ក្រុងប៉ោយប៉ែត ៖ កាលពីរសៀលថ្ងៃទី១២ កុម្ភៈ អាជ្ញាធរខេត្តបន្ទាយមានជ័យ បាននាំយកអំណោយរបស់សប្បុរសជនមួយចំនួនធំទៅចែកជូនដល់កងកំលាំងផ្នែកសឹករងក្រុងប៉ោយប៉ែត ដែលឈរជើងតាមព្រំដែនកម្ពុជា-សៀមនៅក្រុងប៉ោយប៉ែត ។ ពិធីចែកអំណោយនេះត្រូវបានធ្វើឡើងនៅក្នុងទីបញ្ជាការផ្នែកសឹករង ស្ថិតនៅក្នុងភូមិទួលពង្រ សង្កាត់ប៉ោយប៉ែត ដោយមានការចូលរួមពីលោកអ៊ុង អឿន អភិបាលខេត្តបន្ទាយមានជ័យ និងជាទីប្រឹក្សាផ្ទាល់សម្តេចអគ្គមហាសេនាបតីតេជោហ៊ុន សែន លោកទ្រី ណារិន អភិបាលក្រុងប៉ោយប៉ែត និងអភិបាលរង ព្រមទាំងស្ថាប័នមានសមត្ថកិច្ចពាក់ព័ន្ធ អាជីវករជាម្ចាស់អំណោយ លោកវរសេនីយ៍ទោ បោន ប៊ិន មេបញ្ជាការសឹករងខេត្តប្រចាំទិសប៉ោយប៉ែត និងនាយទាហាន ពលទាហាន ក្រោមឱវាទយ៉ាងច្រើនកុះករផងដែរ ។
លោកអនុសេនីយ៍ឯកស៊ឹង វណ្ណឆ័យ មេបញ្ជាការផ្នែកសឹករងក្រុង បានឱ្យដឹងថា ផ្នែកទាហានសឹករងរបស់លោកទទួលភារកិច្ចការពារបូរណភាពទឹកដីតាមខ្សែក្រវាត់ព្រំដែនកម្ពុជា-សៀមចាប់ពីចំណុច ក៥ រហូតដល់ភូមិស្ទឹងបត់ មានចំនួន១០ចំណុច ហើយមានទ័ពស្មើនឹង៣កងអនុសេនាតូច ។ លោកទ្រី ណារិន អភិបាលក្រុង បានឱ្យដឹងថា ក្រោមការដឹកនាំរបស់លោកអភិបាលខេត្តដែលបានបំផុសចលនាដល់មន្ត្រីគ្រប់ស្ថាប័នពាក់ព័ន្ធ ក្រុមហ៊ុន រួមទាំងអាជីវករមួយចំនួននៅក្នុងខេត្ត និងក្រុងប៉ោយប៉ែត ធ្វើឱ្យមានការបរិច្ចាគថវិកាផ្ទាល់ខ្លួន ក៏ដូចជាគ្រឿងឧបភោគ បរិភោគ និងសំភារផ្សេងៗ ដើម្បីយកទៅឧបត្ថម្ភដល់កងទ័ពដែលកំពុងឈរជើងតាមខ្សែក្រវាត់ព្រំដែនការពារបូរណភាពទឹកដី ។ លោកអភិបាលក្រុងបានបញ្ជាក់ថា អំណោយរបស់សប្បុរសជនទាំងអស់មានថវិកា១២.២៣០.០០០រៀល មី២៤៦កេស ត្រីខ១.០៨០កំប៉ុង ទឹកត្រី១៤៥ដប ទឹកស៊ីអុីវ២៩៤ដប ទឹកបរិសុទ្ធ៥០យួរ វិទ្យុទាក់ទងម៉ាកអាយកូម V8 ចំនួន៤គ្រឿង ស្ករ ប៊ីចេង ខ្ទឹមស និងគ្រឿងឧបភោគ បរិភោគមួយចំនួនទៀត ។ ក្នុងនោះថវិកាត្រូវបានចែកជូនដល់កងទ័ពដោយផ្ទាល់ដៃ ក្នុងម្នាក់ទទួលបាន៦០.០០០រៀល ហើយប្រាក់នៅសល់ចំនួន៤លាន៣សែនរៀលសំរាប់ប្រគល់ឱ្យអង្គភាពសឹករងយកទៅចាត់ចែង ។
លោកអ៊ុង អឿន អភិបាលខេត្តបន្ទាយមានជ័យ បានមានមតិសំណេះសំណាលជាមួយបងប្អូនកងទ័ពថា សូមឱ្យចេះសាមគ្គីគ្នា គោរពវិន័យឱ្យបានខ្ជាប់ខ្ជួន មានអនាម័យល្អដើម្បីសុខភាព និងត្រូវយកចិត្តទុកដាក់ដោយស្មារតីខ្ពស់ក្នុងការការពារបូរណភាពទឹកដីកម្ពុជា ។ លោកអភិបាលខេត្តបានថ្លែងអំណរគុណដល់សប្បុរសជនទាំងអស់ដែលបានចំណាយថវិកាផ្ទាល់ខ្លួនចូលរួមឧបត្ថម្ភលើកទឹកចិត្តដល់កងកំលាំងដែលឈរជើងការពារតាមខ្សែក្រវាត់ព្រំដែននៅក្រុងប៉ោយប៉ែត និងសូមជូនពរឱ្យជួបតែសំណាងល្អគ្រប់ៗគ្នា ។ ក្រោយពីលោកអភិបាលខេត្តសំណេះសំណាលរួច ក្រុមការងារបាននាំគ្នាចុះទៅសួរសុខទុក្ខដល់កងកំលាំងដែលកំពុងឈរជើងនៅទីនោះផងដែរ ៕
ចែករំលែកព័តមាននេះ