ខេត្តប៉ៃលិន ៖ បន្ទាប់ពីស្ងប់ស្ងាត់អស់មួយរយៈ បច្ចុប្បន្ននេះគេសង្កេតឃើញថា នៅមានក្រុមឈ្មួញអាចបន្តរកគ្រាប់ត្បូងដ៏មានតម្លៃ ដើម្បីយកទៅលក់ឱ្យអាជីវករកែច្នៃ ធ្វើជាគ្រឿងអលង្ការទៅលក់បន្តបាន ។ ជាពិសេស ច្នៃលក់ឱ្យភ្ញៀវទេសចរជាតិ-អន្តរជាតិ ដែលធ្វើដំណើរមកពីបណ្តាខេត្តនានា ចូលមកលេងកម្សាន្តក្នុងទឹកដីខេត្តត្បូងពេជ្រ កាលពីអំឡុងរដូវបុណ្យភ្ជុំបិណ្ឌ និងចូលឆ្នាំខ្មែរផងដែរ ។
បើតាមប្រភពពីស្ត្រីជាអាជីវករលក់ត្បូងម្នាក់ ឈ្មោះម៉ៅ សោភា អាយុ៣០ឆ្នាំ រស់នៅភូមិវត្ត សង្កាត់ប៉ៃលិន ក្រុងប៉ៃលិន បានឱ្យដឹងថា រហូតមកទល់ពេលនេះ គ្រាប់ត្បូងនៅក្នុងខេត្តប៉ៃលិនមិនទាន់អស់នៅឡើយទេ គឺអាចសេសសល់សម្រាប់ឱ្យឈ្មួញជីក
កកាយយកទៅលក់ជូនអាជីវករកែច្នៃ ដាក់តាំងក្នុងទូលក់ឱ្យប្រជាពលរដ្ឋ ដែលនិយមគ្រឿងអលង្ការ យកទៅប្រើប្រាស់លំអរូបរាងកាយ ។
ត្បូងប៉ៃលិនមាន២ប្រភេទ គឺត្បូងកណ្តៀង និងត្បូងទទឹម ហើយតម្លៃលក់ ក៏អាស្រ័យទៅលើត្បូងនោះដែរ ។ បើសិនជាត្បូងល្អ ក្នុងមួយការ៉ាត់ អាចលក់បាន១០០ដុល្លារ ឬក៏លើសនេះ ព្រោះមានត្បូងមួយចំនួនដែលមានទំហំធំ គេអាចលក់បានរហូតដល់រាប់ម៉ឺនដុល្លារឯណោះ ។
បើតាមកម្មករច្នៃត្បូងម្នាក់បានឱ្យដឹងថា ការខាត់ច្នៃគ្រាប់ត្បូង ត្រូវតែខិតខំប្រឹងប្រែងផ្ចិតផ្ចង់យកចិត្តទុកដាក់ ដូចគ្នាទៅនឹងការយកមាសច្នៃធ្វើខ្សែ.កដែរ ដោយច្នៃម៉ូតគ្រប់បែបយ៉ាង ដើម្បីទាក់ទាញភ្នែកអតិថិជន ពេលឃើញទាក់ចិត្តអាចទិញយកទៅប្រើប្រាស់ផ្ទាល់ខ្លួន ឬជួញដូរពីខេត្តមួយទៅខេត្តផងដែរ ។ ការច្នៃត្បូង ក្នុង១ការ៉ាត់ អាចទទួលបានប្រាក់ឈ្នួល១ដុល្លារ ហើយក្នុងមួយថ្ងៃៗ អាចធ្វើបានច្រើន សម្រាប់ឱ្យថៅកែ ដាក់តាំងលក់នៅក្នុងទូ មុខផ្ទះដាក់បង្ហាញភ្ញៀវ ។
ចែករំលែកព័តមាននេះ