ម្ចាស់យំលែងចេញ! ផ្ទះ៣ល្វែងឆេះហ្មត់គ្មានសល់ ខូចខាតអស់ជិត៦ម៉ឺនដុល្លារ
- បាត់ដំបង
អគ្គិភ័យបានឆាបឆេះយ៉ាងសន្ធោរសន្ធៅ ដែលគេម្ចាស់ផ្ទះអះអាងថា ទំនងជាផ្ដើមចេញពីការទុស្សេខ្សែភ្លើង ដែលបានលេបត្របាក់
ខេត្តបាត់ដំបង ៖ អគ្គិភ័យបានឆាបឆេះយ៉ាងសន្ធោរសន្ធៅ ដែលគេម្ចាស់ផ្ទះអះអាងថា ទំនងជាផ្ដើមចេញពីការទុស្សេខ្សែភ្លើង ដែលបានលេបត្របាក់ផ្ទះលក់ចាប់ហួយអស់ចំនួន០៣ល្វែងជាប់ៗគ្នាខ្ទេចអស់គ្មានសល់ បង្កឱ្យមានការភ្ញាក់ផ្អើលកាលពីវេលាម៉ោង១១និង១០នាទីយប់ ថ្ងៃទី២៨ មិថុនា នៅក្នុងទីប្រជុំជនស្រុកស្រែមួយកន្លែង ស្ថិតក្នុងភូមិច្រាំងបាក់ ឃុំឃ្លាំងមាស ស្រុកបវេល ដែលប៉ាន់ប្រមាណជាទឹកប្រាក់ខាត់បង់អស់ជិត៦ម៉ឺនដុល្លារ។
បើតាមរបាយការណ៍មន្ត្រីមូលដ្ឋាន បានឲ្យដឹងថា ផ្ទះលក់ចាប់ហួយទាំង០៣ល្វែងនោះ ស្ថិតនៅជាប់ៗគ្នា ហើយក៏ត្រូវជាឪពុកនិងកូនដែរ ដែលមានទំហំផ្ទះសរុប ២០ម៉ែត្រx៣០ម៉ែត្រ ធ្វើពីឈើប្រក់ស័ង្កសី ដែលមានម្ចាស់ឈ្មោះ សំ ហុង ប្រុសអាយុ៦៣ឆ្នាំ(ឪពុក)។
លោក ទឹង ស៊ីនឿន នាយប៉ុស្ដិ៍នគរបាល ឃុំឃ្លាំងមាស បានប្រាប់ថា បើតាមសួរនាំម្ចាស់ផ្ទះនេះ ហាក់មិនបានដឹងថា មានអគ្គិភ័យកើតឡើងទេ រហូតទាល់តែមានអ្នកភូមិនាំគ្នាទៅគស់ជញ្ជាំងហៅ ទើបម្ចាស់ផ្ទះភ្ញាក់ពីដំណេក ហើយផ្អើលឆោឡោមមីមមើរើអីវ៉ាន់ តែហួសពេលទៅហើយ ព្រោះអគ្គិភ័យឆាបឆេះលឿនពេក។
បើតាមការបំភ្លឺពីសាក្សីនៅក្បែរនោះ បាននិយាយថា នៅវេលាពាក់កណ្ដាលអធ្រាត្រទៅហើយ ស្រាប់តែគេឃើញអណ្ដាតភ្លើងយ៉ាងសន្ធោសណ្ធៅ ឆេះផ្ទះលក់ហួយចំនួន០៣ល្វែងរបស់លោក សំ ហុង។ ភ្លាមៗនោះ គេស្មានថា ម្ចាស់ផ្ទះបានដឹងដែរ តែមិនឃើញម្ចាស់ផ្ទះស្រែកហៅឲ្យគេជួយ ទើបនាំគ្នាឆ្ងល់ក៏រត់ទៅគស់ជញ្ជាំងស្រែកហៅម្ចាស់ផ្ទះ ទើបគាត់ភ្ញាក់ទាំងមមីមមើផ្អើលឆោឡោតែម្ដង។
ប្រភពដដែលបានបញ្ជាក់ថា ពេលនោះ អ្នកភូមិបាននាំគ្នាចូលជួយពន្លត់ផង ជួយរំដោះអីវ៉ានផង តែមិនអាចជួយធ្វើអ្វីបានឡើយ ក្រៅពីជួយសែងស្រូវបានប្រហែល១០បាវ ព្រោះអណ្ដាតភ្លើងខ្លាំងក្លាពេក មិនអាចចូលទៅក្បែរបានឡើយ។
ចំណែកលោក ទឹង ស៊ីនឿន មេប៉ុស្ដិ៍ឃ្លាំងមាស បាននិយាយដែរថា ពេលនោះគ្មាននរណាអាចជួយបន្ធូរបន្ថយឥទ្ធិពលអគ្គិភ័យបានទេ សូម្បីរថយន្តបន្លត់អគ្គិភ័យ ក៏មកមិនទាន់ដែរ ព្រោះថា ផ្លូវឆ្ងាយ ហើយនៅក្នុងផ្ទះរងគ្រោះនោះសុទ្ធសឹងជាទំនិញចាប់ហួយ ជាពិសេសមានលក់សាំង និងលក់ហ្គាសយ៉ាងសម្បើមផងដែរ។
លោកបានបន្តថា អគ្គិភ័យហាក់មានល្បឿនលឿនបំផុត រីឯរថយន្តពន្លត់អគ្គិភ័យដែលមកដល់ បានត្រឹមបាញ់ជួយទប់ស្កាត់កុំឲ្យឆេះរាលដាលតែប៉ុណ្ណោះ ខណៈផ្ទះលក់ចាប់ហួយរបស់ឪពុក និងកូនទាំង០៣ល្វែងនោះ ក្លាយជាផេះអស់គ្មានសល់ទៅហើយ។
នៅក្នុងគ្រោះអគ្គិភ័យដ៏មហន្តរាយខាងលើនេះ បើតាមម្ចាស់ផ្ទះលោក សំ ហុង បាននិយាយថា មុនពេលមានអគ្គិភ័យកើតឡើង គាត់ហាក់មានអារម្មណ៍បានឮសំលេងផ្ទុះនៅម្ដុំចង្ក្រានបាយគាត់នៅខាងមុខ តែគាត់មិនបានចាប់អារម្មណ៍ថា មានអ្វីកើតឡើងទេ។ លុះមានអ្នកភូមិមកគស់ជញ្ជាំងហៅ ទើបគាត់ភ្ញាក់ ហើយក៏ឃើញអណ្ដាតភ្លើងឆេះយ៉ាងសន្ធោសន្ធៅពេញក្នុងផ្ទះបាត់ទៅហើយ។
គាត់និយាយប្រាប់សមត្ថកិច្ចថា ពេលនោះ កូនចៅរបស់គាត់បានព្យាយាមរំដោះទ្រព្យសម្បត្តិ និងអីវ៉ាន់នានាចេញពីផ្ទះដែរ តែមិនអាចធ្វើបានឡើយ ដោយសារអណ្ដាតភ្លើងឆេះខ្លាំងពេក។ ហើយអគ្គិភ័យនេះ គាត់សង្ស័យថា អាចបណ្ដាលមកពីការទុស្សេខ្សែភ្លើង ដែលគាត់បានឮសូរផ្ទុះដំបូងនៅម្ដុំសង្ក្រានបាយតែម្ដង។
បើតាមការផ្ដល់ព័ត៌មានបឋមអំពីតុល្យការ នៃការខាតបង់ដល់សមត្ថកិច្ចថា ក្រៅពីអីវ៉ាន់ចាប់ហួយគ្រប់មុខដែលលក់ដូរក្នុងផ្ទះទាំង០៣ល្វែង នៅមានទ្រព្យសម្បត្តិទាំងអស់ដែលនៅក្នុងផ្ទះ ក៏បានក្លាយជាផេះដែរ មានតែស្រូវប្រហែល១តោនប៉ុណ្ណោះដែលរំដោះបាន ព្រោះវានៅខាងក្រោយផ្ទះ។
គាត់បានប្រាប់សមត្ថកិច្ចថា ម៉ូតូចំនួន០៣គ្រឿង និងប្រាក់ខ្មែរចំនួន៣០លានរៀល ក៏ត្រូវអគ្គិភ័យលេបគ្មានសល់ដែរ ហើយបើគិតពីការខាតបង់ រួមទាំងផ្ទះ ទាំងអីវ៉ាន់ចាប់ហួយ និងទ្រព្យសម្បត្តិដទៃទៀត សរុបប្រហែលជិត៦ម៉ឺនដុល្លារ តែសំណាងល្អដែលមិនគ្រោះថ្នាក់ដល់កូនចៅធ្ងន់ធ្ងរឡើយ។
ទោះយ៉ាងណា បើតាមលោក ទឹង ស៊ីនឿន បានបញ្ជាក់ដែរថា អគ្គិភ័យនេះ បានធ្វើឲ្យម្ចាស់ផ្ទះរងរបួសស្រាល រីឯផ្ទះរបស់គាត់ទាំង០៣ល្វែងក៏បានឆេះរាបដល់ដីតែម្ដង។ ពេលនេះទាំងសមត្ថកិច្ច ទាំងអាជ្ញាធរដែនដី បាននិងកំពុងចុះពិនិត្យកន្លែងកើតហេតុជាថ្មី ដើម្បីសួរនាំ និងធ្វើកំណត់ហេតុជាក់លាក់អំពីទ្រព្យសម្បត្តិដែលខូចខាត ដោយសារអគ្គិភ័យនេះ៕
ចែករំលែកព័តមាននេះ