រាជធានីភ្នំពេញ ៖ អាជ្ញាធរខណ្ឌដង្កោដឹកនាំដោយលោក នុត ពុធដារ៉ា អភិបាលខណ្ឌដង្កោ បានបើកការដ្ឋានស្ថាបនា ផ្លូវចាក់ក្រាលបេតុងចំនួន៣ខ្សែ នៅក្នុងសង្កាត់ក្រាំងពង្រ
រាជធានីភ្នំពេញ ៖ អាជ្ញាធរខណ្ឌដង្កោដឹកនាំដោយលោក នុត ពុធដារ៉ា អភិបាលខណ្ឌដង្កោ បានបើកការដ្ឋានស្ថាបនា ផ្លូវចាក់ក្រាលបេតុងចំនួន៣ខ្សែ នៅក្នុងសង្កាត់ក្រាំងពង្រ សង្កាត់ព្រៃស សង្កាត់ប្រទះឡាង និងសង្កាត់ព្រៃវែង ដែលក្នុងនោះផ្លូវមានប្រវែងសរុប១.២៥០ម៉ែត្រ និងប្រព័ន្ធលូបង្ហូរទឹក១ខ្សែ ប្រវែង ៧១០ម៉ែត្រ ដើម្បីបម្រើផលប្រយោជន៍ និងសម្រួលដល់ការធ្វើដំណើររបស់ប្រជាពលរដ្ឋ នៅក្នុងសង្កាត់ទាំង៤នោះ និងជាការអភិវឌ្ឍន៍មូលដ្ឋានឲ្យកាន់តែមានការរីកចម្រើនថែមទៀត ស្របពេលដែលប្រទេសជាតិកំពុងមានការអភិវឌ្ឍន៍ទៅមុខឥតឈប់ឈរនោះ។
នៅក្នុងឱកាសនោះ លោកអភិបាលខណ្ឌ បានពាំនាំនូវប្រសាសន៍ផ្ដាំផ្ញើ ការសាកសួរសុខទុក្ខរបស់សម្តេចតេជោ និងសម្តេចកិត្តិព្រឹទ្ធបណ្ឌិត ព្រមទាំងលើកឡើងអំពីការអភិវឌ្ឍន៍នានាលើគ្រប់វិស័យ នៅពាសពេញផ្ទៃប្រទេស។ ជាក់ស្តែងពេលនេះនៅក្នុងមូលដ្ឋានខណ្ឌដង្កោ បានបើកការដ្ឋានស្ថាបនាផ្លូវបេតុងថ្មីចំនួន៣ខ្សែ និងការដាក់ប្រព័ន្ធលូបង្ហូរទឹក១ខ្សែ។ ការបើកការដ្ឋានស្ថាបនានាពេលនេះ នឹងជួយសម្រួលដល់ការធ្វើដំណើរ ប្រកបរបចិញ្ចឹមជីវិត ព្រមទាំងផ្តល់នូវផាសុខភាព សោភ័ណភាពជូនដល់បងប្អូនប្រជាពលរដ្ឋក្នុងសង្កាត់ទាំង៤ខាងលើ។
លោកអភិបាលខណ្ឌ ក៏បានធ្វើការផ្តាំផ្ញើឲ្យបងប្អូនប្រជាពលរដ្ឋទាំងអស់ ជួយតាមដានការអនុវត្តន៍គម្រោង របស់ក្រុមហ៊ុនទទួលការសាងសង់ ដោយសារគម្រោងនេះជាគម្រោងដែលបងប្អូនជាអ្នកទទួលផលដោយផ្ទាល់ពីផ្លូវនោះ មិនតែប៉ុណ្ណោះលោកអភិបាលខណ្ឌក៏បាន សូមឲ្យបងប្អូនប្រជាពលរដ្ឋមានការយោគយល់ អធ្យា ស្រ័យចំពោះផលប៉ះពាល់តិចតួច ដែលបណ្តាលមកពីការអនុវត្តន៍គម្រោងនេះ។ ដើម្បីឲ្យការអនុវត្តដំណើរការបានដោយជោគជ័យ និងឆាប់បានប្រើប្រាស់។
ជាមួយគ្នានោះលោកអភិបាលខណ្ឌ ក៏បានផ្តាំផ្ញើដល់ក្រុមហ៊ុនដែលទទួលការ សូមអនុវត្តន៍គម្រោងរបស់ខ្លួនឲ្យស្របតាមកិច្ចសន្យា និងបទដ្ឋានបច្ចេកទេស ក្នុងសាងសង់ និងស្ថាបនាផ្លូវទាំងនេះឲ្យបានឆាប់រហ័ស និងមានគុណភាពប្រើប្រាស់បានយូរអង្វែង។ លោកបានបន្តថា ផ្លូវដែលកំពុងស្ថាបនា ដោយការចាក់ក្រាលបេតុងនេះ គឺស្ថិតនៅក្នុងភូមិព្រៃធំ សង្កាត់ព្រៃស១ខ្សែ មានប្រវែង៥០០ម៉ែត្រ ទទឹង៥ម៉ែត្រ។ ស្ថិតនៅក្នុងភូមិទឹកថ្លា សង្កាត់ក្រាំងពង្រ១ខ្សែ មាន ប្រវែង៤៥០ម៉ែត្រ ទទឹង៤ម៉ែត្រ។ ស្ថិតក្នុងភូមិអង្គ សង្កាត់ប្រទះឡាង១ខ្សែ មានប្រវែង៣០០ម៉ែត្រ ទទឹង៥ម៉ែត្រ និងដាក់ប្រព័ន្ធលូ១ខ្សែ ស្ថិតនៅក្នុងភូមិទួលសំបូរ សង្កាត់ព្រៃវែង មានប្រវែង៧១០ម៉ែត្រ មុខកាត់០,៦ម៉ែត្រ៕
ចែករំលែកព័តមាននេះ