ខេត្តបាត់ដំបង ៖ បើតាមសេចក្តីរាយការណ៍បានឱ្យដឹងថា ក្មេងប្រុសម្នាក់ និងក្មេងស្រីម្នាក់ ដែលមានអាយុទើបតែ១០ឆ្នាំ និង១៣ឆ្នាំតែប៉ុណ្ណោះ ហើយត្រូវជាបងប្អូនបង្កើតនឹងគ្នាផងនោះ បានលង់ទឹកស្លា.ប់យ៉ាងអាណោចអាធ័ម នៅក្នុងស្រះដ៏ធំមួយកន្លែង កាលពីវេលាម៉ោង៦និង៤០នាទីល្ងាច ថ្ងៃទី២៨ ខែមិថុនា ឆ្នាំ២០២២ នៅខាងចុងភូមិកំពង់ព្រះ ឃុំកំពង់ព្រះ ស្រុកសង្កែ ធ្វើឲ្យអាណាព្យាបាលសង្វេគចិត្តក្រៃលេង។
បើតាមរបាយការណ៍សមត្ថកិច្ចបានឲ្យដឹងថា ជនរងគ្រោះទាំង០២នាក់បងប្អូនខាងលើនេះ ១- ឈ្មោះ ចាន់ ចាវ ភេទស្រី អាយុ១៣ឆ្នាំ (បង) និង២- ឈ្មោះ ចាន់ ចន្នី ភេទប្រុស អាយុ១០ឆ្នាំ (ប្អូន)។ ក្មេងប្រុសស្រីទាំង០២នាក់នេះគឺជាបងប្អូននឹងគ្នា បាននាំគ្នាទៅហែលទឹកលេងនៅក្នុងស្រះទឹកខាងក្រោយភូមិ ជាមួយក្មេងៗប៉ុន្មាននាក់ទៀត ដែលអាណាព្យាបាលមិនបានដឹង។
តាមរបាយការណ៍បន្តថា នៅពេលនោះ ប្អូនប្រុសបានចុះហែល ហើយក៏បានលង់ទឹក ស្រាប់តែបងស្រីឃើញដូច្នេះក៏ចុះទៅជួយ ទើបត្រូវលង់ទឹកបាត់ខ្លួនទាំង០២នាក់តែម្ដង។
បើតាមការបំភ្លឺពីកេ្មងៗ ដែលបានឃើញហេតុការណ៍បានប្រាប់សមត្ថកិច្ចថា ពេលនោះពួកគេបាននាំគ្នាចុះហែលទឹកស្រះនោះ តែភ្លាមនោះស្រាប់តែឈ្មោះ ចន្នី បានលង់ទឹកបាត់ខ្លួន។ ដោយឃើញបែបនេះឈ្មោះ ចាវ (បងស្រី) ក៏ចុះទៅជួយ តែមិនដឹងយ៉ាងម៉េច ស្រាប់តែលង់ទឹកលិចបាត់ខ្លួនទាំង០២នាក់ឈឹងតែម្ដង។
សមត្ថកិច្ចបាននិយាយថា នៅពេលកើតហេតុភ្លាមៗ មានក្មេងម្នាក់ដែលទៅហែលទឹកជាមួយគ្នា បានរត់មកប្រាប់អាណាព្យាបាលក្មេងរងរគ្រោះអំពីហេតុការណ៍លង់ទឹកនោះ ទើបមានការភ្ញាក់ផ្អើលនាំគ្នាទៅកន្លែងកើតហេតុ។ ពួកគេបាននាំគ្នាចុះរាវរកក្មេងរងគ្រោះ ហើយក៏បានប្រទះឃើញភ្លាមៗដែរ។
ពាក់ព័ន្ធនឹងហេតុការណ៍ខាងលើនេះ ក្រុមគ្រួសារជនរងគ្រោះមិនបានរាយការណ៍ប្រាប់សមត្ថកិច្ចឲ្យដឹងភ្លាមៗនោះទេ ដោយពួកគេបានដឹកក្មេងរងគ្រោះទាំង០២នាក់ទៅកាន់មន្ទីរពេទ្យ តែនៅពេលជនរងគ្រោះស្លា.ប់ ក៏ដឹកមកដល់ផ្ទះវិញ ទើបមានគេផ្ដល់ដំណឹងទៅសមត្ថកិច្ច ហើយសមត្ថកិច្ចក៏បានចុះពិនិត្យសាកស.ពនៅនឹងផ្ទះជនរងគ្រោះទាំងយប់តែម្តង។
ប៉ុន្តែទោះបីយ៉ាងណា បើតាមមន្ត្រីជំនាញ បានប្រាប់ថា នៅព្រឹកថ្ងៃទី២៩ ខែមិថុនា មន្ត្រីបច្ចេកទេស បានចុះទៅកន្លែងកើតហេតុ ដើម្បីពិនិត្យ និងធ្វើកោសល្យវិច័យជាថ្មីហើយ ដើម្បីស្វែងរកមូលហេតុដែលនាំឲ្យក្មេងប្រុសស្រីទាំង០២នាក់បងប្អូនលង់ទឹកស្លា.ប់។ ដូច្នេះអាណាព្យាបាល គួរតែមានការប្រុងប្រយ័ត្នខ្លះផង ចំពោះកូនចៅតូចៗរបស់ខ្លួន ដែលពួកគេចូលចិត្តនាំគ្នាទៅហែលទឹកលេងនៅតាមស្រះទឹក និងតាមប្រឡាយនានា ព្រោះថា សព្វថ្ងៃនេះ មានរណ្ដៅដីជ្រៅៗច្រើនណាស់ ដែលក្រុមហ៊ុនគ្រឿងចក្រកាយយកអាចម៌ដីលក់នៅក្បែរៗភូមិ ដែលភាគច្រើនមិនស្របច្បាប់៕
ចែករំលែកព័តមាននេះ