រាជធានីភ្នំពេញ ៖ ប្រជាពលរដ្ឋនៅខេត្តព្រៃវែង បានថតវីដេអូមួយខ្លី សម្តែងនូវការខកចិត្តឥតឧបមា ដោយសារតែផ្លូវថ្មីមួយខ្សែនៅស្រុកព្រះស្តេច ខេត្តព្រៃវែង ដែលទើបតែបញ្ចប់ការសាងសង់ថ្មីៗ ទើបចាប់តំឡើងស្លាកចរាចរណ៍ និងមិនទាន់បានដាក់សម្ពោធឱ្យប្រើប្រាស់ផង ស្រាប់តែផ្នែកខ្លះនៃផ្លូវនោះ បានខូចខាតបែកបាក់ និងការចាក់កៅស៊ូ ក៏ស្តែងដែលមិនអាចនឹងមានអាយុកាលបានវែងឆ្ងាយនោះទេ។
ជាមួយគ្នានោះ ពលរដ្ឋនៅខេត្តព្រៃវែង បានផ្តាំផ្ញើដល់ឯកឧត្តម ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជួនឱ្យជួយពិនិត្យមើលផ្លូវនោះផង ដោយសារតែការសាងសង់ គឺគ្មានគុណភាព ចាក់ស្តើង និងមិនទាន់បានដាក់សម្ពោធឱ្យប្រើប្រាស់ជាផ្លូវការផង ស្រាប់តែផ្នែកខ្លះនៃដងផ្លូវនេះខូចខាតដោយផ្នែកៗរួចទៅហើយ។
ឃ្លីបវីដេអូខ្លីមានរយៈពេលជាង១នាទី ថតដោយប្រជាពលរដ្ឋនៅខេត្តព្រៃវែង ដែលលោកបានសម្តែងនូវការហួសចិត្តខ្លាំងដោយថតវីដេអូបណ្តើរ ពោលពាក្យបណ្តើរថា «បងប្អូនជួយផ្ញើវីដេអូនេះទៅដល់ឯកឧត្តម ស៊ុន ចាន់ថុល ផងបាទ ។ នេះផ្លូវនៅខេត្តព្រៃវែង នៅស្រុកព្រះស្តេច។ ផ្លូវទើបធ្វើហើយ ទើបលាបថ្នាំ និងចាប់ស្លាកនៅថ្ងៃនេះ មិនទាន់ហ្នឹងសម្ពោធផង ខូចបាត់ទៅហើយនេះ។ យើងមើលហ្នឹងភ្នែក កំរាស់ចាក់ គឺមិនបានដល់មួយហ៊ុនផង»។
ពលរដ្ឋបានសម្តែងការហួសចិត្តបន្តថា «ផ្លូវនេះ ឡានដឹកស្រូវ ដឹកអីតាមហ្នឹង ហើយធ្វើផ្លូវកម្រាស់មិនបានមួយហ៊ុនផង។ មិនទាន់បានសម្ពោធផង ខូច (ផ្លូវ) បាត់ហើយ ប៉ោងចេញអស់ ប៉ោងចេញទាំងដុំៗ»។ បងប្រុសដែលជាពលរដ្ឋនៅខេត្តព្រៃវែង បានអះអាងថា ផ្លូវមួយខ្សែនេះ គឺសាងសង់ដោយក្រុមហ៊ុនចិន។
យ៉ាងណាមិញ ក្រោយពីវីដេអូបង្ហាញពីផ្លូវទើបសាងសង់ ស្រាប់តែខូចខាតបណ្តើរនោះ បង្ហោះចូលក្នុងបណ្តាញសង្គម Tik Tuk និងហ្វេសប៊ុកភ្លាម ត្រូវបានមហាជនចែកចាយយ៉ាងផុសផុល និងរិះគន់ដូចទឹកបាក់ទំនប់។ អ្នកលេងបណ្តាញសង្គមដែលបានចែកចាយវីដេអូ បន្តបានពោលឌឺដងថា «គេធ្វើថ្នល់ចឹង ទើបត្រូវស្តង់ដា, គេមិនមែនចាក់កៅស៊ូទេ, គេប្រឡាក់កៅស៊ូ, ម្យ៉ាងទៀតជាប់ឈ្មោះលំដាប់ល្អ, អភិវឌ្ឍន៍បន្ត,ធ្វើជាប់រហូត»។ ចំណែកគណនីហ្វេសប៊ុកខ្លះបានរិះគន់ចំៗថា «ចាក់ស្តើងស៊ីក្រាស់ ចាក់ក្រាស់ស៊ីស្តើង ខ្យល់ខ្លាំងមកប៉ើងចាក់ស្តើងៗបានលុយធ្វើទៀត»។
ក្រោយទទួលបាននូវការចែកចាយដូចទឹកបាក់ទំនប់ និងផ្ទុះការរិះគន់ខ្លាំងៗនោះលោក គ្រី រដ្ឋថេតដែលជាអនុប្រធានមន្ទីរសាធារណការ និងដឹកជញ្ជូនខេត្តព្រៃវែង បានផ្ញើសារក្នុងបណ្តាញសង្គមតេឡេក្រាមបញ្ជាក់ជូនមហាជនថា «ខ្ញុំបាទឈ្មោះ គ្រី រដ្ឋថេត អនុប្រធានមន្ទីរសាធារណការ និងដឹកជញ្ជូនខេត្តព្រៃវែង សូមជំរាបជូនថា កំណាត់ផ្លូវនេះមិនស្ថិតក្រោមក្រសួងសាធារណការ និងដឹកជញ្ជូនទេ គឺក្រោមក្រសួងអភិវឌ្ឍន៍ជនបទ។សូមអរគុណ»។
យ៉ាងណាមិញ មហាជនអ្នកលេងបណ្តាញសង្គមបានលើកឡើងថា មិនថាស្ថាប័នណាទទួលខុសត្រូវនៃការសាងសង់ផ្លូវមួយខ្សែនេះទេ គឺត្រូវប្រាកដថា ផ្លូវគួរតែសាងសង់ឱ្យត្រូវស្តង់ដាសម្រាប់បម្រើប្រយោជន៍សាធារណជន និងគួរតែបញ្ឈប់ទម្លាប់ «ចាក់ស្តើងស៊ីក្រាស់ ចាក់ក្រាស់ស៊ីស្តើង» កុំឱ្យខាតបង់លុយរដ្ឋពេក៕
ចែករំលែកព័តមាននេះ