ប្រទេសថៃ ៖ ចំនួនជនក្រីក្រក្នុងប្រទេសថៃបានធ្លាក់ចុះពី៧,១លាននាក់ក្នុងឆ្នាំ២០១៤ មកត្រឹម៤,៩លាននាក់កាលពីឆ្នាំមុន ខណៈការលូតលាស់សេដ្ឋកិច្ចរបស់ប្រទេសនេះ និងគោលនយោបាយរដ្ឋាភិបាលជួយដំឡើងប្រាក់បៀវត្ស ។
តាមការស្ទង់មតិរបស់ក្រុមប្រឹក្សាអភិវឌ្ឍន៍សេដ្ឋកិច្ច និងសង្គមជាតិ (NESDB) ឲ្យដឹងថា ចំនួនជនក្រីក្របានធ្លាក់ចុះមកត្រឹម៧,២%ប៉ុណ្ណោះនៃប្រជាជនទាំងអស់ ។
NESDB និយាយថា កាលពីឆ្នាំ២០១៣ ខ្សែបន្ទាត់នៃភាពក្រីក្ររបស់ប្រទេសថៃ គឺស្មើនឹង៧២,៣ដុល្លារក្នុងមួយខែ ឯឆ្នាំ២០១៤ ស្មើនឹង៧៤,៣២ដុល្លារក្នុងមួយខែ និងឆ្នាំ២០១៥ ស្មើនឹង៧៤,២៤ដុល្លារ ។
លោក Porametee Vimolsiri លេខាធិការរបស់ NESDB ថ្លែងថា ៖ « ការលូតលាស់សេដ្ឋកិច្ចរបស់ប្រទេសថៃបានកើនពី០,៨%ក្នុងឆ្នាំ២០១៤ ដល់២,៨%ក្នុងឆ្នាំ២០១៥ ដោយរដ្ឋាភិបាលបានចេញគោលនយោបាយជាច្រើនក្នុងការទប់ទល់នឹងភាពក្រីក្រ និងវិសមភាពសេដ្ឋកិច្ច » ។
លោក Porametee បន្តថា ៖ « ទោះជាមានការកើនឡើងនៃប្រាក់បៀវត្សក្តី ក៏ចន្លោះសេដ្ឋកិច្ចនៅតែបន្តមានយ៉ាងខ្ពស់ ។ បញ្ហានេះមកពីអ្នកមានទ្រព្យសម្បតិ្ត គឺជាម្ចាស់កម្មសិទ្ធិដីជាច្រើន ហើយពួកគេក៏អាចទទួលបានសេវាកម្មដ៏មានគុណភាពខ្ពស់ជាងជនក្រីក្រផងដែរ ។ បញ្ហានេះអាចនឹងជំរុញឲ្យកាន់តែធ្ងន់ធ្ងរដោយទំនើបកម្មនៃបច្ចេកវិទ្យា ការឡើងកម្តៅពិភពលោក និងការកើនឡើងនៃប្រជាជនមានអាយុច្រើន » ។
NESDB ឲ្យដឹងទៀតថា ការងារក្នុងវិស័យកសិកម្មបានធ្លាក់ចុះ៦ត្រីមាសជាប់ៗគ្នាមកហើយព្រោះការធ្លាក់ចុះនៃសកម្មភាពកសិកម្ម និងការប៉ះពាល់ពីទឹកជំនន់ជាដើម ប៉ុន្តែការងារក្នុងវិស័យផ្សេងៗដូចជា សំណង់ ការលក់ដុំនិងរាយ សណ្ឋាគារនិងភោជនីយដ្ឋាន បែរជាកើនឡើងទៅវិញ ៕
ចែករំលែកព័តមាននេះ