រាជធានីភ្នំពេញ ៖ ការប្រកួតប្រដាល់មិត្តភាពអន្តរជាតិកម្ពុជា-ថៃ នៅលើសង្វៀនទូរទស្សន៍ស៊ីធីអិន និងស៊ីអិនស៊ីថ្ងៃសៅរ៍ទី៣ ធ្នូ សប្តាហ៍នេះប្រជុំដោយកីឡាករខ្លាំងៗជាច្រើនគូដែលត្រូវជួបគ្នាបង្ហាញវិជ្ជាគុនជូន
រាជធានីភ្នំពេញ ៖ ការប្រកួតប្រដាល់មិត្តភាពអន្តរជាតិកម្ពុជា-ថៃ នៅលើសង្វៀនទូរទស្សន៍ស៊ីធីអិន និងស៊ីអិនស៊ីថ្ងៃសៅរ៍ទី៣ ធ្នូ សប្តាហ៍នេះប្រជុំដោយកីឡាករខ្លាំងៗជាច្រើនគូដែលត្រូវជួបគ្នាបង្ហាញវិជ្ជាគុនជូនទស្សនិកជនបានទស្សនានាថ្ងៃសម្រាកចុងសប្តាហ៍ ។
សម្រាប់ការប្រកួតប្រដាល់អន្តរជាតិនៅលើសង្វៀនទូរទស្សន៍ស៊ីធីអិននាថ្ងៃសៅរ៍នោះមានចំនួន២គូគឺកីឡាករ ទេស ឧត្តម មកពីក្លិបកងពលតូចលេខ៧០ ប្រកួតជាមួយកីឡាករថៃឈ្មោះ កៅមាំងកន វ៉.ភែងវិសេតយីម ក្នុងប្រភេទទម្ងន់៦៣,៥គីឡូក្រាម និងកីឡាករ ឆៃ សារ៉ា មកពីសមាគមកីឡាប្រដាល់ក្រសួងការពារជាតិ ប្រកួតជាមួយកីឡាករថៃឈ្មោះ វ៉ាត់ធារ៉ាក់ដេត ស.ដានឆ័យ ក្នុងប្រភេទទម្ងន់៦៥គីឡូក្រាម ។
ទេស ឧត្តម ដែលធ្លាប់ប្រកួតបាន២៨ដង ឈ្នះ១៥ដង ចាញ់១២ដង ស្មើ១ដង និងធ្លាប់ផ្តួលគូប្រកួតឱ្យសន្លប់បាន២ដង នឹងជួបប្រកួតជាមួយកីឡាករថៃដែលធ្លាប់ប្រកួតបាន៨២ដង ឈ្នះ៦៥ដង ចាញ់១៥ដង ស្មើ២ដង និងធ្លាប់ផ្តួលគូប្រកួតឱ្យសន្លប់បាន១០ដង ។ កីឡាករថៃរូបនេះមិនត្រឹមតែមានប្រវត្តិប្រកួតច្រើនជាងទេស ឧត្តម ប៉ុណ្ណោះនោះទេ ថែមទាំងមិនធ្លាប់មកប្រកួតនៅស្រុកខ្មែរពីមុនមកទៀតផង ដូច្នេះសម្រាប់ការជួបគ្នាលើកនេះគេមិនដឹងថា ទេស ឧត្តម អាចទៅរួចឬយ៉ាងណាទេ ។
មួយគូទៀត ឆៃ សារ៉ា ធ្លាប់ប្រកួតបាន៣៦ដង ឈ្នះ២៩ដង ចាញ់៥ដង ស្មើ២ដង និងផ្តួលគូប្រកួតឱ្យសន្លប់នៅលើសង្វៀនបាន២០ដងនឹងជួបប្រកួតជាមួយកីឡាករថៃដែលធ្លាប់ប្រកួតបាន៨៥ដង ឈ្នះ៦៣ដង ចាញ់១៧ដង ស្មើ៥ដង និងធ្លាប់ផ្ដួលគូប្រកួតឱ្យសន្លប់បាន២០ដង ។ បើយោងតាមប្រវត្តិ ឆៃ សារ៉ា បើសិនជាចង់យកឈ្នះកីឡាករថៃរូបនេះ ប្រហែលជាពិបាកបន្តិច។
ចំណែកគូប្រកួតមិត្តភាពធម្មតាវិញមានកីឡាករ ង៉ែត វុធ មកពីក្លិបកងទ័ពពិសេសឆត្រយោង៩១១ ប្រកួតជាមួយកីឡាករ អៀង សេងលាភ មកពីក្លិបដួងសែនសុខ ។ កីឡាករ សេក រតនា មកពីក្លិបអង្គរមានជ័យ ខេត្តសៀមរាប ប្រកួតជាមួយកីឡាករ ចាត ស៊ីថាន់ មកពីក្លិបអប់រំកាយស្រុកអន្លង់វែង ។ កីឡាករ យុគ យក្សផ្លែ មកពីក្លិបបុរីរាជសីហ៍ ប្រកួតជាមួយកីឡាករ បឺត សង្ឃឹម មកពីក្លិបរ៉ាហាប់ស្វាយប៉ាក ។
ដោយឡែកសមាសភាពគូប្រកួតប្រដាល់ នៅលើសង្វៀនទូរទស្សន៍ស៊ីអិនស៊ី ពេលយប់ថ្ងៃសៅរ៍នេះដែរ មានកីឡាករ ហ៊ឹម សេរី មកពីក្លិបតាព្រហ្មមានជ័យ ដែលធ្លាប់ប្រកួតបាន៤៧ដង ឈ្នះ៤២ដង ចាញ់៤ដង ស្មើ១ដង និងផ្តួលគូប្រកួតឱ្យសន្លប់បាន៨ដង នឹងជួបប្រកួតជាមួយកីឡាករថៃឈ្មោះតូតូ ផ.មឿងជួនថង ក្នុងប្រភេទទម្ងន់៥១គីឡូក្រាម ។ កីឡាករថៃរូបនេះធ្លាប់ប្រកួត៨១ដង ឈ្នះ៦០ដង ចាញ់១៨ដងនិងធ្លាប់ផ្តួលគូប្រកួតឱ្យសន្លប់បាន៨ដង ។
មួយគូទៀតកីឡាករ ឡុង សុវណ្ណឌឿន មកពីក្លិបសាលវ័ន្តកីឡា ដែលធ្លាប់ប្រកួតបាន៦០ដង ឈ្នះ៤១ដង ចាញ់១២ដង ស្មើ៧ដង និងផ្ដួលគូប្រកួតឱ្យសន្លប់បាន២០ដង នឹងជួបប្រកួតជាមួយកីឡាករថៃឈ្មោះ តៈវ៉ាន់ឆាយ ហ៊ានរ៉ាវី ក្នុងប្រភេទទម្ងន់៦៩គីឡូក្រាម ។ កីឡាករថៃរូបនេះធ្លាប់ប្រកួតបាន៩០ដង ឈ្នះ៧០ដង ចាញ់១៧ដង ស្មើ៣ដង និងផ្ដួលគូប្រកួតឱ្យសន្លប់បាន១៥ដង។
ចំណែកគូប្រកួតមិត្តភាពធម្មតាវិញមានកីឡាករ ជឹម សារ៉ាត់ មកពីក្លិបតាព្រហ្មមានជ័យ ប្រកួតជាមួយកីឡាករ ចាត សីហា មកពីក្លិបអប់រំកាយស្រុកអន្លង់វែង ។ កីឡាករ ហេង វិឆ័យ មកពីក្លិបកងពលតូចលេខ៧០ ប្រកួតជាមួយកីឡាករ ផុន ផាន់ណា មកពីក្លិបអប្សរាគុនខ្មែរ ៕
ចែករំលែកព័តមាននេះ