ឃើញភ្លាម រត់ទៅប្តឹងសមត្ថកិច្ចឲ្យចាប់ខ្លួនភ្លាម
រាជធានីភ្នំពេញ ៖ ស្ត្រីម្នាក់ខណៈឃើញបុរសម្នាក់នៅម្តុំផ្សារធំថ្មី ក៏រត់ទៅប្តឹងសមត្ថកិច្ចឲ្យចាប់ខ្លួនបុរសនោះភ្លាម ដោយចោទប្រកាន់ថា ជននេះបានបោកប្រាស់នាង …
រាជធានីភ្នំពេញ ៖ ស្ត្រីម្នាក់ខណៈឃើញបុរសម្នាក់នៅម្តុំផ្សារធំថ្មី ក៏រត់ទៅប្តឹងសមត្ថកិច្ចឲ្យចាប់ខ្លួនបុរសនោះភ្លាម ដោយចោទប្រកាន់ថា ជននេះបានបោកប្រាស់នាង ។ បុរសរូបនោះត្រូវបានសមត្ថកិច្ចចាប់ខ្លួនកាលពីថ្ងៃទី៣ ខែធ្នូ ឆ្នាំ២០១៦ នៅម្តុំផ្សារធំថ្មី ខណ្ឌដូនពេញ ។
សមត្ថកិច្ចនគរបាលខណ្ឌសែនសុខបានឲ្យដឹងថា ជនសង្ស័យឈ្មោះ តេង ឃាង អាយុ២៧ឆ្នាំ មានទីលំនៅភូមិបាយ៉ាប សង្កាត់ភ្នំពេញថ្មី ខណ្ឌសែនសុខ មុខជាមេការតារាងបាល់ទាត់ ត្រូវបានសមត្ថកិច្ចខណ្ឌដូនពេញចាប់ខ្លួន រួចបញ្ជូនមកអធិការដ្ឋានខណ្ឌសែនសុខដើម្បីចាត់ការបន្ត ។ ការចាប់ខ្លួននេះគឺយោងតាមពាក្យបណ្ដឹងរបស់ស្ត្រីម្នាក់ឈ្មោះ លាង ប៊ុនថាវង្ស អាយុ៣៣ឆ្នាំ មានទីលំនៅក្នុងភូមិទួលគោក សង្កាត់ទួលសង្កែ ខណ្ឌឫស្សីកែវ ដោយចោទប្រកាន់ថា ជនសង្ស័យបានបោកប្រាស់ប្រាក់របស់នាងចំនួន២៦០០ដុល្លារអាមេរិក ។
យោងតាមពាក្យបណ្ដឹងរបស់ស្ត្រីរងគ្រោះបានឲ្យដឹងថា នាងបានស្គាល់គ្នាជាមួយជនសង្ស័យកាលពីថ្ងៃទី៦ ខែតុលា ឆ្នាំ២០១៦ ហើក៏បានពិភាក្សាគ្នារឿងចង់សង់តារាងបាល់របស់នាងនៅម្តុំ បុរិ ហ្គ្រែនភ្នំពេញ ពេលនេះជនសង្ស័យបានធានាថាជួយរត់ការឲ្យ ដោយទាមទារប្រាក់ពីនាង២៦០០ដុល្លារ ពេលនោះនាងក៏បានប្រគល់លុយឲ្យទៅជនសង្ស័យដើម្បីជួយរត់ការភ្លាមៗដែរ ប៉ុន្តែពេលទទួលបានលុយហើយ ជនសង្ស័យបែរជាបិទទូរស័ព្ទ ហើយរត់គេចខ្លួនបាត់ ។ លុះនៅថ្ងៃកើតហេតុ ស្ត្រីរងគ្រោះបានឃើញជនសង្ស័យនៅម្តុំផ្សារធំថ្មីក៏ប្តឹងសមត្ថកិច្ចមូលដ្ឋានឲ្យចាប់ខ្លួនតែម្តង ។
នៅចំពោះមុខសមត្ថកិច្ច ជនសង្ស័យបានសារភាពថា ខ្លួនពិតជាបានបោកលុយស្ត្រីរងគ្រោះពិតប្រាកដមែន ហើយលុយដែលបោកបាននោះយកទៅស៊ីចាយ និងចាញ់ល្បែងអស់ហើយ ៕
ចែករំលែកព័តមាននេះ