ប្រទេសថៃ ៖ ការនាំចេញអង្ករសរុបរបស់ថៃ ស្មើនឹង៩,១៨លានតោនក្នុងរយៈពេល១១ខែកន្លងមក ហើយក្រសួងពាណិជ្ជកម្មថៃមានជំនឿចិត្តថា នឹងឈានដល់គោលដៅ៩,៥លានតោនក្នុងឆ្នាំនេះ ។
លោកស្រី Duangporn Rodphaya ប្រធានគ្រប់គ្រងការិយាល័យពាណិជ្ជកម្មបរទេស បានថ្លែងកាលពីថ្ងៃចន្ទថា ៖ « ការនាំចេញអង្ករក្នុងឆ្នាំនេះបានកើនឡើង៨,៧% បើធៀបនឹងរយៈពេលដូចគ្នាឆ្នាំមុន ។ ការនាំចេញក្នុងរយៈពេលកន្លងមក ស្មើនឹង៤.១៥៩ប៊ីលានដុល្លារ ច្រើនជាងឆ្នាំមុន៣,៥៥% ។ ការិយាល័យមានជំនឿចិត្តថា ការនាំចេញអង្ករនឹងសម្រេចតាមគោលដៅ៩,៥លានតោននៅឆ្នាំ២០១៦ » ។
អតិថិជនធំៗទាំង១០របស់ថៃ រួមមាន ប្រទេសបេណាំង, កូតឌីវ័រ, ជប៉ុន, ចិន, អង់ហ្គោឡា, កាមេរូន, ឥណ្ឌូណេស៊ី, ម៉ាឡេស៊ី, កុងហ្គោ និងម៉ូសំប៊ិក ។
លោកស្រី Duangporn បន្តថា អង្កររបស់ថៃ គួរតែមានការប្រកួតប្រជែងខ្ពស់ក្នុងតម្លៃលើទីផ្សារពិភពលោក ព្រោះអង្ករទាំងនេះល្បីល្បាញរួចមកហើយផ្នែកគុណភាព ។ ការកើនឡើងនៃការនាំចេញក្នុងត្រីមាសចុងក្រោយនេះ ដោយសារការប្រមូលស្តុកអង្ករសម្រាប់លក់ចេញវិញក្នុងអំឡុងពេលចូលឆ្នាំសកល និងចូលឆ្នាំចិន ជាពិសេស ប្រទេសចិន ហុងកុង និងសិង្ហបុរី ។
ក្នុងសន្និសីទអង្ករពិភពលោកដែលប្រារព្ធនៅឈៀងម៉ៃ កាលពីពាក់កណ្តាលខែវិច្ឆិកា អង្ករថៃបានជាប់ជាអង្ករល្អជាងគេលើពិភពលោក ដែលមានការចូលរួមពីពាណិជ្ជករអន្តរជាតិយ៉ាងហោចណាស់៦០០នាក់ ។ អង្ករច្រើនជាង៥០ប្រភេទមកពីប្រទេសជាច្រើនត្រូវបានដាក់ឲ្យជ្រើសរើស ខណៈលេខ២ បានទៅលើប្រទេសកម្ពុជា ហើយលេខ៣ គឺសហរដ្ឋអាមេរិក ៕
ចែករំលែកព័តមាននេះ