រាជធានីភ្នំពេញ ៖ នៅព្រឹកថ្ងៃអាទិត្យទី៤ ធ្នូ ខានស្អែកនេះ ប្រដាល់អន្តរជាតិរបស់ទូរទស្សន៍អាស៊ីអាគ្នេយ៍ ត្រូវបានគេរំពឹងថា នឹងកក្រើកទៀតហើយដោយសារសមាសភាពកីឡាករកម្ពុជា២រូបគឺ មាស ច័ន្ទមាន និង ឃីម បូរ៉ា បានសន្យាថា
រាជធានីភ្នំពេញ ៖ នៅព្រឹកថ្ងៃអាទិត្យទី៤ ធ្នូ ខានស្អែកនេះ ប្រដាល់អន្តរជាតិរបស់ទូរទស្សន៍អាស៊ីអាគ្នេយ៍ ត្រូវបានគេរំពឹងថា នឹងកក្រើកទៀតហើយដោយសារសមាសភាពកីឡាករកម្ពុជា២រូបគឺ មាស ច័ន្ទមាន និង ឃីម បូរ៉ា បានសន្យាថានឹងបំបាក់ធ្មុងកីឡាករថៃឱ្យបាន ខណៈកីឡាករថៃឯណោះវិញ ក៏ប្រកាសបែបនេះដូចគ្នា និងថាមានតែការប្រកួតជាក់ស្ដែងប៉ុណ្ណោះទើបអាចដឹងលទ្ធផលពិតប្រាកដ ។
ការប្រកួតរវាងកីឡាករទាំង៤រូបដែលនឹងធ្វើឡើងចាប់ពីម៉ោង៨ព្រឹកក្រោមការរៀបចំរបស់ទូរទស្សន៍អាស៊ីអាគ្នេយ៍នេះ ត្រូវគេរំពឹងថា នឹងមានអ្នកទស្សនាកកកុញដោយសារតែភាពជាក់ស្ដែងគឺព្រឹត្តិការណ៍នេះ ដំណើរការចំពេលថ្ងៃអាទិត្យថ្ងៃសម្រាក ដែលមានអ្នកទស្សនាច្រើនស្រាប់ ។ អ្នករៀបចំការប្រកួតបានអះអាងថា កីឡាករទាំង៤រូបមានបំណងប៉ះគ្នាយូរហើយ មុនពេលមានការសម្រេចរៀបចំព្រឹត្តិការណ៍អន្តរជាតិមួយនេះឲ្យពួកគេប្រកួតគ្នា ។ លោក ញាណ សុធី អ្នករៀបចំការប្រកួតប្រចាំនៅទូរទស្សន៍អាស៊ីអាគ្នេយ៍ថ្លែងថា ក្នុងចំណោមកីឡាករកម្ពុជា លោកបានសម្រេចចិត្តដាក់ ឃីម បូរ៉ា ដែលជាជើងខ្លាំងមកពីខេត្តបន្ទាយមានជ័យ និងជ្រកក្នុងក្លិបរស្មីភូមិគាបខេត្តបន្ទាយមានជ័យ ឱ្យឡើងប៉ះប្រកួតជាមួយកីឡាកថៃឈ្មោះណុំ សាតឹក ក្នុងនាមជាគូបើកឆាកអន្តរជាតិនៅព្រឹកថ្ងៃអាទិត្យខានស្អែក ។
លោកថា កីឡាករកម្ពុជាគូនេះ អាចចាត់ទុកថាជាជំនួបជើងខ្លាំងប៉ះជើងខ្លាំងនៅក្នុងពិភពប្រដាល់ ។ លោកជឿជាក់ទៅលើសមត្ថភាពពូកែគេច និងពូកែវាយសន្ធាប់របស់កីឡាករកម្ពុជារូបនេះ ទើបលោកសម្រេចចិត្តឱ្យគេឡើងប្រកួតជាមួយកីឡាករថៃខាងលើ បើទោះជាកីឡាករថៃមានសមត្ថភាពមិនអាចមើលស្រាលក្តី ។ លោកនិយាយថា កីឡាករថៃខ្លាំងប៉ុន្តែលោកនៅតែទុកចិត្តលើ ឃីម បូរ៉ា បើទោះជាមួយរយៈមុនគេមិនសូវបានឡើងរេញ ដែលបណ្ដាលឱ្យមានការភ័យបារម្ភរឿងធ្លាក់ដៃ ។ លោកថា កីឡាករថៃណុំ សាតឹក ធ្លាប់ប្រកួត៨៣លើក ឈ្នះ៦៥លើក ចាញ់១៧លើក និងស្មើ១លើក ក្នុងពេលដែលកីឡាករកម្ពុជា ធ្លាប់ប្រកួត៩២លើក ឈ្នះ៧៨លើក ចាញ់១២លើក និងស្មើ២លើក ដែលនេះគឺជាប្រវត្តិប្រកួតច្រើនជាងកីឡាករថៃទើបលោកទុកចិត្តពីជ័យជម្នះ ក្នុងពេលដែលកីឡាករ ឃីម បូរ៉ា ដែលជាជើងឯករង ក៏សន្យាមុនពេលផ្គូផ្គងថា នឹងប្រកួតឱ្យឈ្នះ ។
សម្រាប់កីឡាករ មាស ច័ន្ទមាន លោក ញាណ សុធី បញ្ជាក់ថា គេត្រូវប៉ះប្រកួតជាមួយកីឡាករជើងខ្លាំងថៃឈ្មោះយ៉ត សាយ៉ាម នៅក្នុងព្រឹត្តិការណ៍ប្រដាល់អន្តរជាតិនៅព្រឹកថ្ងៃអាទិត្យនោះដែរ ។ លោកថា ការប្រកួតរបស់គូនេះ នៅមិនទាន់ដឹងថា អ្នកណាល្អជាងអ្នកណានោះទេ ក្នុងពេលដែល មាស ច័ន្ទមាន មានការធ្លាក់ដៃជាងមុន ដែលធ្វើឱ្យអ្នកគាំទ្របាត់បង់ទំនុកចិត្តអស់មួយសន្ធឹក ។ លោកថា កីឡាករថៃធ្លាប់ប្រកួត៨២លើក ឈ្នះ៦៧លើក ចាញ់១៤លើក និងស្មើ១លើក រីឯកីឡាករកម្ពុជាធ្លាប់ប្រកួត១១៧លើក ឈ្នះ៨៨លើក ចាញ់២៦លើក និងស្មើ៣លើក ។ នៅក្នុងព្រឹត្តិការណ៍ប្រដាល់ពេលរសៀលនៅលើសង្វៀនអាស៊ីអាគ្នេយ៍ថ្ងៃអាទិត្យនោះដែរ ក៏មានការប្រកួតអន្តរជាតិរវាងកីឡាករជើងខ្លាំង និងជើងខ្លាំងផងដែរ៕
ចែករំលែកព័តមាននេះ