ខេត្តបាត់ដំបង ៖ បុរសម្នាក់ភ័យស្ទើរលស់ព្រលឹង បន្ទាប់ពីគាត់ប្រទះឃើញក្បាលគ្រាប់ផ្លោងជាច្រើនគ្រាប់កប់ក្នុងគំនរដីដែលគាត់ទិញយកមកចាក់សាងសង់ផ្ទះ កាលពីវេលាម៉ោង១រសៀលថ្ងៃទី២៧ មិថុនា នៅចំណុចភូមិរំចេក៤ សង្កាត់រតនៈ ក្រុងបាត់ដំបង ដែលមានស្ថានភាពច្រែះរិចរិលទៅហើយ…
ខេត្តបាត់ដំបង ៖ បុរសម្នាក់ភ័យស្ទើរលស់ព្រលឹង បន្ទាប់ពីគាត់ប្រទះឃើញក្បាលគ្រាប់ផ្លោងជាច្រើនគ្រាប់កប់ក្នុងគំនរដីដែលគាត់ទិញយកមកចាក់សាងសង់ផ្ទះ កាលពីវេលាម៉ោង១រសៀលថ្ងៃទី២៧ មិថុនា នៅចំណុចភូមិរំចេក៤ សង្កាត់រតនៈ ក្រុងបាត់ដំបង ដែលមានស្ថានភាពច្រែះរិចរិលទៅហើយ ។
សេចក្ដីរាយការណ៍បានឲ្យដឹងថា ពលរដ្ឋឈ្មោះ សៀន ជីវ ភេទប្រុស អាយុ៤៧ឆ្នាំ ជាអ្នកប្រទះឃើញក្បាលគ្រាប់កាំភ្លើងត្បាល់ទាំងនោះ នៅពេលគាត់កាយគំនរអាចម៍ដីចាក់សាងសង់ផ្ទះ។ គ្រាប់កាំភ្លើងធំទាំងនោះរួមមាន៖ ១,ក្បាលគ្រាប់ធុន១៣០មម ចំនួន០២គ្រាប់ ២,ក្បាលគ្រាប់ធុន១២០មម ចំនួន០១គ្រាប់ ៣,ក្បាលគ្រាប់ធុន១០០មម ចំនួន០៣គ្រាប់ ៤,ក្បាលគ្រាប់ធុន១០៥មម ចំនួន០២គ្រាប់ និង ៦,កន្ទុយគ្រាប់ B41 ចំនួន០១គ្រាប់។
បើតាមបំភ្លឺពីម្ចាស់ផ្ទះ លោក សៀន ជីវ បានប្រាប់សមត្ថកិច្ចថា គាត់បានប្រទះឃើញក្បាលគ្រាប់កាំភ្លើងធំទាំងនេះនៅក្នុងកំនរដី ដែលគាត់ទិញយកមកចាក់ធ្វើផ្ទះ។ គាត់បានប្រទះឃើញ នៅពេលកាយយកអាចម៏ដីនោះ ហើយមានការភ័យរន្ធត់នៅពេលប្រទះឃើញក្បាលគ្រាប់បែបនេះ និងបានកាយរកឃើញប្រមូលទុក រួចគាត់រាយការណ៏ប្រាប់សមត្ថកិច្ចតែម្ដង ។
មន្ត្រីរដ្ឋបាលប៉ុស្តិ៍រតនៈ ដែលចុះពិនិត្យកន្លែងកើតហេតុ បានប្រាប់ថា ក្បាលគ្រាប់ទាំងនោះមានសភាពច្រែះរិចរិលអស់ទៅហើយ ។ មន្ត្រីដដែលបានបញ្ជាក់ថា បើតាមការសួរនាំម្ចាស់ផ្ទះ គាត់បានប្រាប់ថា ក្បាលគ្រាប់ទាំងនោះនៅក្នុងគំនរអាចម៍ដី ដែលគាត់ទិញពីរថយន្តដឹកយកមកចាក់ដើម្បីធ្វើផ្ទះ មិនមែនគាត់ជីកដីប្រទះឃើញទេ តែគាត់ក៏មិនបានដឹងថា តើរថយន្តដឹកដីនោះយកពីណាមកដែរ ? បើតាមមន្ត្រីប៉ុស្ដ៏ដដែលបានបញ្ជាក់ថា ក្រោយការចុះត្រូតពិនិត្យ ក្បាលគ្រាប់ទាំងនោះត្រូវបានប្រគល់ជូនអង្គភាពកំចាត់មីន ស៊ីម៉ាក់ យកទៅកំទេចចោលហើយ៕
ចែករំលែកព័តមាននេះ