រៀបចំភ្លើងស្តុបជិត២០០កន្លែងរួច អាជ្ញាធរភ្នំពេញមិនអនុញ្ញាតឲ្យអ្នកដំណើរធ្វើចរាចណ៍បត់ឆ្វេងទៀតទេ
រាជធានីភ្នំពេញ ៖ ដើម្បីកាត់បន្ថយការកកស្ទះចរាចរណ៍លោក ប៉ា សុជាតិវង្ស មានប្រសាសន៍ទៀតថា យោងតាមការសិក្សាកន្លងមក
រាជធានីភ្នំពេញ ៖ ដើម្បីកាត់បន្ថយការកកស្ទះចរាចរណ៍លោក ប៉ា សុជាតិវង្ស មានប្រសាសន៍ទៀតថា យោងតាមការសិក្សាកន្លងមក រាជធានីភ្នំពេញមានកន្លែងដែលកកស្ទះចរាចរណ៍ច្រើនជាងគេ មានរហូតដល់ជាង២០០ទីតាំង ក្នុងនោះការកកស្ទះខ្លាំងចាប់ពីម៉ោង៦ព្រឹកដល់ម៉ោង៨ព្រឹក និងម៉ោង៥ល្ងាចដល់ម៉ោង៦ល្ងាច ។
លោកបានបញ្ជាក់ថា កត្តាហេដ្ឋារចនាសម្ព័ន្ធជាផ្នែកធំមួយដែលបង្កឲ្យមានការកកស្ទះចរាចរណ៍ គឺបច្ចុប្បន្នភ្នំពេញ មានរថយន្ត៤ម៉ឺនគ្រឿងចុះបញ្ជី រួមជាមួយរថយន្តតាមខេត្តប្រមាណ៣០ម៉ឺនគ្រឿងទៀត ។ បើរថយន្តទាំងនោះចូលភ្នំពេញ គឺគ្មានផ្លូវឲ្យគាត់បើកទេ ។ ចំណែកផ្លូវនៅភ្នំពេញ ពីមុនគេធ្វើតម្រូវឲ្យតែមនុស្សប្រមាណ៣០ម៉ឺននាក់ប៉ុណ្ណោះ យ៉ាងច្រើនរថយន្ត១ម៉ឺនគ្រឿង ដោយធ្វើផ្លូវកាត់ទទឹងច្រើន ដែលបង្កការកកស្ទះ ដូចជា ផ្លូវព្រះមុនីវង្ស និងផ្លូវព្រះនរោត្តមជាដើម ទោះដាក់របាំងចែកទ្រូងផ្លូវក៏ទៅមិនរួច គឺនៅតែមានបញ្ហាដដែល ។
លោកអភិបាលរាជធានីបានបញ្ជាក់ទៀតថា សម្រាប់ដំណោះស្រាយ គឺត្រូវតែមានការកែផ្លូវ ដែលក្រុមការងារបានសិក្សាបានបង្ហាញថា រាជធានីភ្នំពេញ មិនត្រូវអនុញ្ញាតឲ្យមានការបត់ឆ្វេងទេ លើកលែងតែមានស្តុប ដែលការងារនេះ នឹងត្រូវអនុវត្តន៍នៅពេលតភ្ជាប់ និងដាក់ឲ្យដំណើរការភ្លើងស្តុបជិត២០០ទីតាំង (សរុបទាំងចាស់ ថ្មី) ។ ការមិនឲ្យបត់ឆ្វេងទេនេះ ធ្វើឲ្យអ្នកជិះរថយន្តមានផែនការថា បើចង់ទៅណាត្រូវគិតឲ្យហើយសិនថា នឹងត្រូវទៅតាមផ្លូវណា។ បើអត់មានផែនការ គឺចេះតែជិះគេចចុះគេចឡើងនៅពេលដែលស្ទះតាមតែចិត្តនឹកឃើញ ដែលធ្វើឲ្យច្របូកច្របល់ និងមិនអាចតម្រង់ទិសចរាចរណ៍បាននោះទេ ។
- មួយឆ្នាំបង់ខាត20លានដុល្លារដោយការកកស្ទះចរាចរណ៍
បើតាមការប៉ាន់ប្រមាណក្នុង១ឆ្នាំៗអ្នកប្រើប្រាស់យានយន្តគ្រប់ប្រភេទ បានខាតបង់ថវិកាប្រមាណ២០លានដុល្លារពីការបញ្ឆេះម៉ាស៊ីនចោលតាមដងផ្លូវ ដោយសារកកស្ទះចរាចរណ៍ស្ទើររៀងរាល់ថ្ងៃនៅក្នុងរាជធានីភ្នំពេញ ។ បញ្ហាកកស្ទះចរាចរណ៍បានធ្វើឱ្យមានការប៉ះពាល់លើមនុស្សគ្រប់គ្នា ដែលជាអ្នកប្រើប្រាស់ផ្លូវ ហើយម្នាក់ៗបានទទួលស្គាល់ថា ពិតជាលំបាកក្នុងការធ្វើដំណើរតាមយានយន្តក្នុងរាជធានីភ្នំពេញមែន ។ ដោយសារតែការកកស្ទះចរាចរណ៍ដោះស្រាយមិនចេញកន្លងមក អាជ្ញាធរបានត្រឹមដាក់ភ្លើងស្តុបនៅតាមផ្លូវបែកជាបួននានាក្នុងន័យ ឱ្យអ្នកដំណើរចែកពេលគ្នាម្តងម្នាក់តែប៉ុណ្ណោះ ។
ក្នុងជំនួបនិងសំណេះសំណាលជាមួយមន្ត្រីនគរបាលចរាចរណ៍ទូទាំងរាជធានីភ្នំពេញ កាលពីរសៀលថ្ងៃទី២៩ វិច្ឆិកា ដោយមានវត្តមានលោកនាយឧត្តមសេនីយ៍ នេត សាវឿន អគ្គស្នងការនគរបាលជាតិផងនោះ លោក ប៉ា សុជាតិវង្ស អភិបាលរាជធានីភ្នំពេញ បានលើកឡើងថា បញ្ហាកកស្ទះចរាចរណ៍នៅរាជធានីភ្នំពេញនេះ មិនអាចបណ្តែតបណ្តោយតទៅទៀតបានទេ បើពុំមានយន្តការដោះស្រាយទេនោះទីក្រុងនេះមិនអាចធ្វើដំណើរបានឡើយ ខណៈដែលប្រព័ន្ធគមនាគមន៍មិនសមស្របទៅនឹងចំនួនយានជំនិះ ដែលមានការកើនឡើងយ៉ាងគំហុកជារៀងរាល់ឆ្នាំ ។ លោកបានបន្តថា បញ្ហាចរាចរណ៍នេះ ទោះត្រូវចំណាយប៉ុន្មានក៏អាជ្ញាធររាជធានីហ៊ានបោះទុនវិនិយោគបានដែរ ឲ្យតែរកឃើញវិធីសាស្ត្រ ដែលមានប្រសិទ្ធភាពក្នុងការដោះស្រាយ ។
លោក ប៉ា សុជាតិវង្ស បានលើកឡើងទៀតថា ដើម្បីកាត់បន្ថយនូវការកកស្ទះបែបនេះ អាជ្ញាធររាជធានីភ្នំពេញបានចេញសារាចរណែនាំស្តីពីការកំណត់ពេលវេលាចេញចូលរបស់រថយន្តដឹកជញ្ជូនធុនធ្ងន់ ស្របពេលដែលរថយន្តធុនធ្ងន់ដែលបានចុះបញ្ជីមានរហូតប្រមាណជា៤ម៉ឺនគ្រឿង ។ ប៉ុន្តែបច្ចុប្បន្នមានរថយន្តធុនធ្ងន់ប្រមាណជា១ពាន់គ្រឿងប៉ុណ្ណោះ ដែលត្រូវបានចេញចូលរាជធានីភ្នំពេញខុសពីសារាចរនេះ ។ រថយន្តប្រមាណជា១ពាន់គ្រឿងនោះ ភាគច្រើនជារថយន្តបំរើដល់វិស័យសំណង់ ការសាងសង់អគារ លំនៅឋាន ដែក ស៊ីម៉ង់តិ៍ ដឹកខ្សាច់ គ្រោះថ្ម ដើម្បីស្ថាបនាផ្លូវជាដើម ។
លោក ប៉ា សុជាតិវង្ស បានឲ្យដឹងទៀតថា នៅភ្នំពេញមានបញ្ហាស្ទះ៣ គឺស្ទះសំរាម ស្ទះលូ និងកកស្ទះចរាចរណ៍ ដែលការកកស្ទះចរាចរណ៍នេះ ដែលពលរដ្ឋពិបាកទ្រាំ និងមានការខាតបង់ធ្ងន់ធ្ងរដែលគេបានវាយតម្លៃ និងសន្និដ្ឋានថា ក្នុងមួយឆ្នាំពលរដ្ឋបានខាតថវិកាជិត២០លានដុល្លារ ដោយសារតែបញ្ឆេះម៉ាស៊ីនចោលទៅជាផ្សែងបង្កឲ្យខូចបរិស្ថានថែមទៀត ។ នេះមិនទាន់និយាយពីអ្នកជំងឺទៅពេទ្យមិនទាន់ និងខាតពេលវេលាឬបញ្ហាផ្សេងៗនោះទេ ។ លោក បានបញ្ជាក់ថា ការកកស្ទះចរាចរណ៍បណ្តាលមកពីកត្តាបី គឺ១-កត្តាហេដ្ឋារចនាសម្ព័ន្ធ ២-កត្តាមធ្យោបាយ និង៣-កត្តាមនុស្ស ដែលមិនគោរពច្បាប់ចរាចរណ៍ ៕
ចែករំលែកព័តមាននេះ