ខេត្តព្រះវិហារ ៖ នៅព្រឹកថ្ងៃទី០៤ ខែធ្នូ ឆ្នាំ២០១៦នេះ ឯកឧត្តម សៅ សុខា ប្រធានគណៈកម្មាការជាតិ ទប់ស្កាត់ និងបង្ក្រាបបទល្មើសព្រៃឈើ និងជាមេបញ្ជាការ កងរាជអាវុធហត្ថលើផ្ទៃប្រទេស បានដឹកនាំមន្ត្រីក្រោមឱវាទ ប្រមាណជា២០០នាក់ ចុះប្រតិបត្តិការ ត្រួតពិនិត្យទីតាំងប្រមូលផលអនុផលព្រៃឈើ មួយកន្លែងរបស់ក្រុមហ៊ុន ហុង សុភាព ដែលកំពុងដាក់ទីតាំង ជាប់ជើងភ្នំដងរែក ឋិតក្នុងស្រុកជាំក្សាន្ត ដោយសង្ស័យថា បានកាប់ឈើចេញពីព្រៃការពារ និងអភិរក្ស របស់អាជ្ញាធរជាតិព្រះវិហារ ។
បើតាមការបង្ហើបឲ្យដឹងពីមន្ត្រីជំនាញ ដែលបានចុះប្រតិបត្តិការត្រួតពិនិត្យ ទីតាំងនោះ បានឲ្យដឹងថា គណៈកម្មាការជាតិទប់ស្កាត់ និងបង្ក្រាបបទល្មើសព្រៃឈើ ដែលដឹកនាំដោយ នាយឧត្តមសេនីយ៍ សៅ សុខា និងនាយឧត្តមសេនីយ៍ គន់ គីម រួមជាមួយមន្ត្រីក្រោមឱវាទ និងលោក អ៊ុន ចាន់ដា អភិបាលខេត្តព្រះវិហារ បានចុះទៅដល់ទីតាំងក្រុមហ៊ុន ហុង សុភាព ប្រមូលផលអនុផលព្រៃឈើ ចេញពីដីសម្បទានសង្គមកិច្ចរបស់ កងពលតូចអន្តរាគមន៍ លេខ៧ ដែលបានទទួលអាជ្ញាប័ណ្ណពីរាជរដ្ឋាភិបាល កាលពីឆ្នាំ២០១៤ កន្លងទៅ ។
មន្ត្រីដដែលបន្តថា ការចុះត្រួតពិនិត្យបែបនេះ ក្រោយទទួលបានព័ត៌មានថា ក្រុមហ៊ុន ហុង សុភាព បានរំលោភចូលទៅក្នុងដែន អភិរក្សធនធានធម្មជាតិ របស់អាជ្ញាធរជាតិព្រះវិហារ ដើម្បីកាប់ឈើប្រភេទ ត្រាច ផ្តៀក ផ្ចឹក ជាច្រើនដើមផងដែរ រួចអូសយកចូលក្រុមហ៊ុន ដើម្បីអារជ្រៀកដោយមានមុខកាត់ចាប់ពី ៣០សង់ទីម៉ែត្រទៅ៤០សង់ទីម៉ែត្រ ដោយមិនគោរពតាមគោលការណ៍ដែលរាជរដ្ឋាភិបាល បានកំណត់ឲ្យក្នុងការ ប្រមូលផលអនុផលព្រៃឈើ ត្រឹមតែក្នុងបរិវេណដីសម្បទានសង្គមកិច្ចតែប៉ុណ្ណោះ។
មន្ត្រីដដែល បានបន្ថែមទៀតថា បន្ទាប់ពីនាយឧត្តមសេនីយ៍ សៅ សុខា បានចុះប្រតិបត្តិការ ត្រួតពិនិត្យរួចរាល់នៅលើទីតាំងក្រុមហ៊ុនខាងលើនោះ នាយឧត្តមសេនីយ៍ ក៏បានផ្ទេរភារកិច្ច និងដាក់បទបញ្ជាយ៉ាងតឹងរ៉ឹងបំផុតឲ្យទៅអាជ្ញាធរខេត្តព្រះវិហារ និងជំនាញពាក់ព័ន្ធទាំងអស់ត្រូវធ្វើយ៉ាងណាគ្រប់គ្រងវត្ថុតាងនៅក្នុងក្រុមហ៊ុនខាងលើនោះឲ្យបានហ្មត់ចត់ដូចជា រថយន្តរ៉េវ ម៉ាស៊ីនរ៉ៃ ឈើអារ ជ្រៀករួច នឹងឈើហ៊ុប ជាច្រើនរយកំណាត់ និងដើម្បីបញ្ជាក់ពីការពិតនៅព្រឹកថ្ងៃទី០៥ ខែធ្នូនេះ សមត្ថកិច្ចចម្រុះបានបន្តប្រតិបត្តិការរុករកកន្លែង ដែលក្រុមហ៊ុន ហុង សុភាព បានកាប់រំលំដើមឈើ ក្នុងដែនអភិរក្សរបស់អាជ្ញាធរជាតិព្រះវិហារ ពិតជាមានប្រាកដមែន។
ពាក់ព័ន្ធករណីនេះ អ្នកសារព័ត៌មានបានព្យាយាម ទំនាក់ទំនងសុំការបំភ្លឺពី លោកស្រី សាយ សុភាព ដែលជាម្ចាស់ក្រុមហ៊ុន ហុង សុភាពខាងលើនេះ នៅរសៀលថ្ងៃទី០៥ ខែធ្នូ ឆ្នាំ២០១៦នេះ ពុំបានឡើយ ដោយទូរស័ព្ទ របស់លោកស្រីត្រូវបានបិទ ។ ជុំវិញប្រតិបត្តិការនេះ មហាជននៅក្នុងស្រុកជាំក្សាន្ត ក៏បានសាទរយ៉ាង ខ្លាំងចំពោះ ចំណាត់ការបង្ក្រាប របស់រដ្ឋាភិបាលលើបញ្ហាបទល្មើសព្រៃឈើ ជាក់ស្តែងដូចជាក្រុមហ៊ុន ហុង សុភាព ដែលទទួលអាជ្ញាធរប័ណ្ណពី រាជរដ្ឋាភិបាលហើយ តែមិនបានគោរពតាមគោលការណ៍របស់រាជរដ្ឋាភិបាល ដូចពាក្យចាស់ពោលថា “កន្ទេលធំ បន្លំដេក” ។ មជ្ឈដ្ឋានដដែលបានលើកឡើងថា ឬមួយការធ្វើទៅតាមរបស់ក្រុមហ៊ុន ហុង សុភាព កន្លងទៅនេះ ប្រសិនបើខ្មោចស្រុកមិនឲ្យដៃទេ ខ្មោចព្រៃក៏មិនហ៊ានចូលដែរ។
សូមបញ្ជាក់ថា ក្នុងករណីចុះប្រតិបត្តិការនេះដែរ បញ្ជាការអាវុធហត្ថលើផ្ទៃប្រទេស បានប្រើឧត្ថម្ភាគចក្រចំនួន៣គ្រឿងផងដែរ។ ដោយឡែក ទិន្នន័យក្នុងប្រតិបត្តិការបង្ក្រាបរយៈពេល២ថ្ងៃ ចាប់ពីថ្ងៃទី៤ និងទី៥ ខែធ្នូនេះ នៅមិនទាន់ដឹងនៅឡើយនោះទេ មកដល់ពេលនេះក្រុមការងារ កំពុងតែប្រមូលឈើហ៊ុប ជាច្រើនរយកំណាត់គរទុកដើម្បីធ្វើការវាស់វែងចាត់ការតាមនីតិវិធី៕
ចែករំលែកព័តមាននេះ