រាជធានីភ្នំពេញ ៖ សាធារណរដ្ឋកូរ៉េ គឺជាដៃគូអភិវឌ្ឍន៍ទ្វេភាគីធំទី៣ នៅក្នុងចំណោមដៃគូអភិវឌ្ឍន៍ទ្វេភាគីដទៃទៀតដែលបានផ្តល់ហិរញ្ញប្បទានចូលរួមចំណែកដល់ដំណើរការអភិវឌ្ឍន៍ប្រទេសកម្ពុជា ។ នេះបើតាមការលើកឡើងរបស់មន្ត្រីជាន់ខ្ពស់នៃក្រសួងសេដ្ឋកិច្ច និងហិរញ្ញវត្ថុ ។
នៅក្នុងកិច្ចប្រជុំពិគ្រោះយោបល់កម្រិតគោលនយោបាយលើកទី២ ស្ដីពីកិច្ចសហប្រតិបត្តិការអភិវឌ្ឍន៍រវាងរាជរដ្ឋាភិបាលកម្ពុជា និងរដ្ឋាភិបាលនៃសាធារណរដ្ឋកូរ៉េ នៅថ្ងៃទី៣០ វិច្ឆិកា លោក វង្សី វិស្សុត រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ បានលើកឡើងថា គិតមកត្រឹមឆ្នាំ២០១៦នេះ សាធារណរដ្ឋកូរ៉េបានសន្យាផ្តល់ហិរញ្ញប្បទានដល់កម្ពុជា មានចំនួនសរុបប្រមាណជាង៧៣៨លានដុល្លារអាមេរិក ក្នុងនោះឥណទានសម្បទានមានប្រមាណ៥៣៥លានដុល្លារអាមេរិក និងហិរញ្ញប្បទានជំនួយឥតសំណងមានប្រមាណ២០៣លានដុល្លារអាមេរិក ហើយចំនួននេះមិនទាន់បានរាប់បញ្ចូលនូវទឹកប្រាក់ជំនួយបច្ចេកទេសផ្សេងៗទៀតនោះទេ។ លោករដ្ឋលេខាធិការមានប្រសាសន៍ថា ៖ « ជំនួយរបស់សាធារណរដ្ឋកូរ៉េ ពិតជាបានចូលរួមចំណែកមួយផ្នែកធំដល់ដំណើរការនៃការអភិវឌ្ឍរបស់ប្រទេសកម្ពុជា ហើយសង្ឃឹមថា ភាគីកូរ៉េនឹងនៅតែបន្តផ្តល់ជំនួយដល់ការអភិវឌ្ឍនេះបន្ថែមទៀតនាបណ្តាឆ្នាំខាងមុខ » ។
លោកបន្តថា ៖ « ក្នុងពេលខាងមុខនេះ កម្ពុជាមានគម្រោងអភិវឌ្ឍន៍ជាច្រើនទៀត។ ដូច្នេះ កម្ពុជាសង្ឃឹមថា រដ្ឋាភិបាលនៃសាធារណរដ្ឋកូរ៉េនឹងបន្តបង្កើនទំហំនៃការផ្តល់ឥណទាននៅក្នុងក្របខ័ណ្ឌនៃជំនួយឥតសំណង និងកម្ចីសម្បទានដើម្បីរួមចំណែកដល់កិច្ចការអភិវឌ្ឍន៍សេដ្ឋកិច្ច-សង្គមកម្ពុជា » ។
លោក វង្សី វិស្សុត បន្ថែមថា ក្នុងរយៈពេល២០ឆ្នាំចុងក្រោយនេះ កំណើនសេដ្ឋកិច្ចកម្ពុជាមានប្រមាណ៧,៧%ជាមធ្យមក្នុង១ឆ្នាំ ហើយកម្ពុជា ជាប្រទេសដែលមានអតិផរណាទាប និងមានអត្រាការប្រាក់ប្រកបដោយស្ថិរភាព ។ ទន្ទឹមនឹងនេះ ការកាត់បន្ថយភាពក្រីក្រ ក៏ទទួលបានលទ្ធផលល្អផងដែរ ដោយនៅឆ្នាំ២០០៤ ភាពក្រីក្រនៅកម្ពុជា មានប្រមាណ៥៣,៤% ត្រូវបានកាត់បន្ថយមកនៅត្រឹម១៣,៥%នៅឆ្នាំ២០១៤ ។ រីឯវិសមភាពសង្គមក៏ត្រូវបានកែលម្អផងដែរ ដែលភាពរីកចម្រើនទាំងនេះ គឺមិនអាចកាត់ផ្តាច់ចេញបានពីការផ្តល់ជំនួយរបស់បណ្តាប្រទេសជាមិត្ត ដែលក្នុងនោះក៏មានសាធារណរដ្ឋកូរ៉េផងដែរ ។
លោក Kim Yoon Kyung តំណាងរដ្ឋាភិបាលសាធារណរដ្ឋកូរ៉េ បានមានប្រសាសន៍ថា កិច្ចប្រជុំពិគ្រោះយោបល់នេះរៀបចំឡើង ក្នុងគោលបំណងបន្តគោលនយោបាយភាពជាដៃគូ និងជាការបើកឱកាសជូនភាគីទាំងពីរពិភាក្សាផ្លាស់ប្តូរយោបល់ ទស្សនទាន ចក្ខុវិស័យ និងគោលនយោបាយអាទិភាពនានា នៅក្នុងក្របខ័ណ្ឌនៃកិច្ចសហប្រតិបត្តិការអភិវឌ្ឍន៍ផ្លូវការ (ODA) របស់សាធារណរដ្ឋកូរ៉េ ទាំងជាហិរញ្ញប្បទានឥតសំណង (Grant Aid), ឥណទានសម្បទាន (EDCF Loan) និងជំនួយបច្ចេកទេសនានាទៅតាមវិស័យអាទិភាពនៃយុទ្ធសាស្ត្រអភិវឌ្ឍន៍របស់កម្ពុជា និងគោលនយោបាយកិច្ចសហប្រតិបត្តិការរបស់សាធារណរដ្ឋកូរ៉េផងដែរ ៕
ចែករំលែកព័តមាននេះ