លូនៅភូមិបឹងបាសាក់ ពលរដ្ឋស្នើឲ្យដាក់ឡើងវិញតាមបទដ្ឋានបច្ចេកទេស
ខេត្តកំពង់ចាម ៖ ការរៀបចំដាក់ប្រព័ន្ធលូបង្ហូរទឹក១ខ្សែប្រវែងរាប់រយម៉ែត្រនៅច្រកខាងក្រោយវត្តថ្មី ស្ថិតនៅភូមិបឹងបាសាក់ សង្កាត់សំបួរមាស ក្រុងកំពង់ចាម …
ខេត្តកំពង់ចាម ៖ ការរៀបចំដាក់ប្រព័ន្ធលូបង្ហូរទឹក១ខ្សែប្រវែងរាប់រយម៉ែត្រនៅច្រកខាងក្រោយវត្តថ្មី ស្ថិតនៅភូមិបឹងបាសាក់ សង្កាត់សំបួរមាស ក្រុងកំពង់ចាម មានកន្លែងខ្លះដាក់ទៅត្រូវបានបទដ្ឋានបច្ចេកទេស និងកន្លែងខ្លះទៀត ហាក់បីដូចជាលយមកចូលផ្លូវពេក ។ ដោយលូដាក់នៅលើគោក និងបាហ្គាលូអណ្តែតលើគោក កំពស់ត្រឹមស្មាមនុស្សចាស់ ហើយនៅពេលយប់វិញងងឹតមិនមានអំពូលភ្លើងបំភ្លឺផ្លូវនោះទេ ពលរដ្ឋសំណូមពរដល់អាជ្ញាធរពាក់ព័ន្ធ សូមជួយរៀបចំផង ។
អ្នកស្រី ណាំ ស្រ៊ុន អាយុ៥៨ឆ្នាំ បានឲ្យដឹងនៅព្រឹកថ្ងៃទី៥ ខែធ្នូ ឆ្នាំ២០១៦ថា ផ្លូវជួរខាងក្រោយវត្តថ្មីជាច្រើនឆ្នាំមកហើយនៅតែមានផលវិបាកក្នុងការធ្វើដំណើរចេញពីផ្ទះទៅកាន់កន្លែងផ្សេងៗ ដោយសារតែមានក្រហេងក្រហូង ។ ក្រោយមកគេបានឃើញអាជ្ញាធរជួយរៀបចំដាក់ប្រព័ន្ធលូបង្ហូរទឹកនៅផ្នែងខាងលើវិញ ដាក់បានស្មើ តែមកដល់ត្រង់ម្តុំផ្ទះរបស់គាត់ បែរជាដាក់លូអណ្តែតមកដល់ដីទៅវិញ ចំណែកបាហ្គាលូនៅពេលដែលដើរទៅឈរក្បែរ កំពស់ជិតត្រឹមស្មាមនុស្សចាស់ ។ គាត់ឮថា នៅពេលខាងមុខនេះអាជ្ញាធរនឹងរៀបចំធ្វើផ្លូវ សំណូមពរមេត្តាធ្វើយ៉ាងណាបន្ថយលូទៅខាងក្រោយបន្តិចកុំឲ្យលយមកចូលថ្នល់ពេក ។ ហើយបើចាក់ដីធ្វើថ្នល់នោះនឹងខ្ពស់ជាងផ្ទះគាត់កន្លះម៉ែត្រ ស្រួលមិនស្រួលគេឲ្យបន្ថយបរិវេណដីផ្ទះថែមទៀត នឹងកាន់តែជួបផលវិបាក ។
អ្នកស្រី សឿង ស៊ីហាច អាយុ៥០ឆ្នាំ បានប្រាប់ឲ្យដឹងថា ក្នុងពេលដែលកម្លាំងបានចុះមករៀបចំដាក់ប្រព័ន្ធលូតាមផ្លូវមុខផ្ទះរបស់គាត់ក្នុងពេលដំបូងរបស់មន្ទីរសាធារណការ និងដឹកជញ្ជូនខេត្តដែលមើលទៅហាក់ដូចជាមិនត្រូវតាមបទដ្ឋានបច្ចេកទេសនោះទេ ។ រហូតមកដល់ពេលនេះគឺជិត៣ឆ្នាំហើយ លូដាក់គោកតែម្តង ហើយនៅពេលយប់វិញតាមផ្លូវងងឹត មិនមានអំពូលភ្លើងបំភ្លឺនោះទេ ហើយកូនចៅពលរដ្ឋក្នុងភូមិដែលត្រូវចេញពីសាលារៀនធ្វើដំណើរមកផ្ទះវិញត្រូវជួបនូវការលំបាក រូបគាត់ក៏ដូចជាអ្នកផ្សេងសំណូមពរដល់អាជ្ញាធរពាក់ព័ន្ធមេត្តាជួយរៀបចំបំពាក់អំពូលភ្លើង ដើម្បីឲ្យងាយស្រួលមើលផ្លូវ ហើយដើម្បីកុំឲ្យមានជនខិលខូចឆ្លៀតឱកាសធ្វើអ្វីមួយបាន ។
លោក សុខ ស្រ៊ុន ប្រធានមន្ទីរសាធារណការ និងដឹកជញ្ជូនខេត្តកំពង់ចាម បានប្រាប់ឲ្យដឹងដែរថា លូដែលដាក់១ខ្សែនៅខាងក្រោយវត្តថ្មីនោះ មានកន្លែងខ្លះបានជីកទៅប៉ះចំទុយោទឹក ហើយក្នុងឆ្នាំ២០១៧ខាងមុខនេះនឹងត្រូវបានរៀបចំដើម្បីដំណើរការសាងសង់ ដោយប្រើប្រាស់ថវិកាខេត្តដើម្បីសំរួលភាពងាយស្រួលដល់ប្រជាពលរដ្ឋធ្វើដំណើរ ៕
ចែករំលែកព័តមាននេះ