។
ទោះជាយ៉ាងណា ក្រោយការចាកចេញរបស់លោក សុវណ្ណ រិទ្ធី ហៅតាវ៉ិចទ័រ នាពេលនេះ តើកម្មវិធី «សំណើច២គ្រួសារ» ដែលលោកជាអ្នកដឹកនាំ ហើយជាកម្មវិធីក៏មានប្រជាប្រិយភាពមួយសម្រាប់ទស្សនិកជននោះនឹងទៅជាយ៉ាងណា? ខណៈដែលកម្មវិធីកំសាន្តមួយចំនួនរបស់នាយ ពាក់មី ក៏ត្រូវបានមានអ្នកជំនួសហើយនោះ។
ជាការកត់សម្គាល់ បន្ទាប់ពីការចាកចេញពីបុគ្គលឆ្នើមៗជាបន្តបន្ទាប់នោះ មហាជនកំពុងតែរងចាំមើលថា ស្ថានីយទូរទស្សន៍ CTN នឹងមានយុទ្ធសាស្ត្រអ្វីថ្មី សម្រាប់ដំណើរការកម្មវិធីកំសាន្តនានារបស់ខ្លួនឲ្យនៅតែមាននិន្តរភាព និងទទួលការចាប់អារម្មណ៍ពីសំណាក់ទស្សនិកជន។
ទោះជាយ៉ាងណា គេនៅមិនទាន់ច្បាស់ទេថា អ្នកដឹកនាំថ្មីរបស់ CTN អាចនឹងពិចារណាផ្លាស់ប្តូរលក្ខខណ្ឌការងារខ្លះៗ ដើម្បីជាការទាក់ទាញយកក្រុមការងារទាំងអស់ដែលបានចាកចេញនោះមកវិញឬយ៉ាងណាឡើយ ខណៈពេលដែលបុគ្គលិកដែលបានចាកចេញនាពេលនេះក៏មិនទាន់មានតម្រុយថា នឹងចូលរួមការងារជាមួយស្ថានីយទូរទស្សន៍ថ្មីណាមួយនៅឡើយទេ៕
ចែករំលែកព័តមាននេះ