ចក្រភពអង់គ្លេស ៖ លោក Mark Carney ប្រធានធនាគារអង់គ្លេស (Bank of England) បានថ្លែងកាលពីថ្ងៃពុធថា ជំហររបស់លោកប្រធានាធិបតីជាប់ឆ្នោត Donald Trump អាចនឹងបង្កឲ្យមានការអន់ថយនៃពាណិជ្ជកម្មពិភពលោក ព្រមទាំងប៉ះពាល់ដល់សេដ្ឋកិច្ចរបស់អង់គ្លេស ។
លោក Carney បានប្រាប់ទៅកាន់សន្និសីទកាសែតមួយថា ៖ « ភាពអន់ថយនៃការលូតលាស់ពាណិជ្ជកម្មពិភពលោក ដែលបានកើតមានឡើងក្នុងរយៈពេលប៉ុន្មានឆ្នាំថ្មីៗកន្លងមក អាចនឹងធ្លាក់ចុះកាន់តែលឿន ព្រោះតែគោលនយោបាយរបស់ប្រទេសសេដ្ឋកិច្ចធំជាងគេលើពិភពលោកមួយនេះ » ។
លោកបន្តថា ៖ « បើទោះជាវាអាចនឹងមិនប៉ះពាល់ដល់ចក្រភពអង់គ្លេសដោយផ្ទាល់ក្តី ប៉ុន្តែប្រសិនបើវាពន្យឺតការលូតលាស់ពាណិជ្ជកម្មរបស់ពិភពលោកមែននោះ ក្នុងនាមពួកយើងជាប្រទេសដែលបើកទូលាយផ្នែកពាណិជ្ជកម្ម សេដ្ឋកិច្ចពួកយើងអាចនឹងត្រូវបានប៉ះពាល់ជាមិនខាន » ។
គួរបញ្ជាក់ថា មុនពេលបោះឆ្នោតជ្រើសរើសប្រធានាធិបតីសហរដ្ឋអាមេរិក លោក Trump បាននិយាយថា ប្រទេសចិនកំពុងតែធ្វើឱ្យប៉ះពាល់ដល់ពាណិជ្ជកម្មសហរដ្ឋអាមេរិក ដូច្នេះ លោកនឹងដំឡើងពន្ធលើផលិតផលនាំចូលពីប្រទេសចិន ។ លើសពីនេះ លោកនិយាយថា នឹងដកសហរដ្ឋអាមេរិកចេញពីកិច្ចព្រមព្រៀងដៃគូពាណិជ្ជកម្មអន្តរប៉ាស៊ីហ្វិក (TPP) ផងដែរ ៕
ចែករំលែកព័តមាននេះ