រាជធានីភ្នំពេញ ៖ ស្របពេលអំណាចនៃការទិញកើនឡើង ហើយកម្ពុជាបានឆ្លងផុតពីប្រទេសក្រីក្រ ទៅជាប្រទេសមានប្រាក់ចំណូលមធ្យមកម្រិតទាប ផ្សារទំនើបនៅកម្ពុជានឹងកើនឡើងបន្ថែមទៀត ។ ជាក់ស្តែង
រាជធានីភ្នំពេញ ៖ ស្របពេលអំណាចនៃការទិញកើនឡើង ហើយកម្ពុជាបានឆ្លងផុតពីប្រទេសក្រីក្រ ទៅជាប្រទេសមានប្រាក់ចំណូលមធ្យមកម្រិតទាប ផ្សារទំនើបនៅកម្ពុជានឹងកើនឡើងបន្ថែមទៀត ។ ជាក់ស្តែង ផ្សារទំនើបធំៗចំនួនពីរនឹងបើកដំណើរការនៅឆ្នាំ២០១៧ខាងមុខនេះ ។
នាយិកាក្រុមហ៊ុន CBRE Cambodia អ្នកនាង អាន សុធីតា បានថ្លែងឲ្យដឹងតាមទូរស័ព្ទនៅព្រឹកថ្ងៃទី២៨ វិច្ឆិកាថា នៅឆ្នាំ២០១៧ខាងមុខនេះ ផ្សារទំនើបចំនួនពីរទៀត គឺផ្សារទំនើប Parkson Mall និងផ្សារទំនើបក្នុងគម្រោង Exchange Square ដែលអភិវឌ្ឍន៍ដោយក្រុមហ៊ុន Hong Kong Land នឹងបើកដំណើរការ ដែលអាចធ្វើឲ្យទីផ្សារនេះកាន់តែមានភាពប្រកួតប្រជែង ឬបំពេញឲ្យគ្នាទៅវិញទៅមក ដោយសារផ្សារទាំងនេះមានទីតាំងខុសៗគ្នា ។
អ្នកនាងបន្តថា ផ្សារទំនើប Parkson Mall មានកម្ពស់៩ជាន់ ស្ថិតនៅតាមបណ្តោយមហាវិថីសហព័ន្ធរុស្ស៊ី ជាផ្សារទំនើបដែលមានកេរ្តិ៍ឈ្មោះល្បីនៅក្នុងតំបន់អាស៊ី ។ ផ្សារទំនើបនេះ នឹងលក់ទំនិញក្នុងស្រុក ក៏ដូចជាម៉ាកទំនិញល្បីៗលំដាប់អន្តរជាតិ ។ ចំណែកផ្សារទំនើបក្នុងអគារ Exchange Square មានកម្ពស់៤ជាន់ មានទំហំ១៣.០០០ម៉ែត្រការ៉េ នឹងលក់ទំនិញក្នុងស្រុក និងទំនិញមានកេរ្តិ៍ឈ្មោះល្បីៗលំដាប់អន្តរជាតិផងដែរ ។
អ្នកនាង អាន សុធីតា បន្តថា ការលក់ចំណីអាហារ ភេសជ្ជៈ និងសេវាកម្សាន្ត មានចំណែកទីផ្សារធំជាងគេនៅតាមផ្សារទំនើបនានានៅកម្ពុជា ខណៈទំហំផ្សារទំនើបក្នុងប្រទេសកម្ពុជាធៀបនឹងចំនួនប្រជាពលរដ្ឋ គឺមានចំនួនទាបនៅឡើយ ។ ជាក់ស្តែង ផ្សារទំនើបនៅទីក្រុងភ្នំពេញ មានទំហំ០,១ម៉ែត្រការ៉េ, ទីក្រុងម៉ានីល ០,៤ម៉ែត្រការ៉េ, ទីក្រុងបាងកក ១,២៤ម៉ែត្រការ៉េ និងប្រទេសវៀតណាមមានទំហំ០,០៨ម៉ែត្រការ៉េ ធៀបនឹងចំនួនប្រជាជនម្នាក់ ។
តាមគម្រោង ផ្សារទំនើប Parkson Mall នឹងបើកសាខាចំនួន៣កន្លែងនៅរាជធានីភ្នំពេញ ៖ ១-ស្ថិតនៅតាមបណ្តោយមហាវិថីសហព័ន្ធរុស្ស៊ី ក្បែរទីស្តីការគណៈរដ្ឋមន្ត្រី ។ ២-ស្ថិតនៅទល់មុខព្រលានយន្តហោះអន្តរជាតិភ្នំពេញ និង៣-គ្រោងបើកនៅជាន់ក្រោមនៃគម្រោង The Bridge ដែលមានទីតាំងនៅជិតកោះពេជ្រ ។
លោក ស៊ឹង ប៊ុណ្ណា អគ្គនាយកក្រុមហ៊ុនប៊ុណ្ណារៀលធីគ្រុប បានថ្លែងថា ផ្សារទំនើបនៅទីក្រុងភ្នំពេញ មិនទាន់មានចំនួនច្រើននៅឡើយទេ ហើយត្រូវការផ្សារទំនើបធំៗលំដាប់ AEON MALL ចំនួន៣ ទៅ៤ទីតាំងទៀតក្នុងទីក្រុងភ្នំពេញ ប៉ុន្តែគួរតែស្ថិតនៅទីតាំងខុសៗគ្នា ។ ប៉ុន្តែកម្ពុជាត្រូវការផ្សារដែលលក់ទំនិញផ្តាច់មុខមួយចំនួនទៀត ដែលកម្ពុជាមិនទាន់មាននៅឡើយ ។ ការមានផ្សារទំនើបកាន់តែច្រើន នឹងធ្វើឲ្យការផ្គត់ផ្គង់កើនលើសតម្រូវការ ។
លោកបន្តថា ៖ « ការបើកដំណើរការផ្សារទំនើប AEON MALL ទី១ បានធ្វើឲ្យផ្សារទំនើបតូចៗនៅក្រុងភ្នំពេញមួយចំនួនមានភាពស្ងប់ស្ងាត់ ដែលទាមទារឲ្យម្ចាស់ផ្សារទំនើបទាំងនោះកែលម្អប្រព័ន្ធនៃការលក់ និងឌីសាញអគាររបស់ខ្លួនឲ្យមានភាពទាក់ទាញបន្ថែមទៀត » ។
ឆ្លើយតបនឹងការលើកឡើងនេះ ផ្សារទំនើបសូរិយា បានបោះទុន៥,៥លានដុល្លារដើម្បីកែលម្អផ្សាររបស់ខ្លួនឲ្យកាន់តែមានភាពទាក់ទាញ ដើម្បីប្រកួតប្រជែងជាមួយផ្សារដទៃទៀត ។
លោក ឆារស៍ វ៉ាន់ តំណាងភាគហ៊ុនិកនៃផ្សារទំនើបសូរិយា សេនធ័រភ័នធ៍ (Sorya Center Point) បានថ្លែងឲ្យដឹងថា ការកែលម្អផ្សារទំនើបនេះនឹងបញ្ចប់ទាំងស្រុងនៅដើមឆ្នាំ២០១៧ខាងមុខ ។ ការកែលម្អផ្សារដោយដូរឈ្មោះពីផ្សារទំនើបសូរិយា ទៅជាសូរិយា សេនធ័រភ័នធ៍ ដើម្បីធ្វើឲ្យផ្សារនេះស្អាតជាងមុន និងធ្វើយ៉ាងណា ឲ្យការលក់ទំនិញឆ្លើយតបតាមតម្រូវការរបស់អតិថិជន ។ លោកបន្តថា ៖ «ក្រៅពីរៀបចំឲ្យមានភាពស្រស់ស្អាតសម្រាប់ទាក់ទាញអតិថិជនក្នុងស្រុក ផ្សារទំនើបនេះក៏ធ្វើឡើងដើម្បីទាក់ទាញភ្ញៀវទេសចរផងដែរ » ៕
ចែករំលែកព័តមាននេះ