រាជធានីភ្នំពេញ ៖ ប្រធានគនបក្សសង្គ្រោះជាតិ លោសម រង្ស៊ី បានសម្តែងការសាទរចំពោះលទ្ធផលចុះឈ្មោះបោះឆ្នោតបញ្ជីថ្មីឆ្នាំ២០១៦ និងថាគណបក្សសង្គ្រោះជាតិ (CNRP) នឹងឈ្នះឆ្នោតនៅពេលខាងមុខនេះ ។
នៅលើបណ្តាញសង្គមហ្វេសប៊ុកលោក សម រង្ស៊ី បានហៅលទ្ធផលនៃការចុះឈ្មោះបោះឆ្នោតឆ្នាំ ២០១៦ ថាជាបើកផ្លូវផ្តល់ជ័យឲ្យជំនះគណបក្សសង្គ្រោះជាតិ ក្នុងការបោះឆ្នោតឆ្នាំ ២០១៧ និង ២០១៨ ទោះជាពលរដ្ឋខ្មែរជាង ១លាននាក់ មិនបានចុះឈ្មោះបោះឆ្នោតថ្មីៗនេះ ដោយសារតែស្នាក់នៅក្រៅប្រទេស ក៏យើងអាចសប្បាយរីករាយ អំពីលទ្ធផលសរុបនៃដំណើរការចុះឈ្មោះអ្នកបោះឆ្នោតក្នុងរយៈពេល ៣ ខែកន្លងមកនេះ។
លោកបញ្ជាក់ថា«ខ្ញុំសូមកោតសរសើរអស់ពីដួងចិត្តចំពោះពលរដ្ឋខ្មែរគ្រប់រូប ដែលបានខិតខំទៅចុះឈ្មោះឲ្យទាល់តែបាន ដើម្បីរក្សាសិទ្ធិបោះឆ្នោតរបស់ខ្លួន ហើយបំពេញកាតព្វកិច្ចរបស់ខ្លួន ក្នុងនាមជាពលរដ្ឋពេញលក្ខណៈ ។ ជាពិសេស ខ្ញុំសូមសម្តែងការកោតសរសើរដ៏លើសលប់ ចំពោះស្ត្រីខ្មែរ ៤.២១៣.៤២៧ នាក់ តំណាងឲ្យ ៥៣,៥ ភាគរយ នៃចំនួនសរុបប្រជាពលរដ្ឋ ៧.៨៧៣.១៩៤ នាក់ ដែលបានទៅចុះឈ្មោះបោះឆ្នោតប្រកបដោយជោគជ័យ»។
ជាមួយគ្នានោះដែរមេបក្សប្រឆាំងដែលកំពុងនិរទេសខ្លួននៅក្រៅប្រទេសក៏បានលើកឡើងទៀតថា ការបោះឆ្នោតនីមួយៗ មានលក្ខណៈសេរីនិងយុត្តិធម៌ ហើយឆ្លុះបញ្ចាំងឆន្ទៈប្រជារាស្ត្រពិតប្រាកដ លុះត្រាតែបញ្ជីឈ្មោះអ្នកបោះឆ្នោត មានភាពសុក្រឹត ច្បាស់លាស់ និងទូលំទូលាយ ។ លោកសម រង្ស៊ី បន្តថាបញ្ជីឈ្មោះអ្នកបោះឆ្នោត សម្រាប់ការបោះឆ្នោតឆ្នាំ ២០១៧ និង ២០១៨ មានលក្ខណៈល្អប្រសើរគួរឲ្យកត់សម្គាល់ បើប្រៀបធៀបទៅនឹងបញ្ជីឈ្មោះអ្នកបោះឆ្នោត សម្រាប់ការបោះឆ្នោតឆ្នាំ ២០១៣ កន្លងទៅ។
លោកសម រង្ស៊ី ក៏បានបញ្ជាក់ពីមូលហេតុដែលលទ្ធផលល្អសម្រាប់ការចុះឈបោះឆ្នាមានដូចជា ៖ ទី១- ចំពោះបញ្ជីឈ្មោះអ្នកបោះឆ្នោតឆ្នាំ ២០១៣ មានពលរដ្ឋរស់នៅក្នុងស្រុក ដែលមានសិទ្ធិបោះឆ្នោតជាង ១,២ លាននាក់ (លើសរុប ជាង ៩ លាននាក់) ដែលត្រូវបានគេរារាំង ឬ បង្កលក្ខណៈលំបាកគ្រប់បែបយ៉ាង មិនឲ្យបានចុះឈ្មោះក្នុងបញ្ជី។ តែសម្រាប់បញ្ជីឈ្មោះអ្នកបោះឆ្នោត ឆ្នាំ ២០១៦ នេះ ពលរដ្ឋដែលមានឆន្ទៈចង់ចុះឈ្មោះ ទទួលបានលទ្ធភាពចុះឈ្មោះយ៉ាងងាយស្រួល និងទូលំទូលាយជាងមុន ហើយចំនួនអ្នកដែលបានចុះឈ្មោះជាក់ស្តែង ក៏បានកើនឡើងគួរឲ្យកត់សម្គាល់ ។ ទី២- ក្នុងបញ្ជីឈ្មោះអ្នកបោះឆ្នោតឆ្នាំ ២០១៣ ប្រជាពលរដ្ឋមួយចំនួនធំ ដែលបានចុះឈ្មោះពីដើមទី ត្រូវបានគេលុបឈ្មោះពីបញ្ជី ឬត្រូវបានគេលួចឈ្មោះឲ្យអ្នកដទៃយកទៅបោះឆ្នោតជំនួស។ តែចាប់ពីឆ្នាំ ២០១៦ នេះទៅ គ្មាននរណាអាចលួចលុបឈ្មោះ ឬលួចយកឈ្មោះប្រជាពលរដ្ឋ ដែលបានចុះឈ្មោះបោះឆ្នោតត្រឹមត្រូវហើយឲ្យទៅអ្នកដទៃទៀតយកទៅបោះឆ្នោតជំនួស ដោយសារតែឥឡូវនេះ មានការប្រើប្រព័ន្ធកុំព្យូទ័រ ដែលមិនអនុញ្ញាតឲ្យមានភាពមិនប្រក្រតី និងទង្វើទុច្ចរិតដូចមុនទៀតទេ។ ទី៣- ក្នុងបញ្ជីឈ្មោះអ្នកបោះឆ្នោតឆ្នាំ ២០១៣ មានឈ្មោះខ្មោច និងឈ្មោះស្ទួន ជាង១លានឈ្មោះ ដែលគេបានយកទៅប្រើប្រាស់ ដើម្បីបំប៉ោងចំនួនសន្លឹកឆ្នោតឲ្យគណបក្សកាន់អំណាច។ តែចាប់ពីឆ្នាំ ២០១៦ នេះទៅ ឈ្មោះខ្មោច និងឈ្មោះស្ទួនទាំងនោះ ត្រូវបានប្រព័ន្ធកុំព្យូទ័រជម្រះពីបញ្ជីអស់ហើយ ដោយសារតែមានការចុះឈ្មោះឡើងវិញសាជាថ្មី ដែលតម្រូវឲ្យមានរូបថត និងស្នាមម្រាមដៃចំពោះប្រជាពលរដ្ឋម្នាក់ៗ ដែលមកចុះឈ្មោះ។ ដូច្នេះ មិនអាចមានឈ្មោះខ្មោចបានទេ (ដោយសារខ្មោចគ្មានស្នាមម្រាមដៃ) ហើយក៏មិនអាចមានឈ្មោះស្ទួនបានទេ ពីព្រោះមនុស្សម្នាក់ៗ មានស្នាមម្រាមដៃខុសគ្នាទាំងអស់ ហើយបើបុគ្គលណាម្នាក់ចង់ចុះឈ្មោះ ២ ដង កុំព្យូទ័រនឹងសម្គាល់ស្នាមម្រាមដៃដដែលភ្លាម ។ ទី៤- នៅឆ្នាំ ២០១៣ តួលេខពលរដ្ឋដែលបានទៅបោះឆ្នោតជាក់ស្តែង មានចំនួនត្រឹមតែ ៦.៦២៧.១៥៩ នាក់ប៉ុណ្ណោះ ហើយតួលេខនេះ ថែមទាំងមានលក្ខណៈមិនសុក្រឹត ពីព្រោះក្នុងនោះ មានមនុស្សបន្លំ ឬខ្មោចជាច្រើន ដោយសារពេលនោះមិនមានការពិនិត្យរូបថត និងស្នាមម្រាមដៃ។ តែសម្រាប់បញ្ជីឈ្មោះរៀបចំនៅឆ្នាំ ២០១៦ នេះ មានពលរដ្ឋពិតប្រាកដ (អត់មានខ្មោចទេ) ចំនួនរហូតដល់ ៧.៨៧៣.១៩៤ នាក់ ហើយក្នុងនោះម្នាក់ៗចុះឈ្មោះបានតែម្តងទេ (គ្មានឈ្មោះស្ទួនទេ)។ ជាសន្និដ្ឋាន ប្រៀបធៀបទៅនឹងបញ្ជីឈ្មោះអ្នកបោះឆ្នោតចាស់ (២០១៣) បញ្ជីឈ្មោះអ្នកបោះឆ្នោតថ្មី (២០១៦) ល្អប្រសើរជាងឆ្ងាយណាស់ គិតទាំងបរិមាណ ទាំងគុណភាព។ កត្តាជាមូលដ្ឋាននេះ ជាហេតុធ្វើឲ្យការបោះឆ្នោត ឆ្នាំ ២០១៧ និង ២០១៨ នឹងមានលក្ខណៈល្អប្រសើរជាងការបោះឆ្នោតឆ្នាំ ២០១៣ ឆ្ងាយណាស់។ ដោយសារតែ មានអ្នកចុះឈ្មោះបោះឆ្នោតថ្មីជាច្រើន (ចំណុចទី១) ហើយឈ្មោះអ្នកបោះឆ្នោតទាំងនោះ ត្រូវបានការពារត្រឹមត្រូវ (ចំណុចទី២) សម្លេងគាំទ្រគណបក្សសង្គ្រោះជាតិ នឹងកើនឡើងយ៉ាងតិច ១ លានសម្លេង។ ដោយសារតែ ឈ្មោះខ្មោច និងឈ្មោះស្ទួន ត្រូវបានជម្រះពីបញ្ជី (ចំណុចទី៣) សម្លេងគាំទ្រគណបក្សប្រជាជនកម្ពុជា នឹងថយចុះយ៉ាងតិច ១ លានសម្លេង។ អ្នកបោះឆ្នោតពិតប្រាកដដែលមានឧត្តមគតិច្បាស់លាស់មានចំនួនកាន់តែច្រើន (ចំណុចទី៤) លទ្ធផលបោះឆ្នោតកាន់តែល្អសម្រាប់គណបក្សសង្គ្រោះជាតិ។ សរុបទាំងអស់ទៅ គណបក្សសង្គ្រោះជាតិ នឹងទទួលសំឡេងឆ្នោត លើសគណបក្សប្រជាជនកម្ពុជា យ៉ាងតិច២ លានសំឡេង។ យើងនឹងឃើញពន្លឺប្រជាធិបតេយ្យ និងយុត្តិធម៌នៅពេលនោះ»។
សួមបញ្ជាក់ថា បើតាមសេចក្តីប្រកាសព័ត៌មានរបស់គណៈកម្មាធិការជាតិរៀបចំការបោះឆ្នោត (គ.ជ.ប) ចាប់តាបពីថ្ងៃទី០១ ខែកញ្ញា ដល់ថ្ងៃទី៣០ វិច្ឆិកាឆ្នាំ២០១៦ គ.ជ.ប. ទទួលបានពលរដ្ឋចុះឈ្មោះបោះឆ្នោតមានចំនួន ៧,៨៧៣,១៩៤នាក់ ស្រីមានចំនួន ៤,២១៣, ៤២៧ នាក់ ស្មើនឹង៨១.៤៧%នៃចំនួនប្រជាពលរដ្ឋដែលមានអាយុចាប់ពី១៨ ឡើងទៅ សរុបចំនួន៩,៦៦៤,២១៦ នាក់ នៃចំនួនរាជធានី ខេត្តទាំង២៥ ។
ជុំវិញការលើកឡើងរបស់មេបក្សប្រឆាំងខាងលើនេះ មិនទាន់មានប្រតិកម្មភ្លាមៗនៅឡើយទេពីមន្ត្រីជាន់ខ្ពស់គណបក្សប្រជាជនកម្ពុជា ៕
ចែករំលែកព័តមាននេះ