ស្ត្រីជាម្តាយដែលបានប៉ះកូនរបស់ខ្លួនដោយផ្ទាល់ក្នុងរយៈពេលមួយម៉ោងដំបូងក្រោយពេលផ្តល់កំណើត 50ភាគរយនៃស្ត្រីជាម្តាយទំនងជាបំបៅដោះកូនរហូតដល់រយៈពេលប្រាំមួយខែ នេះបើយោងតាមក្រុមអ្នកស្រាវជ្រាវបានបញ្ជាក់បង្ហាញ ហើយការបំបៅដោះកូននេះមានសារសំខាន់ខ្លាំងណាស់ នឹងជួយកូនតូចរបស់អ្នកឱ្យរួចផុតពីជំងឺដង្កាត់ច្រើនប្រការបាន ។
ក្រុមអ្នកជំនាញជឿថា វាជាពេលវេលាមាស បន្ទាប់ពីផ្តល់កំណើត ហើយនៅពេលទារកត្រូវបានគេលើកដាក់លើពោះម្តាយ ទារកនោះនឹងវារឡើងទៅរកសុដន់របស់ម្តាយ។ ដូច្នេះវាមានភាពងាយស្រួលក្នុងការបំបៅដោះចាប់តាំងពីដំបូង ហើយក៏នឹងជួយឲ្យម្តាយមានទំនាក់ទំនងកាន់តែជិតស្និទ្ធជាមួយកូនតូចរបស់នាង ។
ការពិនិត្យឡើងវិញលើការសិក្សាជាច្រើនស្តីពីការប៉ះដោយផ្ទាល់រវាងម្តាយ និងទារកបានរកឃើញថា ស្ត្រីដែលទារកត្រូវបានគេដាក់នៅលើទ្រូងរបស់ពួកគេ ក្នុងម៉ោងដំបូងបន្ទាប់ពីផ្តល់កំណើតអាចបំបៅដោះជាមធ្យម 64 ថ្ងៃយូរជាងទារកដែលត្រូវបានគេបំបែកចេញពីម្តាយ ។
ទារកដែលប៉ះផ្ទាល់នឹងដើមទ្រូងម្តាយបន្ទាប់ពីកើតភ្លាមនេះ ក៏មានភាពតានតឹងតិចតួច មានអត្រាបេះដូង និងការដកដង្ហើមល្អផងដែរ ។ អ្នកដឹកនាំការស្រាវជ្រាវ លោកស្រី Elizabeth Moore មកពីសាកលវិទ្យាល័យ Vanderbilt នៅសហរដ្ឋអាមេរិកបានឱ្យដឹងថា ទារកដែលទើបនឹងកើត ប្រើអារម្មណ៍របស់ពួកគេនៃការស្រូបក្លិន ដើម្បីទទួលបានការបំបៅបន្ទាប់ពីកើត ។
លោកស្រីបាននិយាយថា៖ «បន្ទាប់ពីមួយឬពីរម៉ោងដំបូងនៃជីវិតរបស់ពួកគេ អ័រម៉ូនស្ត្រេសក្នុងទារកដែលមានបន្ទាប់ពីកើតចាប់ផ្តើមថយចុះ ហើយទារកនឹងមានអារម្មណ៍ងងុយគេងខ្លាំងឡើងៗ»។ ស្ត្រីជាច្រើនបោះបង់ការបំបៅដោះកូនដោយសារតែទារករបស់ពួកគេលែងចង់បៅដោះម្តាយ ។
ភ័ស្តុតាងពីការពិនិត្យឡើងវិញនេះបង្ហាញថា វិធីដ៏ល្អក្នុងការជំរុញការបំបៅដោះកូន គឺការប៉ះផ្ទាល់រវាងម្តាយ និងទារកនៅម៉ោងដំបូង បន្ទាប់ពីការផ្តល់កំណើត ។ វាមានសារៈសំខាន់ណាស់ពីព្រោះការបំបៅដោះកូនអាចជួយឲ្យទារកជៀសផុតពីជំងឺផ្សេងៗ និងមានសុខភាពល្អ ៕
ចែករំលែកព័តមាននេះ