រាជធានីភ្នំពេញ ៖ តារាសម្តែងកញ្ញា មាស សម្ជស្ស បានបង្ហាញឱ្យដឹងថា ស្នេហារបស់នាងជាមួយបុរសអ្នកជំនួញហាក់មិនមានភាពរឹងមាំទេ ខណៈពេលអ្នកទាំងពីរសម្រេចចិត្តរស់នៅរួមគ្នា បន្ទាប់ពីភ្ជាប់ពាក្យជិត២ឆ្នាំ ។
មាស សម្ជស្ស បានបង្ហាញសារបង្ហោះតាមហ្វេសប៊ុក កាលពីពេល ថ្មីៗកន្លងមកបង្ហាញពីចំណងស្នេហ៍របស់នាងហាក់នៅមានភាពស្រពេចស្រពិលនៅឡើយ ក្នុងពេលដែលអ្នកទាំងពីរនៅមិនទាន់សម្រេចចូលរោងការនាពេលណាមួយពិតប្រាកដនោះ ។
សាររបស់កញ្ញាមាស សម្ជស្ស មានខ្លឹមសារថា «សប្បាយឬមិនសប្បាយត្រួវតែញញឹម ដើម្បីទទួលអ្វីដែលថ្មី និងភាពជោគជ័យថ្មី វាគួរតែដល់ពេលហើយ ។ អត្ថន័យពិត ន័យជីវិតគឺត្រូវឆ្លងកាត់ទាំងភាពរីករាយ ផ្អែមល្ហែម កម្សត់និងជូរចត់ ហើយអ្វីដែលដោះលែងបានក៏ដោះទៅ អ្វីដែលដាក់ចុះបានក៏ដាក់ទៅ ។ បើយើងយកគ្រប់រឿងយកមកគិត ទីកន្លែងសម្រាប់ក្តីសុខនៃជីវិត វាមានតែការថយចុះ សូមកុំបំផ្លាញក្តីស្រមៃរបស់ខ្លួនដោយសារតែមនុស្សម្នាក់ហ្នឹង » ។
បន្ទាប់ពីបានបង្ហាញសារមួយនេះមក មានប្រិយមិត្តមួយចំនួនឆ្ងល់ហើយ និងជជីកសួរ មាស សម្ជស្ស ជុំវិញមូលហេតុដែលកើតឡើង ប៉ុន្តែត្រូវតារារូបនេះបញ្ជាក់យ៉ាងណាខ្លីថា «មិនមានបញ្ហាអ្វីឡើយ» ។
ថ្លែងប្រាប់កោះសន្តិភាពតាមសារអេឡិកត្រូនិក តារាសម្តែងមាស សម្ជស្ស អះអាងថា ដោយសារមានមិត្តច្រើននៅក្នុងហ្វេសប៊ុក ទើបនាងផុសពាក្យពេចន៍ទាំងនេះ ម្យ៉ាងដោយសារតែនាងគិតច្រើនពេកប៉ុណ្ណោះ ហើយនាងគិតម្នាក់ឯង តាមពិតអត់មានអីទេ ។ « ដោយសារខ្ញុំជាស្រីហើយគិតច្រើន និងមានការទាមទារច្រើននូវភាពកក់ក្តៅ សុភមង្គល និងទាមទារឲ្យអ្នកដែលស្រឡាញ់យើងយកចិត្តទុកដាក់ពីយើង ប៉ុន្តែដោយសារគាត់រវល់ការងារច្រើនពេក ទើបមិនមានពេលគ្រប់គ្រាន់សម្រាប់យើង ហេតុនេះទើបធ្វើឲ្យយើងមានកូនចិត្តមួយតូចចិត្តប៉ុណ្ណោះ »។
ឈានមកដល់ដំណាក់កាលនេះ មាស សម្ជស្ស នៅតែអះអាងថា មង្គលការរបស់ពួកនាងនៅមិនទាន់បានគិតគូរនៅឡើយទេ ដោយទុកពេលរកស៊ីឲ្យលូតលាស់ជាងនេះសិន។
តារាសម្តែងដែលមានចរិតស្រគត់ស្រគំ កញ្ញា មាស សម្ជស្ស បានភ្ជាប់ពាក្យកាលពីអំឡុងឆ្នាំ២០១៤ ជាមួយបុរសអាណិកជនអាមេរិក ដែលមានវ័យជាង៣០ឆ្នាំ បន្ទាប់ពីអ្នកទាំងពីរសាងស្នេហ៍ជាមួយគ្នាយ៉ាងល្អូកល្អិនជាង២ឆ្នាំ ។
អនាគតស្វាមីរបស់កញ្ញាមាស សម្ផស្ស ជាអ្នកជំនួញឈ្មោះ William Louy ។គម្រោងរៀបការរបស់ពួកគេបរាជ័យម្តងរួចមកហើយ បន្ទាប់ពីភ្ជាប់ពាក្យបានមួយឆ្នាំ ៕
ចែករំលែកព័តមាននេះ