រាជធានីភ្នំពេញ ៖ ប្រជាពលរដ្ឋ និងមន្ត្រីរាជការដែលមានប្រាក់ចំណូលទាបកំពុងទន្ទឹងរង់ចាំមើលគម្រោងផ្ទះសាធារណៈតម្លៃទាប ដែលអភិវឌ្ឍន៍ដោយក្រុមហ៊ុនក្នុងស្រុក សហការជាមួយក្រសួងរៀបចំដែនដី នគរូបនីយកម្ម និងសំណង់ ថាតើគម្រោងនេះនឹងចេញរូបរាងនៅពេលណា និងមានរូបរាងយ៉ាងម៉េច ។ ម្ចាស់គម្រោងបានបង្ហើបកាលពីពេលកន្លងមកថា គម្រោងនេះនឹងចាប់ផ្ដើមអភិវឌ្ឍន៍ជាផ្លូវការនៅដើមឆ្នាំ២០១៧ខាងមុខ និងមិនឲ្យហួសពីត្រីមាសទី១ឡើយ ។
ទន្ទឹមនឹងគម្រោងផ្ទះសាធារណៈនេះចាប់ផ្ដើមអភិវឌ្ឍន៍ និងលក់ជូនពលរដ្ឋជាផ្លូវការនោះ ម្ចាស់គម្រោង និងក្រសួងសហការក៏បានឯកភាពផងដែរ មិនមែនចេះតែលក់ឲ្យនោះទេ គឺត្រូវមានលក្ខខណ្ឌ និងកិច្ចសន្យាមួយចំនួន ទើបមានសិទ្ធិទិញផ្ទះតម្លៃទាបនេះបាន ។ ដូចនេះ តើលក្ខខណ្ឌនោះយ៉ាងណាទើបអាចក្លាយជាម្ចាស់ផ្ទះសាធារណៈបាន ?
លោកឧកញ៉ា សៀ រឹទ្ធី អគ្គនាយកក្រុមហ៊ុន Worldbridge ម្ចាស់គម្រោងលំនៅឋានសាធារណៈ បានមានប្រសាសន៍ថា មុននឹងគម្រោងត្រូវបានអនុវត្ត ក្រុមហ៊ុនត្រូវការសិក្សាច្រើនទាំងរបៀបរបបនៃការរស់នៅ អនាម័យ និងសន្តិសុខជាដើម ។ ចំណុចទាំងអស់នេះ ក្រុមហ៊ុនក៏បានសិក្សារួចហើយដែរ តែក៏ត្រូវមានការសហការបន្តពីរាជរដ្ឋាភិបាលដើម្បីកំណត់ច្បាប់ថា តើប្រជាជនប្រភេទណាទើបអាចទិញគម្រោងនេះបាន ។ លោកមានប្រសាសន៍ថា ៖ « មកទល់ថ្ងៃនេះ ខ្ញុំអាចនិយាយថា ជាគោលការណ៍យើងបានបញ្ចប់ហើយ នៅតែសម្រេចថា តើយកទិសដៅមួយណាយកមកអនុវត្ត ។ ដូចនេះ ទើបខ្ញុំប្រើពាក្យមួយថា សុខចិត្តយឺត ឲ្យតែល្អ » ។
លោកបន្តថា ៖ « ជារឿយៗ ចេះតែមានអ្នកបារម្ភខ្លាចគម្រោងនេះ អ្នកមានទិញយកអស់ តែខ្ញុំសូមសន្យាថា នឹងមិនមានករណីបែបនេះកើតឡើងទេ ព្រោះយើងបានចងជាគោលការណ៍រួចស្រេចហើយ ដូចជាអ្នកទិញត្រូវមានប្រាក់ខែ ៥០០ដុល្លារអាមេរិកចុះក្រោម បើប្រាក់ខែលើសហ្នឹង មិនអាចលក់បានទេ ។ លក្ខខណ្ឌមួយទៀត អ្នកទិញត្រូវតែមានគ្រួសារ ហើយយើងក៏មិនអាចលក់ឲ្យដែរ បើសិនគាត់ទិញហើយយកទៅលក់បន្តក្នុងរយៈពេល៥ឆ្នាំ ។ ដូចនេះ ពេលទិញហើយគាត់ត្រូវតែស្នាក់នៅក្នុងផ្ទះនោះ » ។
ទាក់ទងនឹងទីតាំងរបស់គម្រោងលំនៅឋានសាធារណៈនេះដែរ លោកឧកញ៉ា សៀ រឹទ្ធី នៅតែប្រកាន់ខ្ជាប់មិនបង្ហាញទីតាំងច្បាស់លាស់ឡើយ គ្រាន់តែបង្ហើបថា គម្រោងនេះនឹងមានទូទាំងខណ្ឌទាំងអស់នៅជាយក្រុងភ្នំពេញ ដើម្បីឱ្យប្រជាពលរដ្ឋនៅជុំវិញជាយក្រុងភ្នំពេញ អាចងាយស្រួលជ្រើសរើសទីតាំងណាមួយដែលនៅជិតកន្លែងធ្វើការ ។
លោកមានប្រសាសន៍ថា ៖ « យើងក៏មានគម្រោងអភិវឌ្ឍន៍លំនៅឋានសាធារណៈនេះនៅតាមបណ្ដាខេត្តក្នុងប្រទេសកម្ពុជាផងដែរ ។ យើងមិនមែនធ្វើតែមួយហើយឈប់នោះទេ អីចឹងទេបងប្អូនដែលនៅតាមបណ្ដាខេត្ត ក៏អាចនឹងទិញផ្ទះតម្លៃទាបនេះស្នាក់នៅបានដែរ ។ ដូចនេះ គាត់ត្រូវទ្រាំចាំបន្តិច នៅពេលគម្រោងនេះអភិវឌ្ឍន៍បានមួយដំណាក់ហើយនោះ » ។
លោកឧកញ៉ា សៀ រឹទ្ធី បញ្ជាក់ថា ផ្ទះក្នុងគម្រោងដំបូងមានចំនួន២.៧០០ផ្ទះ វិនិយោគប្រមាណ១០០លានដុល្លារអាមេរិក ។ ចំពោះតម្លៃផ្ទះនីមួយៗអាចចន្លោះពី២,៥ម៉ឺនដុល្លារអាមេរិក ទៅ៣ម៉ឺនដុល្លារអាមេរិក ប៉ុន្តែប្រជាពលរដ្ឋអាចបង់រំលស់ដោយការជួយសម្រួលពីក្រុមហ៊ុនផ្ទាល់ និងធនាគារដៃគូមួយចំនួនផងដែរ ៕
ចែករំលែកព័តមាននេះ