ការវាយប្រហារប្រឆាំងពួកបះបោររបស់កងកម្លាំងលោកកាដាហ្វីបានបន្តទៀតកាលពីថ្ងៃទី៨ មីនា នៅភាគខាងកើតប្រទេស ព្រមទាំងនៅទីក្រុង ZAOUIAH ភាគខាងលិចក្រុងទ្រីប៉ូលី។
កងកម្លាំងរដ្ឋាភិបាលលីប៊ីបានបន្តកាលពីថ្ងៃទី៨ មីនា នូវការវាយប្រហាររបស់ខ្លួនប្រឆាំងពួកបះបោរនៅភាគខាងកើតប្រទេស ព្រមទាំងនៅទីក្រុង ZAOUIAH ភាគខាងលិចក្រុងទ្រីប៉ូលី ខណៈពួកឧទ្ទាមទុកពេល៧២ម៉ោងឱ្យលោកកាដាហ្វីបោះបង់ចោលអំណាច។
នៅលើរណសិរ្សភាគខាងកើតបណ្តាអ្នកកាសែតបរទេសរៀបរាប់ពី ការវាយប្រហារតាមអាកាសចំនួន៤លើករបស់កងទ័ពលោកកាដាហ្វីប្រឆាំងទីតាំងទាំងឡាយរបស់ពួកឧទ្ទាមនៅទីក្រុង RAS LANOUF ជាទីក្រុងកំពង់ផែប្រេងស្ថិតនៅតាមផ្លូវឆ្ពោះទៅកាន់ទីក្រុង SYRTE និងតំបន់ជុំវិញទីក្រុង RAS LANOUF នោះ។ កងរថក្រោះ និងកាំជ្រួចក៏វាយប្រហារក្នុងតំបន់នោះដែរប្រឆាំងនឹងខ្សែរត្រៀមជួរមុខទាំងឡាយរបស់ពួកឧទ្ទាមដែលហាក់ដូចជាពុំមានកម្លាំងគ្រប់គ្រាន់ក្នុងការទប់ទល់ចំពោះការវាយប្រហារដ៏ខ្លាំងក្លាបែបនេះ។ នៅភាគខាងលិចប្រទេសកងកាំភ្លើងធំនិងការរថក្រោះរបស់កងកម្លាំងលោកកាដាហ្វីបានវាយប្រហារជាថ្មីលើទីក្រុង ZAOUIAH ចម្ងាយ៥០គីឡូម៉ែត្រពីទីក្រុងទ្រីប៉ូលី។ ខាងផ្នែកការទូតវិញប្រទេសអង់គ្លេស និងបារាំងស្វះស្វែងឱ្យមានការអនុម័តលើការបង្កើតតំបន់ហាមឃាត់ការហោះហើរមួយនៅពីលើប្រទេសលីប៊ីដើម្បីបញ្ចប់ការវាយឆ្មក់តាមអាកាសរបស់កងទ័ពរដ្ឋាភិបាល។ សហរដ្ឋអាមេរិក និងប្រទេសដទៃៗទៀតដូចជាចិនជាដើមនៅតែពុំទាន់ដាច់ស្រេចចំពោះការផ្តួចផ្តើមគំនិតមួយបែបនេះ។ ក៏ប៉ុន្តែលោកបារ៉ាក់ អូបាម៉ា និងនាយករដ្ឋមន្ត្រីអង់គ្លេសលោកដាវីដ កាមឺរ៉ូន ប្រកាសថា ទិសដៅរួមនៅលីប៊ីគឺបញ្ចប់អំពើហិង្សា និងការចាកចេញរបស់លោកមូអាម៉ា កាដាហ្វី។ សំរាប់រដ្ឋមន្ត្រី ការបរទេសបារាំង លោក ALAIN JUPPE និយាយថា ក្រុងប៉ារីសត្រៀមធ្វើអន្តរាគមន៍ជាមួយប្រទេសដទៃៗទៀតដើម្បីការពារប្រជាជនហើយរារាំងលោកកាដាហ្វីកុំឱ្យប្រើប្រាស់យន្តហោះ។
ទោះបីជាយ៉ាងណាក៏ពួកអ្នកជំនាញការខាងយោធាវាយតំលៃកាលពីថ្ងៃទី៨ មីនា នៅទីក្រុងឡុងថា ការបង្កើតតំបន់ហាមឃាត់ការហោះហើរពីលើប្រទេសលីប៊ីនឹងមានប្រសិទ្ធភាពមានកំរិតមួយប៉ុណ្ណោះដើម្បីបញ្ឈប់ការវាយលុករបស់កងកម្លាំងស្និទ្ធលោកកាដាហ្វីប្រឆាំងនឹងពួកបះបោរ និងប្រជាជន ៕
ចែករំលែកព័តមាននេះ