ខេត្តបន្ទាយមានជ័យ ៖ លោកអ៊ុំឈ្មោះ ឡេង រុន អាយុ៧២ឆ្នាំ នៅភូមិបែកចាន សង្កាត់ម្កាក់ ក្រុងសិរីសោភ័ណ ខេត្តបន្ទាយមានជ័យ នៅវេលាម៉ោង៧ និង៣០នាទីព្រឹក ថ្ងៃទី០៥ ខែធ្នូ ឆ្នាំ២០១៦ បានដើររកជីកកណ្តុរនៅនឹងដំបូកខាងត្បូងភូមិចម្ងាយប្រហែល១.០០០ម៉ែត្រ បានប្រទះឃើញគ្រាប់យុទ្ធភណ្ឌមិនទាន់ផ្ទុះ ក៏រាយការណ៍ជូនសមត្ថកិច្ចនគរបាលប៉ុស្តិ៍រដ្ឋបាលម្កាក់យកមករក្សាទុក។
មន្ត្រីនគរបាលការិយាល័យគ្រប់គ្រងអាវុធជាតិផ្ទុះ និងជាតិពុល បានឲ្យដឹងថា តាមរបាយការណ៍នគរបាលប៉ុស្តិ៍រដ្ឋបាលម្កាក់បានបង្ហាញថា គ្រាប់យុទ្ធភណ្ឌមិនទាន់ផ្ទុះទាំងអស់នោះមានគ្រាប់រ៉ូកែតធុនB40 ចំនួន១១គ្រាប់,អាវុធB40 ចំនួន២ដើម,អាវុធម៉ាកRPD ចំនួន១ដើម,គ្រាប់RPD ចំនួន១០០គ្រាប់,បង់ RPD ចំនួន១,គ្រាប់ AK47ចំនួន១កេស ស្មើ៧០០គ្រាប់,អាវុធ ធុនCKC ចំនួន១ដើម។
មន្ត្រីនគរបាលរូបនោះបានបញ្ជាក់ថា គ្រាប់យុទ្ធភណ្ឌមិនទាន់ផ្ទុះ និងអាវុធទាំងនេះ ត្រូវបានគេកប់ទុកចោលនាសម័យសង្គ្រាម។ ហើយគ្រាប់យុទ្ធភណ្ឌមិនទាន់ផ្ទុះ និងអាវុធទាំងនេះ មានសភាពខូចគុណភាពទាំងស្រុង ត្រូវបានប្រគល់ជូនអង្គភាពស៊ីម៉ាក់ យកទៅកម្ទេចចោលនៅថ្ងៃដដែលនេះផងដែរ៕
ចែករំលែកព័តមាននេះ