រាជធានីភ្នំពេញ ៖ ខណៈឆ្នាំ២០១៦ ជិតនឹងផុតទៅហើយនោះ ការបូកសរុបលទ្ធផលនានាបានចាប់ផ្ដើមបណ្ដើរៗទាំងតាមស្ថាប័នរដ្ឋ និងឯកជន ។ មិនខុសគ្នានេះ វិស័យអចលនទ្រព្យដែលត្រូវចាត់ទុកថា ជាវិស័យដ៏សំខាន់មួយ
រាជធានីភ្នំពេញ ៖ ខណៈឆ្នាំ២០១៦ ជិតនឹងផុតទៅហើយនោះ ការបូកសរុបលទ្ធផលនានាបានចាប់ផ្ដើមបណ្ដើរៗទាំងតាមស្ថាប័នរដ្ឋ និងឯកជន ។ មិនខុសគ្នានេះ វិស័យអចលនទ្រព្យដែលត្រូវចាត់ទុកថា ជាវិស័យដ៏សំខាន់មួយសម្រាប់លើកស្ទួយកំណើនសេដ្ឋកិច្ចជាតិនោះ ត្រូវបានក្រុមហ៊ុនអ្នកវាយតម្លៃមួយចំនួនបូកសរុបលទ្ធផល និងប្រៀបធៀបជាមួយឆ្នាំ២០១៥ ជាបណ្ដើរៗហើយដែរ ។
ថ្លែងនៅក្នុងកិច្ចសម្ភាសន៍ជាមួយទូរទស្សន៍ក្នុងស្រុក លោក សន សៀប ប្រធានក្រុមហ៊ុនវាយតម្លៃអចលនទ្រព្យ ឃីរៀលអុីស្ទេត និងជាអនុប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា បានឲ្យដឹងថា វិស័យអចលនទ្រព្យនៅកម្ពុជា ក្នុងឆ្នាំ២០១៦នេះ ហាក់ដូចជាមានលំនឹង មានន័យថា ស្ងាត់ជាងឆ្នាំ២០១៥ ដោយសារកត្តាមួយពាក់ព័ន្ធទាំងក្នុងនិងក្រៅប្រទេស ដូចជា កម្ពុជាជិតដល់រដូវកាលបោះឆ្នោតថ្នាក់ជាតិ ឆ្នាំ២០១៨ ។ មួយវិញទៀត នៅក្នុងឆ្នាំ២០១៥កន្លងមក វិស័យអចលនទ្រព្យមានការរីកចម្រើន និងមានសន្ទុះខ្លាំងរួចទៅហើយ ធ្វើឲ្យសកម្មភាពនៃវិស័យនេះនៅក្នុងឆ្នាំ២០១៦ មានសភាពស្ងាត់ ។ ម្យ៉ាងទៀត វិនិយោគិននៅខាងក្រៅភាគច្រើនហាក់ដូចជាកំពុងសម្លឹងមើលគោលនយោបាយរបស់អាស៊ានថា អាចមានការប្រើប្រាស់ និងអនុវត្តបានទូលំទូលាយប៉ុនណា ។ មិនតែប៉ុណ្ណោះ វិស័យអចលនទ្រព្យនៅបណ្ដាប្រទេសធំៗនៅអឺរ៉ុប ក៏បានធ្វើឲ្យប៉ះពាល់ដល់វិស័យអចលនទ្រព្យកម្ពុជា ក្នុងឆ្នាំ២០១៦នេះដែរ ។
លោកបន្តថា ៖ « ទាក់ទងនឹងវិនិយោគិនក្រៅប្រទេសដែលមកវិនិយោគលើវិស័យអចលនទ្រព្យនៅក្នុងប្រទេសកម្ពុជាកន្លងមក យើងកត់សម្គាល់ឃើញថា ចិនបានដើរតួនាទីខ្លាំងក្នុងការអភិវឌ្ឍវិស័យអចលនទ្រព្យក្នុងប្រទេសកម្ពុជា ។ បើក្រឡេកមើលកាលពីឆ្នាំ២០១៥កន្លងមកនេះ ចិនបានវ៉ាដាច់លើប្រទេសផ្សេងៗទៀត ហើយខ្ញុំជឿថា ក្នុងឆ្នាំ២០១៦ និងឆ្នាំខាងមុខ ចិននឹងបន្តចូលរួមអភិវឌ្ឍន៍វិស័យអចលនទ្រព្យ ។ បច្ចុប្បន្ននេះ យើងសង្កេតឃើញថា គម្រោងធំៗរបស់ចិនមិនដែលមានបញ្ហាអ្វីទេ ហើយក្នុងគម្រោងធំៗរបស់ចិនបានរួមបញ្ចូលទាំងវិស័យហេដ្ឋារចនាសម្ព័ន្ធ ក៏ដូចជាគម្រោងអភិវឌ្ឍន៍លំនៅឋាន និងអគារការិយាល័យជាដើម » ។
លោកបន្ថែមថា កត្តាសំខាន់ដែលកម្ពុជា អាចទាក់ទាញចិនបាននោះ គឺទំនាក់ទំនងរវាងរាជរដ្ឋាភិបាលកម្ពុជា និងរដ្ឋាភិបាលចិន ។ ជាក់ស្ដែង កាលពីពេលថ្មីៗនេះ ប្រធានាធិបតីចិនបានមកទស្សនកិច្ចនៅកម្ពុជា និងធ្វើគម្រោងធំៗជាច្រើនទៀតបន្តសហការជាមួយវិនិយោគិនកម្ពុជា ក្នុងការអភិវឌ្ឍបន្ថែម ។ លោកថា ៖ « បើងាកទៅមើលកាលពីឆ្នាំ២០១៥បន្តិចវិញ វិនិយោគិនបរទេសដែលចូលមកវិនិយោគនៅក្នុងប្រទេសកម្ពុជា ដូចជា ចិន ម៉ាកាវ ហុងកុង និងតៃវ៉ាន់ គឺបានរួមចំណែករហូតដល់៥២% ដែលមានកម្រិតខ្ពស់ជាងគេបំផុត បើធៀបនឹងបណ្ដាប្រទេសផ្សេងៗទៀត » ។
លោក សន សៀប បញ្ជាក់ថា បើមើល ទៅតាមស្ថានភាពជាក់ស្ដែង នៅឆ្នាំ២០១៧ ខាងមុខ ការរំពឹងទុកនៃវិស័យអចលនទ្រព្យអាចនឹងទ្រឹង ឬក៏មានការយឺតយ៉ាវជាងឆ្នាំ២០១៦។ ទោះបីយ៉ាងណា បើសិនជាកម្ពុជាមានលទ្ធភាព និងរៀបចំត្រៀមខ្លួនគ្រប់គ្រាន់ដើម្បីទាក់ទាញវិនិយោគិនចិនបន្ថែមទៀតនោះ នឹងធ្វើឲ្យវិស័យអចលនទ្រព្យនៅឆ្នាំ២០១៧ខាងមុខ មានកំណើនឡើងវិញ កុំឲ្យធ្លាក់ថែមទៀត ។
គួរបញ្ជាក់ថា វិស័យសំណង់ គិតពីឆ្នាំ២០០០រហូតមកដល់ត្រឹមខែសីហា ឆ្នាំ២០១៦នេះ ការបោះទុនវិនិយោគរបស់វិស័យឯកជនបរទេសមានផ្ទៃក្រឡាសំណង់សរុបចំនួន១២លាន៥សែនម៉ែត្រក្រឡា និងមានតម្លៃប៉ាន់ស្មានទុនវិនិយោគសរុបចំនួន៤.៣០០លានដុល្លារអាមេរិក ក្នុងនោះប្រទេសចិនជាប់ចំណាត់ថ្នាក់លេខ១ក្នុងចំណោមអ្នកវិនិយោគបរទេសមកពីចំនួន១៨ ៕
ចែករំលែកព័តមាននេះ