រាជធានីភ្នំពេញ ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា មានប្រសាសន៍អំពាវនាវចំពោះក្មួយៗកម្មករកម្មការិនីដែលធ្វើការនៅរោងចក្ររបស់អាមេរិក មិនថា រោងចក្រកូកាកូឡា រោងចក្ររបស់អាមេរិកនៅកន្លែងធ្វើការណាក៏ដោយ សូមកុំរអើលខ្លួនទៅនឹងការបំផុសរបស់មនុស្សខ្លះដែលថា អនាគតប្រធានាធិបតី ដូណាល់ ត្រាំ និងអនុវត្តគោលនយោបាយគាំពារនិយម ហើយអាចនឹងកាត់បន្ថយការវិនិយោគចេញក្រៅប្រទេស ។ កុំរអើលខ្លួន ។
សម្តេចតេជោនាយករដ្ឋមន្ត្រី ហ៊ុន សែន មានប្រសាសន៍បែបនេះ នាព្រឹកថ្ងៃទី៥ ខែធ្នូ ២០១៦ ក្នុងឱកាសអញ្ជើញជាអធិបតីដ៏ខ្ពង់ខ្ពស់ ក្នុងពិធីសម្ពោធដាក់ឱ្យដំណើរការជាផ្លូវការរោងចក្រផលិតភេសជ្ជៈកូកាកូឡា របស់ក្រុមហ៊ុនភេសជ្ជៈកម្ពុជា ដែលមានទីតាំងស្ថិតនៅតំបន់សេដ្ឋកិច្ចពិសេសក្នុងភូមិសាស្ត្រសង្កាត់កន្ទោក សង្កាត់ភ្លើងឆេះរទេះ និងសង្កាត់បឹងធំ ខណ្ឌពោធិ៍សែនជ័យ ដោយធ្វើការបណ្តាក់ទុនវិនិយោគ ១០០លានដុល្លារ ក្នុងការសាងសង់រោចក្រថ្មីនេះ ។
សម្តេចតេជោនាយករដ្ឋមន្ត្រីសង្ឃឹមថា ក្មួយៗកម្មករកម្មការិនី នឹងបន្តការខិតខំ និងអ្នកគ្រប់គ្រងរោងចក្រជាជនជាតិអាមេរិក និងអ្នកដែលទទួលខុសត្រូវជាបន្តបន្ទាប់ផ្នែកនីមួយៗក៏ត្រូវយកចិត្តទុកដាក់ បញ្ហាបំពេញឱ្យគ្នារវាងថៅកែ និងកម្មករ គឺជារឿងចាំបាច់ខ្លាំងណាស់ ។
បើសិនថៅកែរោងចក្រយកចិត្តទុកដាក់កម្មករកម្មការិនីមានសុខភាពល្អ មានជីវភាពល្អ ធ្វើការកាន់តែប្រសើរ ដើម្បីឱ្យផលិតផលរបស់រោងចក្រកាន់តែមានប្រសិទ្ធភាព កាន់តែទទួលបានទិន្នផលខ្ពស់ មានការបំពេញឱ្យគ្នាយ៉ាងដូច្នោះ នោះថៅកែក៏ដំឡើងប្រាក់ឱ្យកម្មករកម្មការិនីដែរ ។ គឺវាបំពេញគ្នា មិនអាចយកបញ្ហាដោះស្រាយណាមួយតាមរបៀបបាតុកម្ម ហើយដោះស្រាយរហូតដល់ឆេះរោងចក្រ ។
សម្តេចតេជោបានសង្កត់ធ្ងន់ថា ដល់ពេលឆេះរោងចក្រទៅ អ្នកណាជាអ្នកអត់ការងារធ្វើ ? ឆ្នាំងបាយរបស់កម្មករកម្មការិនីត្រូវបែកមុនគេ ។
លោកប្រធានរោងចក្រ អនុប្រធាន គាត់មិនងាប់ទេ គាត់ត្រឡប់ទៅស្រុកគាត់វិញ គាត់ក៏មិនអីដែរ តែអ្នកដែលអត់ការងារធ្វើ គឺកម្មករកម្មការិនីទាំងអស់ត្រូវអត់បាយ ដើរទៅរកចុះឈ្មោះនៅកន្លែងថ្មី កន្លែងនេះ កន្លែងនោះ ដល់គេស្គាល់មុខធ្វើបាតុកម្មទៀតនោះគឺចប់ហើយ ។
សម្តេចតេជោមានប្រសាសន៍ថា និយាយយ៉ាងដូច្នេះ គឺមិនមែនចង់បិទមាត់កម្មករកម្មការិនីឱ្យធ្វើការតវ៉ាណាមួយដែលអហិង្សា ដែលមានមូលហេតុសមស្របនោះទេ ។ ខ្ញុំគាំទ្រសិទ្ធិរបស់កម្មករកម្មការិនី ក្នុងការទាមទារអ្វីដែលវាសមហេតុផលហើយមិនប្រើហិង្សា ។
ពាក់ព័ន្ធនឹងបញ្ហាខាងលើ សម្តេចតេជោនាយករដ្ឋមន្ត្រីមានប្រសាសន៍ទៅកាន់លោក វីល្លៀម អេ ហៃធ៍ ឯកអគ្គរដ្ឋទូតសហរដ្ឋអាមេរិកប្រចាំកម្ពុជាថា ខ្ញុំគួរតែស្នើសុំអ្វីម្យ៉ាង បើលោកមិនយល់ទាស់ ។ ព្រោះរបស់ដែលបានកើតឡើងនៅកម្ពុជាបានកើតនៅអាមេរិកហើយ ។ បានសេចក្តីថា នៅកម្ពុជាឱ្យតែក្រោយការបោះឆ្នោតគឺមានបាតុកម្មហើយ ។ លើកនេះក្រោយការបោះឆ្នោតនៅអាមេរិក បាតុកម្មនៅអាមេរិកបានផ្ទុះឡើងច្រើនមិនមែនតូចទេ ។
លោកឯងថា តូចយ៉ាងម៉េច ហើយលោកឯងថាខ្ញុំធំ លោកឯងថាលោកឯងតូច ឥឡូវបើលោកឯងថាតូចលោកអាចផ្តល់រូបថតឱ្យខ្ញុំបានទេ ។ ព្រោះថ្ងៃមុនរឿងគេយកមកប្រៀបធៀបនៅសារព័ត៌មានមួយ (ភ្នំពេញប៉ុស្តិ៍) គេផ្សាយនោះគឺរូបភាពបាតុកម្មនៅភ្នំពេញ ។ ហើយនេះជារូបភាពបាតុកម្មនៅអាមេរិក គេដាក់ស្ត្រីម្នាក់ពាក់វ៉ែនតាខ្មៅដើរយ៉ាងសង្ហាក្នុងពេលដែលព័ត៌មានផ្សាយយ៉ាងចំហ អំពីការបង្ក្រាបយ៉ាងឃោរឃៅនៃប៉ូលិសរបស់អាមេរិកទៅលើបាតុករ ចាប់រាប់ពាន់នាក់ ។
លោកឯកអគ្គរដ្ឋទូតថា រឿងនេះតូចទេ លោកជួយផ្តល់ឯកសារបានទេ? ខ្ញុំមានហើយតែខ្ញុំចង់ដឹងថា តើទូតអាមេរិកដែលតាំងខ្លួនជាបិតាប្រជាធិបបតេយ្យ និងមាតានៃសិទ្ធិមនុស្សនេះហ៊ានបញ្ចេញការពិតឬទេ? សូម្បីលោក ដូណាល់ ត្រាំ ដែលពេលនោះជាបេក្ខជនប្រធានាធិបតី មិនទាន់ជាប់ឆ្នោត គាត់ហ៊ាននិយាយឱ្យក្បាលម៉ាស៊ីនឃោសនារបស់អាមេរិកមួយចំនួនថា បើប្រព័ន្ធឃោសនានៅអាមេរិកវាលម្អៀងហើយ ទម្រាំប្រព័ន្ធឃោសនាអាមេរិកនៅកម្ពុជាវាលម្អៀងដល់ណាទៀត ។
លោកត្រូវមើលប្រទេសរបស់លោកផង កុំនិយាយតែពីគេ កាលពីថ្ងៃមុនខ្ញុំនិយាយនៅសៀមរាប សង្ឃឹមថា លោកស្តាប់បានហើយព្រោះលោកចេះខ្មែរដែរ ។
សម្តេចតេជោបានលើកទៀតថា តើវាយុត្តិធម៌ទេ សម្រាប់ប្រព័ន្ធផ្សព្វផ្សាយនៅកម្ពុជា? ម្ខាងមិនបានចុះរូបភាពអំពីការបង្ក្រាបដ៏ឃោរឃៅនៃប៉ូលិសអាមេរិកចំពោះបាតុករដែលប្រឆាំងនឹងលទ្ធផលបោះឆ្នោត តែបែរជាយកស្ត្រីម្នាក់ដើររបៀបទេសចរណ៍នៅមាត់សមុទ្រទៅវិញ ហើយដាក់ឱ្យរូបភាពការរារាំងបាតុកម្មនៅភ្នំពេញ ។
សម្តេចសុំស្នើលោកឯកអគ្គរដ្ឋទូតអាមេរិក កត់ត្រាឱ្យច្បាស់នូវសម្តីអ្នកវិភាគ និងតំណាងសិទ្ធិមនុស្សមួយចំនួនដែលបាននិយាយជាមួយសារព័ត៌មានឱ្យច្បាស់ថា ការបង្ក្រាបនៅអាមេរិក គឺត្រឹមត្រូវនិងមិនរំលោភសិទ្ធិមនុស្ស បានកុំមានស្តង់ដារពីរលោក ។
ខ្ញុំសង្ឃឹមថា អ្វីដែលរាជរដ្ឋាភិបាលកម្ពុជាធ្វើកន្លងមកអត់ខុសទេ ដើម្បីការពារសណ្តាប់ធ្នាប់សម្រាប់ប្រទេសមួយ រាជរដ្ឋាភិបាលត្រូវតែធ្វើ ដូច្នេះអ្វីដែលបានកើតឡើងនៅអាមេរិកកាលពីខែមុនវាអត់ខុស នៅកម្ពុជាក៏វាអត់ខុសដូចគ្នាដែរ ។ ព្រោះគេយកហេតុផលថា ការធ្វើបាតុកម្មខុសច្បាប់ គេបង្ក្រាបហើយ អត់ទាក់ទងនឹងរំលោភសិទ្ធិមនុស្សទេ ។ ខ្ញុំមិនចូលចិត្តនិយាយដើមគេពីចម្ងាយទេ ឥឡូវបានជួបមុខទូតអាមេរិកហើយ និយាយមុខទូតអាមេរិកតែម្តង ។ ប៉ូលិសអាមេរិកបង្ក្រាបគេថាបង្ក្រាបត្រឹមត្រូវ អត់រំលោភសិទ្ធិមនុស្សទេ ព្រោះដើម្បីការពារសណ្តាប់ធ្នាប់ប្រទេសអាមេរិក ។
ដល់កម្ពុជាវិញរារាំង ដើម្បីរក្សាសណ្តាប់ធ្នាប់កម្ពុជាវាទៅជារំលោភសិទ្ធិមនុស្ស ។ អ៊ីចឹងអាមេរិក ដើរសម្លាប់អ្នកណាក៏អត់ខុសដែរ រាប់ទាំងសម្លាប់ប្រជាជនខ្មែរ ប្រើប្រាស់គ្រាប់បែក២,៧លានតោន ក៏នៅតែអត់ខុសអាមេរិកដែរ ។
ម្យ៉ាងទៀតខ្ញុំសូមរំឭក និងអរគុណដល់លោកឯកអគ្គរដ្ឋទូតថា តាមរយៈលោកទេសរដ្ឋមន្ត្រី ប្រាក់ សុខុន លោកបានប្រាប់ថា សម្តេចគួរតែកុំនិយាយអី ខ្ញុំអរគុណលោកឯកអគ្គរដ្ឋទូត…។ សម្តេចមានប្រសាសន៍ថា ដូណាល់ ត្រាំ គឺដូណាល់ត្រាំឈ្នះមែនហើយ បើលោកឯកអគ្គរាជទូតចង់រៀនអំពីគន្លឹះក្នុងការវាយតម្លៃ ខ្ញុំនឹងប្រាប់លោកឯកអគ្គរដ្ឋទូតដោយឡែក ។
សម្តេច ខ្ញុំអត់លូកដៃនោះទេ ប៉ុន្តែខ្ញុំសូមរំឭកមនុស្ស២នាក់ ដោយហេតុតែចង់វ៉ៃក្បាលខ្ញុំ ខេមបូឌាដេលី យកមកផ្សាយឡើងវិញ ផ្សាយគ្រប់ទំព័រសារព័ត៌មាន ដែលនិយាយភាសាខ្មែរ (ខ្ញុំអំពាវនាវដើម្បីរំឭកសម្តី) ។
អ្វីដែលគួរកត់សម្គាល់នៅត្រង់ថា នៅពេលដែលខ្ញុំថា ដូណាល់ ត្រាំ ឈ្នះគេព្រមានដូណាល់ ត្រាំ គេប្រើពាក្យថាសត្វ ដែលមានរោមដូចគ្នា វានៅក្នុងសម្បុកជាមួយគ្នាបាន ។ ដូណាល់ ត្រាំ គឺជាមនុស្សផ្តាច់ការដោយសារមានលុយ ។ ឯហ៊ុន សែន គឺជាមនុស្សផ្តាច់ការដោយសារអាវុធផង និងដោយលុយផង ។ គួរឱ្យខ្មាសអៀនណាស់ ។
មួយទៀត លោក អៀ សុផល លោកកំពុងនៅអាមេរិក ជាសាស្ត្រាចារ្យផ្នែកការទូតផង លោកបាននិយាយថា ប្រសិនបើដូណាល់ ត្រាំ ឈ្នះឆ្នោត គឺវាជាយុគសម័យនៃការរះឡើងនៃពួកអវិជ្ជា ។ គឺចរិតដូចគ្នាណាស់រវាងហ៊ុន សែន និងដូណាល់ត្រាំ មានពូទីន មានមូហ្កាបេ គាំទ្រ…។ បើពួកអវិជ្ជាធ្វើប្រធានាធិបតីអាមរិក សូម្បីតែលោកឯងគួរតែលាលែងដែរ ។ ចង់វ៉ៃក្បាលហ៊ុន សែន មិនត្រូវក្បាលហ៊ុន សែន បែរជាត្រូវក្បាលដូណាល់ ត្រាំ វិញ ។
សម្តេចសូមរំឭក សម្តេចអត់បាននិយាយអំពីបញ្ហាពាក់ព័ន្ធនឹងរិះគន់លោកជំទាវ ហ៊ី ឡារី គ្លីនតុន ទេ ហើយក៏អត់បាននិយាយនយោបាយគាំទ្រអ្នកណាអីដែរ ក៏ប៉ុន្តែគ្រាន់តែយកមកវិភាគមួយថា នឹងមានការធូរស្រាលនៅក្នុងពិភពលោកមួយដែលកំពុងមានការតានតឹងរវាងមហាអំណាចនុយក្លេរអ៊ែរ ។ បញ្ហាកូរ៉េខាងជើងជារឿងមួយកំពុងតែស្មុគស្មាញទៅហើយ បញ្ហានុយក្លេរអ៊ែរ នៅអ៊ីរ៉ង់ ។ ខ្ញុំវិភាគខ្លាំងណាស់ ។
ខ្ញុំមិនមែនសាស្ត្រាចារ្យការទូតដូចលោក អៀ សុផល ទេ ក៏ប៉ុន្តែខ្ញុំធ្វើទូតជិត៣៨ឆ្នាំ ខ្ញុំជាប្រធានយុវជនកម្ពុជា ចាប់ផ្តើមពីថ្ងៃ៣ ធ្នូ ពេលនោះបង្កើតរណស្សិរសាមគ្គីសង្រ្គោះជាតិកម្ពុជា និងទទួលបន្ទុកកិច្ចការមហាជនទាំងអស់ និងកិច្ចការបរទេសតាំងពីខ្ញុំអាយុ២៦ឆ្នាំ ។ ដូច្នេះខ្ញុំមានហេតុផលគ្រប់គ្រាន់ដើម្បីអះអាងថា ដូណាល់ ត្រាំ ឈ្នះ ។ ដូណាល់ ត្រាំ ឈ្នះសភាពការណ៍ វានឹងធូរស្រាល នេះជាសិទ្ធិនិយាយរបស់ខ្ញុំ ប៉ុន្តែតើហេតុអ្វីបានជាគេគិតថា១០០ភាគរយ ដូណាល់ ត្រាំ ចាញ់ បានគេហ៊ានវាយតម្លៃថា ដូណាល់ ត្រាំ ជាពួកអវិជ្ជា ។
សម្តេចបញ្ជាក់ថា ឥឡូវបើខ្ញុំជា អៀ សុផល វិញ ខ្ញុំចាកចេញពីអាមេរិកភ្លាម ។ ខ្ញុំគ្រាន់តែរំឭកទេ ប៉ុន្តែមនុស្សយើងកុំឱ្យជ្រុលនិយម កុំមើលសម្បកក្រៅ ។
លោកឯកអគ្គរដ្ឋទូត ដែលនិយាយភាសាខ្មែរគឺខ្ញុំគោរព និយាយឱ្យត្រង់ ខ្ញុំគោរពលោកពីរឿងសេដ្ឋកិច្ច ប៉ុន្តែលោកទាយខុស ព្រោះលោកអត់មានតំណាងឱ្យអ្នកណា លោកតំណាងឱ្យអាមេរិក មិនមែនតំណាងឱ្យ Democrate ក៏មិនតំណាងឱ្យ Republic ដែរ លោកតំណាងឱ្យអាមេរិកទាំងមូល ។ អ្នកណាឈ្នះលោកនៅជាទូត ដល់ពេលលោក ដូណាល់ ត្រាំ ធ្វើប្រធានាធិបតីលោកក៏ត្រូវគោរពប្រធានាធិបតីដែរ ។
ដូច្នេះខ្ញុំគិតថា កុំអាមេរិកជាងអាមេរិក កុំដូណាល់ ត្រាំ ជាងដូណាល់ ត្រាំ កុំហ៊ីឡារី គ្លីនតុនជាង ហ៊ីលឡារី គ្លីនតុន …ហើយកុំរអើលខ្លួន ខ្ញុំមិនជឿថា នយោបាយគាំពារនិយមរបស់អាមេរិកនាំមកដល់ផលប្រយោជន៍របស់អាមេរិកទេ ៕
ចែករំលែកព័តមាននេះ