រាជធានីភ្នំពេញ ៖ នៅរសៀលថ្ងៃសៅរ៍ ទី៣ ធ្នូ ខានស្អែកនេះ ប្រដាល់អន្តរជាតិរបស់ភេសជ្ជៈខារ៉ាបាវ នៅតែបើកការប្រកួតរវាងកីឡាករកម្ពុជា និងបរទេសដដែល ខណៈដែលព្រឹត្តិការណ៍នេះ នៅមិនទាន់ចាប់ផ្ដើមការប្រកួតដណ្ដើមជើងឯកអន្តរជាតិសម្រាប់រដូវកាលទី២នៅឡើយ ។ កីឡាករ សូត្រ ប៊ុនធី និង សេក គឹមរួន នឹងក្លាយជាបេក្ខភាព២រូបដែលត្រូវឡើងប្រកួតជាមួយកីឡាករថៃ ដើម្បីសាកល្បងសមត្ថភាពគ្នានៅលើសង្វៀនខារ៉ាបាវ ។
ការប្រកួតដែលនឹងចាប់ផ្ដើមឡើងពីម៉ោង២រសៀល ក្រោមការរៀបចំរបស់ក្រុមហ៊ុនភេសជ្ជៈខារ៉ាបាវ លើសង្វៀនទូរទស្សន៍អាស៊ីអាគ្នេយ៍នេះ ត្រូវគេឃើញមានការរំពឹងខ្ពស់មិនខុសពីការប្រកួតអន្តរជាតិកាលពីសប្ដាហ៍មុនៗនោះទេ ដោយសារតែភាពជាក់ស្ដែង គឺព្រឹត្តិការណ៍នេះ នៅមុនពេលការប្រកួតដណ្ដើមខ្សែក្រវាត់ដំណើរការ ។ កីឡាករកម្ពុជា២រូប គឺ សូត្រ ប៊ុនធី និង សេក គឹមរួន គឺជាគូប្រកួតស៊ីសាច់ហុតឈាមជាមួយកីឡាករថៃនៅរសៀលថ្ងៃសៅរ៍នោះ ។ អ្នករៀបចំការប្រកួតបានអះអាងថា កីឡាករទាំង៤មានបំណងប៉ះគ្នាយូរហើយ មុនពេលមានការសម្រេចរៀបចំព្រឹត្តិការណ៍អន្តរជាតិខារ៉ាបាវ ឲ្យពួកគេប្រកួតគ្នា។ ក្នុងនោះភាគីកីឡាករកម្ពុជាបានទាំងសុំខ្លួនឯងក្នុងការចង់សាកកណ្ដាប់ដៃគ្នាជាមួយកីឡាករថៃដែលត្រូវមកប្រកួតតាំងពីឮមានការផ្គូផ្គងនោះផង ដោយមិនមែនជាការផ្គូផ្គងបែបចាប់បង្ខំនោះឡើយ។
លោក ញាណ សុធី អ្នករៀបចំការប្រកួតប្រចាំនៅទូរទស្សន៍អាស៊ីអាគ្នេយ៍បានថ្លែងប្រាប់ថា ក្នុងចំណោមកីឡាករកម្ពុជា លោកបានសម្រេចចិត្តដាក់ឱ្យ សូត្រ ប៊ុនធី មកពីក្លិបបក្សាស្លាបដែក ឱ្យឡើងប៉ះប្រកួតជាមួយកីឡាករថៃឈ្មោះ អារាំ ប៊យ ក្នុងនាមជាគូបើកឆាកមិត្តភាពអន្តរជាតិសម្រាប់ព្រឹត្តិការណ៍នេះ ។ លោកថា ជំនួបរវាងពួកគេមិនមែនជារឿងចៃដន្យនោះទេ ដោយលោកគឺមានបំណងចង់ឱ្យគេប៉ះគ្នាជាមួយគូបរទេសនៅក្នុងព្រឹត្តិការណ៍នេះ ដើម្បីបើកឆាកការប្រកួតមិត្តភាពតែម្ដង ដើម្បីកំដរសង្វៀនខារ៉ាបាវនៅពេលការប្រកួតដណ្ដើមខ្សែក្រវាត់រដូវកាលទី២នៅមិនទាន់ចាប់ផ្ដើម ។ លោកថា កីឡាករ សូត្រ ប៊ុនធី អាចចាត់ទុកថា ជាជើងខ្លាំងម្នាក់នៅលើសង្វៀនប្រដាល់អន្តរជាតិខារ៉ាបាវ ដែលជាព្រឹត្តិការណ៍ចម្រុះដោយកីឡាករខ្លាំងៗនៅក្នុងពិភពប្រដាល់ ហើយមានការចាប់អារម្មណ៍ខ្លាំងតាំងពីមុនការប្រដាល់ដណ្ដើមខ្សែក្រវាត់រដូវកាលទី១មិនទាន់ចាប់ផ្ដើម ។ លោកជឿជាក់ទៅលើសមត្ថភាពរបស់កីឡាកររូបនេះ ពូកែគេច និងពូកែវាយសន្ធាប់ ទើបសម្រេចចិត្តឱ្យគេឡើងប្រកួតជាមួយកីឡាករថៃខាងលើជាថ្មី ក្នុងពេលដែលគេទើបនឹងឈ្នះកីឡាករថៃមុននោះ ។
លោករំពឹងយ៉ាងខ្លាំងថា ការប្រកួតរបស់គូនេះ នឹងធ្វើឱ្យមហាជនចាប់អារម្មណ៍ ដោយសារតែផ្អែកថា សូត្រ ប៊ុនធី ក៏ប្រាកដជាចង់ឈ្នះ ហើយកីឡាករថៃក៏ត្រូវការរក្សាក្រេឌីតនៅលើសង្វៀន ក្នុងនាមជាកីឡាករល្អម្នាក់មកពីបាងកក ។ លោកថា កីឡាករថៃ អារាំ ប៊យ ធ្លាប់ប្រកួត៦៨លើក ឈ្នះ៥៥លើក និងចាញ់១៣លើក ក្នុងពេលដែលកីឡាករកម្ពុជា ក៏ប្រកួតបានប្រហាក់ប្រហែលគ្នាគឺ៨២លើក ឈ្នះ៦៨លើក ចាញ់១១លើក និងស្មើ៣លើក ដែលលោកយល់ថា ពួកគេនឹងអាចតតាំងគ្នាបានល្អដោយស្មើភាពនៅលើសង្វៀនខារ៉ាបាវ ដែលនឹងចាប់ផ្ដើមនៅថ្ងៃសៅរ៍ខានស្អែកនេះ ។
សម្រាប់កីឡាករ សេក គឹមរួន លោកញាណ សុធី បញ្ជាក់ថា គេត្រូវប៉ះប្រកួតជាមួយកីឡាករជើងខ្លាំងរបស់ថៃឈ្មោះ សាំង យ៉ូត នៅក្នុងព្រឹត្តិការណ៍ប្រដាល់អន្តរជាតិខារ៉ាបាវនេះដែរ ។ លោកថា ការប្រកួតរបស់គូនេះនៅមិនទាន់ដឹងថា អ្នកណាល្អជាងអ្នកណានោះទេ ក្នុងពេលដែលកីឡាករ សេក គឹមរួន ជួនក៏ប្រកួតល្អ ហើយជួនក៏ប្រកួតមិនល្អ ។ លោកថា កីឡាករថៃធ្លាប់ប្រកួតបាន៧០លើក ឈ្នះ៥៧លើក ចាញ់១២លើក និងស្មើមួយលើក រីឯកីឡាករកម្ពុជាធ្លាប់ប្រកួតបានដល់៧៦លើក ឈ្នះ៦៣លើក និងចាញ់១៣លើក ដែលបង្ហាញថា បទពិសោធន៍ប្រកួតរបស់កីឡាករកម្ពុជាខ្ពស់ជាងច្រើនជាង ។ យ៉ាងណាក៏ដោយ កីឡាករកម្ពុជាមិនអាចមើលស្រាលសមត្ថភាពរបស់កីឡាករថៃបានទេ ដោយសារតែសមាសភាពរបស់កីឡាករថៃក៏មិនមែនធម្មតា ។ គូនេះមានការរំពឹងខ្ពស់ថា នឹងមានអ្នកជក់ចិត្តដិតអារម្មណ៍ភាគច្រើន ដោយសារតែសេក គឹមរួន ក៏មិនចង់ធ្លាក់ចុះក្រេឌីត ហើយកីឡាករថៃក៏មិនចង់ចាញ់នាំឱ្យមានការរិះគន់ ។ ដោយឡែកនៅក្នុងព្រឹត្តិការណ៍ប្រដាល់នាយប់ថ្ងៃសុក្រនេះវិញ ក៏មានជំនួបរវាងកីឡាករកម្ពុជា និងកីឡាករថៃដែលសុទ្ធតែជាជើងខ្លាំងនៅលើសង្វៀនទូរទស្សន៍អាស៊ីអាគ្នេយ៍ផងដែរ ៕
ចែករំលែកព័តមាននេះ