ខេត្តឧត្តរមានជ័យ ៖ កូនឈើប្រណីត និងដើមឈើហូបផ្លែសរុបប្រមាណ ១១.០០០ដើម នៃគម្រោង «តោះយើងនាំគ្នាដាំដើមឈើ !» លើកទី៣ បានរៀបចំឡើងដោយសភាយុវពាណិជ្ជករអន្តរជាតិ (JCI) កម្ពុជា សាខា
ខេត្តឧត្តរមានជ័យ ៖ កូនឈើប្រណីត និងដើមឈើហូបផ្លែសរុបប្រមាណ ១១.០០០ដើម នៃគម្រោង «តោះយើងនាំគ្នាដាំដើមឈើ !» លើកទី៣ បានរៀបចំឡើងដោយសភាយុវពាណិជ្ជករអន្តរជាតិ (JCI) កម្ពុជា សាខាចតុមុខ។ គម្រោងនេះ មានក្រុមយុវជនជាច្រើននាក់ បានចូលរួមស្ម័គ្រចិត្ត និងសហការយ៉ាងផុសផុល ដែលបានធ្វើនៅព្រៃសហគមន៍ សង្ឃរុក្ខវ័នក្នុងខេត្តឧត្តរមានជ័យ កាលពីថ្ងៃទី២៧ ខែវិច្ឆិកា ឆ្នាំ២០១៦ កន្លងទៅ ក្រោមជំនួយគាំទ្រយ៉ាងពេញទំហឹងពី ក្រសួងបរិស្ថាន របស់លោករដ្ឋមន្ត្រី សាយ សំអាល់ ក្រោមអធិបតីភាពរបស់ លោក ស៊ី ប្រាសិទ្ធ អភិបាលស្តីទីខេត្តឧត្តរមានជ័យ និងលោក ទិត ប្រាកដ អភិបាលរងខេត្តសៀមរាប។
នៅឆ្នាំ២០១៤ ថ្មីៗនេះ ព្រៃសហគមន៍សង្ឃរុក្ខវ័ន បានទទួលពានរង្វាន់ សហគមន៍ឆ្នើម ប្រចាំប្រទេសកម្ពុជា ស្តីពី «ការចូលរួមកាត់បន្ថយបម្រែបម្រួលអាកាសធាតុ» ក្រោមកិច្ចខិតខំប្រឹងប្រែងយ៉ាងមោះមុតរបស់គុណម្ចាស់ វ៉ែន ប៊ុនសាលួត ព្រះវិសុទ្ធិមេត្តា ព្រះរាជាគណៈថ្នាក់កិត្តិយស ព្រះមេគុណខេត្តឧត្តរមានជ័យ និងជាប្រធានសហគមន៍។ ហើយកាលពីឆ្នាំ២០១០ ព្រៃសហគមន៍ សង្ឃរុក្ខវ័នរបស់ព្រះអង្គក៏បានក្លាយជាតំណាងតំបន់អាស៊ីប៉ាស៊ីហិ្វក ទៅទទួលពានរង្វាន់ «Equator Prize» ស្តីពី «ការថែរក្សា ធនធានធម្មជាតិ និងជីវចម្រុះ»។
លោកស្រី លឹម មូលីរស្មី ប្រធានសភាយុវពាណិជ្ជករអន្តរជាតិ (JCI) កម្ពុជា សាខាចតុមុខ បានមានប្រសាសន៍ថា «យុវជន កម្ពុជាយើងកាន់តែច្រើន បាននិងកំពុងចាប់អារម្មណ៍លើកិច្ចការងារសហគមន៍។ ជាក់ស្តែងយើងមានយុវជនមកពីទីក្រុងភ្នំពេញ ខេត្តសៀមរាប ខេត្តឧត្តរមានជ័យ ព្រមទាំងបុគ្គលិករបស់ក្រុមហ៊ុនឯកជនជាច្រើននាក់បានចំណាយពេលវេលា និងថវិកាផ្ទាល់ខ្លួនមកចូលរួមការដាំដើមឈើនៅក្នុងព្រៃសហគមន៍សង្ឃរុក្ខវ័ននាឱកាសនេះ ហើយបើគ្មានការចូលរួមជាជំនួយថវិកា និងស្មារតីពីបណ្តាក្រុមហ៊ុនឯកជន បងប្អូនប្រជាសហគមន៍ ប្អូនៗសិស្សនិស្សិតទាំងអស់ទេ កម្មវិធីនេះក៏មិនអាចប្រព្រឹត្តិទៅបាន ដោយជោគជ័យបែបនេះដែរ»។ ជាចុងក្រោយ លោកស្រី បានថ្លែងអំណរគុណយ៉ាងជ្រាលជ្រៅដល់ក្រសួងបរិស្ថានដែលតែងតែយកចិត្តទុកដាក់ជួយគាំទ្រស្មារតីដាំដើមឈើនេះតាំងពីគម្រោងលើកទី២ រហូតដល់លើកទី៣នេះ។
ចែករំលែកព័តមាននេះ