បុរសជនជាតិគ្រឹងពិការភ្នែកទាំង2ដើរលក់បន្លែ25គ.ម
ខេត្ដរតនគិរី ៖ ដោយសារតែជីវភាពខ្វះខាត បានជំរុញឱ្យបុរសពិការភ្នែកទាំង២ម្នាក់ប្រឹងដើរលក់បន្លែដើមចេកទាំងវេទនាបំផុត
ខេត្ដរតនគិរី ៖ ដោយសារតែជីវភាពខ្វះខាត បានជំរុញឱ្យបុរសពិការភ្នែកទាំង២ម្នាក់ប្រឹងដើរលក់បន្លែដើមចេកទាំងវេទនាបំផុត គឺដើរចេញពីលំនៅឋានរបស់ខ្លួនមកផ្សារបានលុង ដែលមានចម្ងាយប្រមាណ២៥គីឡូម៉ែត្រ ។ គាត់ឈ្មោះ កាញ់ សូត្រ អាយុ៥២ឆ្នាំ ជនជាតិគ្រឹង ប្រពន្ធឈ្មោះ ថាច់ ណាយ អាយុ៤៦ឆ្នាំ ជាជនជាតិទំពួន មានកូនក្នុងបន្ទុកចំនួន៤នាក់(ប្រុស១ស្រី៣) រស់នៅភូមិប្រាក់ ឃុំល្អក់ ស្រុកអូរជុំ ។
បុរសពិកាភ្នែករូបនេះបានឲ្យអ្នកសារព័ត៌មានដឹងថា ក្រុមគ្រួសាររបស់គាត់រស់នៅសព្វថ្ងៃនេះមានការលំបាកខ្វះសព្វខ្វះគ្រប់ដោយសារកូនរៀនទាំង៤នាក់ ហើយគាត់ជាឪពុករកលុយកាក់ចូលផ្ទះតិចតួចបំផុត ព្រោះជាជនពិការភ្នែកទាំង២ ។ បើពឹងទៅលើការធ្វើស្រែចម្ការក៏ហូបចុកនៅក្នុងក្រុមគ្រួសារមិនគ្រប់គ្រាន់ដែរ ព្រោះមានដី២ហិកតាគាត់ធ្វើស្រែផងធ្វើចម្ការផង ។ ឯបន្លែដែលគាត់យកមកលក់នៅផ្សារបានលុងនេះ គឺមានតែដើមចេកនិងបន្លែដុះតាមជ្រោះតាមអូរ ដែលកូននិងប្រពន្ធរបស់គាត់ដើរដកយកមកផ្ទះដើម្បីឱ្យគាត់យកមកលក់នៅឯផ្សារ។ បុរសចំណាស់ពិការភ្នែកទាំង២រូបនេះបញ្ជាក់ថា ប្រពន្ធនិងកូនរបស់គាត់មិនចេះមកផ្សារទេ ។
ប្រជាពលរដ្ឋនៅស្រុកអូរជុំបានឱ្យដឹងថា ជារៀងរាល់ថ្ងៃ គេឃើញបុរសពិការភ្នែកម្នាក់នេះស្ពាយកាផាដាក់បន្លែផ្លែឈើតិចតួចយកមកលក់នៅផ្សារ បានប្រាក់ប្រមាណពី៥.០០០រៀលទៅ១០.០០០រៀលប៉ុណ្ណោះ ។ នេះដោយសារជីវិតទើបគាត់ខំប្រឹងប្រែងទាំងក្តៅ ទាំងរងា និងភ្លៀងរលឹមមិនដែលឈប់សម្រាកថ្ងៃណាឡើយ ។
បុរសពិការរូបនេះប្រាប់អ្នកសារព័ត៌មានឱ្យដឹងថា កន្លងមកធ្លាប់មានអាជ្ញាធរចុះចែកអំណោយដែរ តែគ្រួសារគាត់ពំុដែលបានទទួលនឹងគេទេ ៕
ចែករំលែកព័តមាននេះ