ផ្សារទំនើបសូរិយានឹងទាក់ទាញជាងមុន ក្រោយបញ្ចប់ការកែលម្អ
រាជធានីភ្នំពេញ ៖ អ្នកជំនាញរំពឹងថា ផ្សារទំនើបសូរិយា នឹងកាន់តែមានភាពទាក់ទាញជាងមុន បន្ទាប់ពីផ្សារនេះបញ្ចប់ការកែលម្អទាំងស្រុងនៅត្រីមាសទី១ ឆ្នាំ២០១៧ខាងមុខ ។
រាជធានីភ្នំពេញ ៖ អ្នកជំនាញរំពឹងថា ផ្សារទំនើបសូរិយា នឹងកាន់តែមានភាពទាក់ទាញជាងមុន បន្ទាប់ពីផ្សារនេះបញ្ចប់ការកែលម្អទាំងស្រុងនៅត្រីមាសទី១ ឆ្នាំ២០១៧ខាងមុខ ។
នាយកប្រតិបត្តិផ្សារទំនើបសូរិយា លោក ខាប់ រិទ្ឋី បានថ្លែងឲ្យដឹងកាលព្រឹកថ្ងៃទី៥ ធ្នូ ថា ការកែលម្អផ្សារទំនើបនេះសម្រេចបានជិត៥០%ហើយ ដោយគិតរហូតមកទល់ពេលនេះ។ ការកែលម្អទើបតែបញ្ចប់ដំណាក់កាលទី១ និងអនុញ្ញាតឲ្យមានការចូលរៀបចំតូបនៅក្នុងខែវិច្ឆិកា ។ ការកែលម្អផ្សារក្នុងដំណាក់កាលទី២ បានចាប់ផ្ដើមក្នុងខែធ្នូនេះ ហើយគ្រោងនឹងបញ្ចប់ក្នុងរយៈពេល៣ខែ ។ ចំណែកដំណាក់កាលទី៣ នឹងចាប់ផ្តើមនៅខែមករា ឆ្នាំ២០១៧ខាងមុខ ដោយគ្រោងនឹងបញ្ចប់ក្នុងរយៈពេល២ខែ ។
ការកែលម្អដំណាក់កាលទី១ គឺចាប់ផ្តើមពីជាន់ផ្ទាល់ដីដល់ជាន់ទី៤ និងដំណាក់កាលទី២ចាប់ផ្តើមពីជាន់ដដែល ព្រោះការកែលម្អនេះធ្វើឡើងមួយចំហៀងម្តង ។ ចំណែកដំណាក់កាលទី៣ នឹងមានការរៀបចំខ្លោងទ្វារចូលថ្មី និងកែលម្អផ្នែកខាងមុខឲ្យកាន់តែមានសោភ័ណភាព ។
លោក ខាប់ រិទ្ឋី បន្តថា នៅជាន់ទី១ នឹងមានការរៀបចំកន្លែងលក់អាហារ ភេសជ្ជៈ និងគ្រឿងអលង្ការ ។ ជាន់ទី២ លក់ផលិតផល សម្លៀកបំពាក់បុរស និងកន្លែងលេងសម្រាប់កុមារ។ ជាន់ទី៣ ជាកន្លែងលក់ផលិតផលទាក់ទងនឹងព័ត៌មានវិទ្យា និងអេឡិកត្រូនិក ។ ជាន់ទី៤ រៀបចំជាផ្សារទេសចរណ៍ដែលមានលក់ចម្លាក់ឈើ ថ្ម និងវត្ថុអនុស្សាវរីយ៍ និងជាន់ទី៥ ជាកន្លែងកម្សាន្ត ដែលមានការរៀបចំរោងភាពយន្តធំជាងមុន និងមានកន្លែងហាត់ប្រាណផងដែរ ។ សម្រាប់ជាន់ទី៦ដល់ទី៨ គឺមិនមានការកែលម្អនោះទេ ដោយសារមានក្រុមហ៊ុនផ្សេងបានជួលជាន់ទាំងនេះសម្រាប់ភោជនីយដ្ឋានរបស់ខ្លួនរួចហើយ ។
លោកបន្តថា ៖ « បច្ចុប្បន្ន ចំនួនអតិថិជនចូលផ្សារទំនើបនេះបានធ្លាក់ចុះ ដោយសារយើងស្ថិតក្នុងដំណាក់កាលជួសជុល ។ ប៉ុន្តែខ្ញុំរំពឹងថា ក្រោយការកែលម្អផ្សារ អតិថិជននឹងកើនឡើង ដោយសារផ្សារនេះស្ថិតនៅទីតាំងល្អ គេស្គាល់ជាយូរមកហើយ និងការតុបតែងផ្សារមានភាពទាក់ទាញជាងមុន។ យើងក៏បានរៀបចំបទបញ្ជាផ្ទៃក្នុង និងកិច្ចសន្យាថ្មីជាមួយអាជីវករក្នុងផ្សារនេះផងដែរ ដោយតម្រូវឲ្យពួកគេរៀបចំទំនិញឲ្យមានរបៀបរៀបរយ និងមានការដាក់តម្លៃលើទំនិញនីមួយៗច្បាស់លាស់ ព្រោះការកំណត់តម្លៃទំនិញ គឺជាគោលដៅចម្បងរបស់យើង » ។
អ្នកនាង អាន សុធីតា នាយិកាក្រុមហ៊ុនCBRE Cambodia បានថ្លែងថា ផ្សារទំនើបនៅកម្ពុជាមានតម្រូវការច្រើននៅឡើយ ដោយសារទំហំទីផ្សារទំនើបធៀបជាមួយមនុស្សម្នាក់ គឺមានទំហំតូច បើធៀបនឹងប្រទេសជិតខាង ។ ប៉ុន្តែស្របពេលចំនួនផ្សារទំនើបកើនឡើងកាន់តែច្រើន តម្រូវឲ្យផ្សារទំនើបតូចៗរៀបចំប្រព័ន្ធនៃការលក់របស់ពួកគេ និងឌីសាញឲ្យមានភាពទាក់ទាញជាងមុនដើម្បីទាក់ទាញអតិថិជន ។
ផ្សារទំនើបតូចៗនៅរាជធានីភ្នំពេញ បានប្រឈមមុខនឹងការប្រកួតប្រជែងកាន់តែតានតឹង និងបាត់អតិថិជនមួយចំនួនផងដែរ ចាប់តាំងពីផ្សារទំនើប AEON MALL ទី១ បានបើកដំណើរការកាលពីឆ្នាំ២០១៤កន្លងមក ។
គួរបញ្ជាក់ថា ផ្សារធំៗ បូករួមទាំងផ្សាររដ្ឋ ផ្សារឯកជន និងផ្សារមីនីម៉ាតនៅរាជធានីភ្នំពេញមានចំនួនជិត៤០០ទីតាំង និងដេប៉ូលក់ដូរនានានៅតាមផ្ទះមានប្រមាណ២០ម៉ឺនទីតាំងទៀត ។ នេះបើតាមមន្ត្រីរដ្ឋបាលរាជធានីភ្នំពេញ ។
មន្ត្រីដដែលបន្តថា ផ្សារធំៗ និងមីនីម៉ាតនៅរាជធានីភ្នំពេញ ដែលបានចុះបញ្ជីត្រឹមត្រូវមានចំនួន៣៩២ទីតាំង ក្នុងនោះផ្សាររបស់រដ្ឋមានចំនួន២៥គឺ ផ្សារអូរឫស្សី ផ្សារទួលទំពូង ផ្សារបឹងកេងកង ផ្សារអូឡាំពិក ផ្សារកាប់គោ ផ្សារកណ្តាល ផ្សារចាស់ រដ្ឋាករស្វ័យតផ្សារធំថ្មី ផ្សារដេប៉ូ ផ្សារដើមគ ផ្សារសាមគ្គី ផ្សារទួលគោក ផ្សារបន្លែមានជ័យ ផ្សារច្បារអំពៅ ផ្សារបឹងទំពុន ផ្សារស្ទឹងមានជ័យ ផ្សារចាក់អង្រែ ផ្សារទឹកថ្លា ផ្សារជម្ពូវ័ន ផ្សារស៊ិនជូរីផ្លាហ្សា ផ្សារពោធិ៍ចិនតុង ផ្សារទួលសង្កែ ផ្សារច្រាំងចំរេះ ផ្សារគីឡូម៉ែត្រលេខ៦ និងផ្សារព្រែកលៀប ។
ចំណែកផ្សារឯកជន និងផ្សារទំនើបមានចំនួន៤៩ទីតាំង ផ្សារមីនីម៉ាតមានជិត៤០០ទីតាំង និងផ្សារចាត់តាំងមាន២០ទីតាំងដូចជា ផ្សារ៧មករា ផ្សារទួលស្វាយព្រៃ ផ្សារបឹងព្រលឹត ផ្សារមាន់អាំង ផ្សារផ្លូវរថភ្លើង ផ្សារភូមិសាមគ្គី ផ្សារថ្នល់បត់ ផ្សារដីហុយ ផ្សារត្រពាំងឈូក និងផ្សារអូដឹមជាដើម ។
មន្ត្រីរដ្ឋបាលរាជធានីភ្នំពេញអះអាងថា ទាំងដេប៉ូ និងការលក់ដូរនៅតាមផ្ទះបានកើនឡើងច្រើនសម្រាប់រាជធានីភ្នំពេញ ជាពិសេស នៅម្តុំផ្សារធំថ្មី ផ្សារកណ្តាល ផ្សារចាស់ ផ្សារអូឡាំពិក និងផ្សារទួលទំពូងជាដើម គឺតាមផ្ទះ ស្ទើរតែ១០០% ហើយអាជ្ញាធររាជធានីភ្នំពេញបាននិងកំពុងរៀបចំសណ្តាប់ធ្នាប់តាមផ្សារនានាឲ្យមានរបៀបរៀបរយទាំងផ្សាររដ្ឋ និងឯកជន ជាពិសេស បញ្ហាចំណតយានជំនិះតែម្តង ៕
ចែករំលែកព័តមាននេះ