សហរដ្ឋអាមេរិក ៖ សេដ្ឋកិច្ចរបស់សហរដ្ឋអាមេរិកនាត្រីមាសទី៣ បានលូតលាស់លឿនជាងការគិតទុក និងលឿនជាងគេក្នុងរយៈពេល២ឆ្នាំកន្លងមកនេះ ដោយសារការចំណាយក្នុងស្រុកដ៏រឹងមាំ និងការនាំចេញ
សហរដ្ឋអាមេរិក ៖ សេដ្ឋកិច្ចរបស់សហរដ្ឋអាមេរិកនាត្រីមាសទី៣ បានលូតលាស់លឿនជាងការគិតទុក និងលឿនជាងគេក្នុងរយៈពេល២ឆ្នាំកន្លងមកនេះ ដោយសារការចំណាយក្នុងស្រុកដ៏រឹងមាំ និងការនាំចេញសណ្តែកសៀងកើនឡើង ។
ក្រសួងពាណិជ្ជកម្មសហរដ្ឋអាមេរិកបាននិយាយកាលពីថ្ងៃអង្គារថា ផលិតផលក្នុងស្រុកសរុប (GDP) ប្រចាំឆ្នាំ បានកើនឡើង៣,២% ច្រើនជាងការគិតទុកមុនដែលស្មើតែ២,៩%ប៉ុណ្ណោះ ។ នេះជាការលូតលាស់លឿនបំផុតតាំងពីត្រីមាសទី៣ ឆ្នាំ២០១៤មក និងបានជួយជំរុញការវិនិយោគផ្នែកអចលនទ្រព្យកើនឡើងផងដែរ ។
ទិន្នន័យពីផ្នែកអចលនទ្រព្យ ការលក់រាយ និងផ្នែកផលិតកម្មបង្ហាញថា សេដ្ឋកិច្ចរក្សាកម្លាំងជំរុញបានល្អ ហើយសូម្បីតែការនាំចេញក៏បង្ហាញពីសញ្ញាល្អដែរ ព្រោះមានការធ្លាក់ចុះនៃតម្លៃប្រាក់ដុល្លារ ។
ទំនិញនៅក្នុងស្តុកមិនបានកើនឡើងដូចការគិតឡើយ ប៉ុន្តែមិនមែនលក់ទំនិញមិនចេញទេ មានន័យថា ពួកគេនឹងទទួលបានការកុម្មង់ថ្មីៗទៀត ដែលនឹងជំរុញដល់ការលូតលាស់សេដ្ឋកិច្ចក្នុងត្រីមាសខាងមុខ ។
ជាមួយគ្នានេះ ក្រសួងខាងលើក៏បាននិយាយថា ការចំណាយក្នុងស្រុក ត្រូវបានរាប់បញ្ចូល២ភាគ៣នៃសកម្មភាពសេដ្ឋកិច្ចរបស់អាមេរិក ក៏បានកើនឡើង២,៨%ផងដែរក្នុងត្រីមាសទី៣ ។
ការចំណាយផ្នែកអាជីវកម្មលើឧបករណ៍បានធ្លាក់ចុះដល់៤,៨%ឯណោះ ច្រើនជាងការគិតទុកមុនដែលស្មើនឹង២,៧% ។ នេះបង្ហាញពីការធ្លាក់ចុះនៃការចំណាយលើឧបករណ៍៤ត្រីមាសជាប់ៗគ្នា ។
ដោយមានការកើនឡើងប្រមាណ៧,៦%នៃប្រាក់ចំណូលក្រុមហ៊ុន ការវិនិយោគផ្នែកអាជីវកម្មនៅតែមានសង្ឃឹមក្នុងការងើបឡើងវិញ ។ គួរបញ្ជាក់ថា ប្រាក់ចំណូលក្រុមហ៊ុនបានធ្លាក់ចុះ១,៩% ក្នុងត្រីមាសទី២ ។
ជាចុងក្រោយ ការកើនឡើងនៃការនាំចេញគឺនៅត្រឹម១០,១%ដដែល ជាល្បឿនលឿនជាងគេតាំងពីត្រីមាសទី៤ ឆ្នាំ២០១៣មក ។ ការនាំចេញកើនឡើងនេះ មួយផ្នែកធំមកពីការនាំចេញសណ្តែកសៀង ព្រោះតែការប្រមូលផលក្នុងប្រទេសអាហ្សង់ទីន និងប្រេស៊ីលមានការអន់ថយ ៕
ចែករំលែកព័តមាននេះ