ដូចដែលលោកអ្នកបានជ្រាបខ្លះហើយថាជំងឺហ្ស៊ីកាចម្លងមកមនុស្សតាមរយៈមូសខ្លាញី ដែលមានផ្ទុកមេរោគហ្ស៊ីកាខាំ ហើយជាធម្មតាវាខាំនៅពេលព្រឹក ពេលជ្រេរសៀល និងពេលល្ងាច ។ ជំងឺនេះក៏បានស្តែងឲ្យដឹងបន្ទាប់ពីមានការចម្លងរយះពេលពី២ទៅ១២ថ្ងៃ វាអាចនឹងលេចចេញនូវរោគសញ្ញាមួយចំនួនមានដូចជា៖
-គ្រុនក្តៅស្ទីងៗ
-ឈឺក្បាល
-កន្ទួលក្រហមលើស្បែក
-ភ្នែកឡើងក្រហម
-ឈឺសន្លាក់
៨១,៥% គ្មានរោគសញ្ញាស្តែងចេញទេ រោគសញ្ញាស្រដៀងគ្នានឹងគ្រុនឈាម និងគ្រុនឈីក ហើយមកទល់ពេលនេះគ្មានវ៉ាក់សាំងការពារទេ ឬថ្នាំព្យាបាលជំងឺនេះការព្យាបាល ជាការព្យាបាលគាំទ្រវេជ្ជសាស្ត្រ ភាគច្រើនអ្នកជំងឺនឹងជាទៅវិញក្នុងអំឡុងពី២ទៅ៧ថ្ងៃ ព្យាបាលដោយឱសថបំបាត់ការឈឺចាប់ និងឱសថបញ្ចុះកំដៅ សម្រាក និងញ៉ាំទឹកឱ្យបានច្រើន តែប៉ុណ្ណោះ ។
ដើម្បីជៀសផុតពីការកើតមានជំងឺនេះ លោកអ្នកគប្បីបំបាត់ជម្រកមូសឱ្យអស់ ។ ការបំបាត់ជម្រកមូលនេះ មិនត្រឹមតែជៀសផុតពីជំងឺហ្ស៊ីកាប៉ុណ្ណោះទេ ថែមទាំងអាចជៀសផុតពីជំងឺឈីក និងជំងឺគ្រុនឈាមបានថែមទៀតផង ដោយលោកអ្នកគ្រាន់តែអនុវត្តតាមវិធីខាងក្រោមនេះ ៖
-ត្រូវបង្ការកុំឱ្យមូសខ្លាខាំ (មូសដែលមានផ្ទុកវីរុសហ្ស៊ីកាខាំ) ត្រូវដេកក្នុងមុងទាំងថ្ងៃនិងយប់
-លាងពាងឬអាងទឹក
-លុបថ្លុកទឹកដក់
-សំអាតលំនៅដ្ឋាន កុំអោយមានព្រៃស្តុក
-បំបាត់សំបកកំប៉ុង សំបកកង់ឡាន ត្រឡោកដូង
-ស្លៀកពាក់ខោវែង អាវវែង
– ប្រើថ្នាំកុំឱ្យមូសខ្លាមកជិតបាន
-ចិញ្ចឹមត្រីក្នុងពាង ឬអាងទឹកឲ្យសីុដង្កូវទឹក
-ប្រើថ្នាំអាបែតដាក់ក្នុងពាងឬអាងទឹក និងត្រូវគ្របពាងឬអាងទឹកឲ្យជិត ។
អនុវត្តបែបនេះអាចនឹងជៀសផុតពីការកើតមានជំងឺទាំងបីប្រភេទ ជាពិសេសបើសិនជាមានសញ្ញាដូចដែលបានរៀបរាប់ខាងលើនេះ គួរលោកអ្នកប្រញាប់ទៅមណ្ឌលសុខភាព ឬរាយការណ៍ទៅកាន់អជ្ញាធរដែលនៅជិតលោកអ្នក ។ បើលោកអ្នកចង់ដឹងព័ត៌មានលម្អិតទាក់ទងនឹងជំងឺហ្ស៊ីកា អាចទូរស័ព្ទទៅកាន់លេខ១១៥ ដោយឥតគិតប្រាក់ ៕
ចែករំលែកព័តមាននេះ