រាជធានីភ្នំពេញ ៖ នៅមជ្ឈមណ្ឌលជាតិជនពិការក្នុងខណ្ឌសែនសុខកាលពីថ្ងៃទី៣ ធ្នូ មានរៀបចំការប្រកួតកីឡាបាល់ទះអង្គុយដើម្បីអបអរសាទរទិវាជនពិការលើកទី១៨និងទិវាជនពិការអន្តរជាតិលើកទី៣៤ ក៏ដូចជាស្វែងរកបទពិសោធន៍និងបច្ចេកទេសពីគ្នាទៅវិញទៅមកនិងអ្នកដែលមានសមត្ថភាពដើម្បីទៅចូលរួមប្រកួតនៅក្រៅប្រទេស ។
លោក យី វាសនា អគ្គលេខាធិការគណៈកម្មាធិការជាតិប៉ារ៉ាឡាំពិកកម្ពុជា បានមានប្រសាសន៍ថា គោលបំណងដែលគណៈកម្មាធិការជាតិប៉ារ៉ាឡាំពិកកម្ពុជារៀបចំឱ្យមានការប្រកួតកីឡាបាល់ទះអង្គុយនោះឡើង គឺដើម្បីស្វែងរកជើងខ្លាំងនិងមានបទពិសោធន៍បច្ចេកទេសល្អដាក់ចូលក្រុមជម្រើសជាតិសម្រាប់ចូលរួមប្រកួតអាស៊ានប៉ារ៉ាហ្គេម លើកទី៩ នៅប្រទេសម៉ាឡេស៊ី នាខែវិច្ឆិកា ឆ្នាំ២០១៧ ខាងមុខ ។
ក្រុមដែលចូលរួមប្រកួតលើកនេះមានចំនួន៣ក្រុមគឺក្រុមបាយ័ន ក្រុមអង្គរ និងក្រុមព្រះវិហារ ដោយធ្វើឡើងតាមរូបមន្តជម្រុះវិលជុំ ។ ការប្រកួតនេះចាញ់-ឈ្នះចាត់ទុកជារឿងធម្មតា សំខាន់គឺដើម្បីស្វែងរកអត្តពលិកឆ្នើមនៅក្នុងក្រុមនីមួយៗដាក់រួមបញ្ចូលគ្នាឱ្យក្លាយជាក្រុមជម្រើសជាតិតែមួយសម្រាប់ការប្រកួតនៅក្រៅប្រទេស ។
ក្រុមបាល់ទះអង្គុយកម្ពុជាធ្លាប់ធ្វើដំណើរទៅចូលរួមប្រកួតអាស៊ានប៉ារ៉ាហ្គេមលើកទី៧នៅប្រទេសមីយ៉ាន់ម៉ាក្នុងឆ្នាំ២០១៤ ដោយទទួលបានមេដាយសំរឹទ្ធ ហើយពេលនេះកំពុងត្រៀមខ្លួនធ្វើដំណើរទៅចូលរួមប្រកួតអាស៊ានប៉ារ៉ាហ្គេមលើកទី៩ ឆ្នាំ២០១៧ នៅប្រទេសម៉ាឡេស៊ីជាបន្តទៀត ។ គិតរហូតមកទល់ពេលនេះគណៈកម្មាធិការប៉ារ៉ាឡាំពិកកម្ពុជា ធ្លាប់បញ្ជូនអត្តពលិករបស់ខ្លួនទៅចូលរួមប្រកួតខ្នាតអាស៊ានចំនួន៨ដង ខ្នាតអាស៊ីចំនួន២ដង និងខ្នាតពិភពលោកចំនួន៥ដង ដោយទទួលបានមេដាយសរុបចំនួន១៣០គ្រឿង ក្នុងនោះមេដាយមាស២១គ្រឿង មេដាយប្រាក់៥៦គ្រឿង និងមេដាយសំរឹទ្ធ៥៣គ្រឿង ។ ចំពោះលទ្ធផលប្រកួតថ្ងៃនេះ ក្រុមអង្គរបានយកឈ្នះ២ប្រកួតជាប់គ្នា គឺលើកទី១ឈ្នះក្រុមបាយ័ន២សិតសូន្យ២៥-១៤ និង២៤-១៣ និងឈ្នះក្រុមព្រះវិហារ២សិតសូន្យ២៥-២១និង២៥-២២ ។ លោកយី វាសនា បានឱ្យដឹងទៀតថា មូលហេតុដែលលោកយកឈ្មោះប្រាសាទទាំងអស់នោះមកដាក់ឱ្យក្រុមបាល់ទះជនពិការ ដោយសារលោកមានបំណងចង់ផ្សព្វផ្សាយសម្បត្តិវប្បធម៌ខ្មែរយើងឱ្យអន្តរជាតិបានស្គាល់ ៕
ចែករំលែកព័តមាននេះ