រាជធានីភ្នំពេញ ៖ ក្រុមហ៊ុនកូកា-កូឡា ដែលបានវិនិយោគនៅកម្ពុជាតាំងពីឆ្នាំ១៩៩៣មកនោះ ពេលនេះបានបង្កើនទំហំសង្វាក់ផលិតកម្ម ដោយវិនិយោគបន្ថែម១០០លានដុល្លារទៀតដើម្បីបង្កើតរោងចក្រនៅក្នុងតំបន់សេដ្ឋកិច្ចពិសេសភ្នំពេញ ហើយត្រូវបានសម្ពោធជាផ្លូវការកាលពីថ្ងៃទី៥ ធ្នូ ម្សិលមិញ ។
ថ្លែងក្នុងពិធីសម្ពោធនេះដែរ សម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា មានប្រសាសន៍ថា កម្ពុជាមានសក្តានុពល និងនយោបាយមិនរើសអើងដែលកំពុងទាក់ទាញវិនិយោគទុនបរទេស ។ កម្ពុជាមានមោទនភាពដែលក្រុមហ៊ុនកូកា-កូឡាបានដាក់អក្សរខ្មែរលើកំប៉ុងភេសជ្ជៈ ។ ទន្ទឹមនឹងនេះ ក្រុមហ៊ុនកូកា-កូឡាកម្ពុជា មិនត្រឹមតែបម្រើសេចក្តីត្រូវការក្នុងប្រទេសប៉ុណ្ណោះទេ ប៉ុន្តែក៏អាចនាំចេញទៅបណ្តាប្រទេសអាស៊ានដែលមានប្រជាជនជាង៦០០លាននាក់ ហើយក្រុមហ៊ុនក៏បានរួមចំណែកជួយបណ្តុះបណ្តាលធនធានមនុស្ស និងចូលរួមផ្សព្វផ្សាយអំពីសុវត្ថិភាពចរាចរណ៍នៅកម្ពុជាផងដែរ ។
សម្ដេចថ្លែងថា ៖ « ខ្ញុំសូមលើកទឹកចិត្ត និងសរសើរដល់ក្រុមហ៊ុនកូកា-កូឡា ដែលចាប់ផ្ដើមវិនិយោគតាំងពីតូចទៅធំ និងប្រើប្រាស់កម្លាំងពលកម្មជាជនជាតិកម្ពុជាយើងចំនួន៩៩,៧ភាគរយ ។ ដូច្នេះ វាជាការលើកទឹកចិត្តធំណាស់សម្រាប់ការប្រើប្រាស់ និងការបណ្ដុះបណ្ដាលធនធានមនុស្សនៅក្នុងស្រុក ។ មិនត្រឹមតែប៉ុណ្ណោះ ក្រុមហ៊ុនបានបង្កើតជាលំនៅឋានស្នាក់នៅសម្រាប់កម្មករ-កម្មការិនីដោយមានតម្លៃសមរម្យ ជាផ្នែកមួយជួយដោះស្រាយការលំបាកសម្រាប់កម្មករ-កម្មការិនីដែលមកស្នាក់នៅ និងធ្វើការនៅទីក្រុងភ្នំពេញនេះ » ។
រោងចក្រនេះបានផ្តល់ការងារដល់ប្រជាពលរដ្ឋកម្ពុជាជាង៨១៧នាក់ និងបង្កើតការងារដោយប្រយោលជាច្រើនផ្សេងទៀតតាមការផ្គត់ផ្គង់ចំណីអាហារ សេវាដឹកជញ្ជូន និងការស្នាក់នៅជាដើម ។
ក្នុងឱកាសនោះ សម្ដេចតេជោ ហ៊ុន សែន ក៏បានថ្លែងបញ្ជាក់អំពីប្រាក់បៀវត្សរបស់កម្មករ-កម្មការិនីរោងចក្រកាត់ដេរ និងស្បែកជើងផងដែរថា ចាប់ពីខែមករា ឆ្នាំ២០១៧ តទៅ ប្រាក់ខែកម្មករ-កម្មការិនីរោងចក្រកាត់ដេរ និងស្បែកជើង នឹងឡើងដល់១៥៣ដុល្លារអាមេរិកក្នុង១ខែ ។ ទោះបីយ៉ាងណា សម្ដេចតេជោក៏បានស្នើឲ្យអាជ្ញាធរពាក់ព័ន្ធធ្វើការជាមួយម្ចាស់ផ្ទះជួលនានា ដើម្បីចាត់វិធានការកុំឲ្យពួកគេដំឡើងថ្លៃឈ្នួលផ្ទះ ថ្លៃទឹក និងភ្លើងជាដើម ដើម្បីឲ្យកម្មករ-កម្មការិនីទទួលបានប្រាក់បៀវត្សពិតប្រាកដដែលរាជរដ្ឋាភិបាលដំឡើងជូន ៕
ចែករំលែកព័តមាននេះ