ប្រទេសអាឡឺម៉ង់៖ ចក្រភពអង់គ្លេសបាននិយាយកាលពីថ្ងៃអាទិត្យ ទី២៦ ខែមិថុនានេះថា មហាអំណាច G7 ចំនួនបួននឹងហាមឃាត់ការនាំចេញមាសរបស់ប្រទេសរុស្ស៊ីនៅក្នុងការដេញថ្លៃថ្មីមួយ ដើម្បីបញ្ឈប់កំពូលអ្នកមានពីការទិញលោហៈដ៏មានតម្លៃ ដើម្បីជៀសវាងផលប៉ះពាល់នៃទណ្ឌកម្មប្រឆាំងនឹងទីក្រុងម៉ូស្គូ។ នេះបើតាមកាចុះផ្សាយរបស់សារព័ត៌មាន​ CNA។

នាយករដ្ឋមន្ត្រីអង់គ្លេស លោក Boris Johnson បាននិយាយថា សកម្មភាពរួមគ្នាដែលធ្វើឡើងដោយចក្រភពអង់គ្លេស កាណាដា ជប៉ុន និងសហរដ្ឋអាមេរិក «នឹងវាយប្រហារដោយផ្ទាល់ទៅលើពួកឥស្សរជនរុស្ស៊ី និងវាយប្រហារចំបេះដូងនៃម៉ាស៊ីនសង្រ្គាមរបស់ (ប្រធានាធិបតី វ្ល៉ាឌីមៀ) ពូទីន»។

លោក Boris Johnson បានបន្តថា ដោយមើលឃើញពីតួនាទីកណ្តាលរបស់ទីក្រុងឡុងដ៍ ក្នុងពាណិជ្ជកម្មមាសអន្តរជាតិ និងសកម្មភាពស្របគ្នារបស់សហរដ្ឋអាមេរិក ជប៉ុន និងកាណាដា «វិធានការនេះនឹងអាចឈានរីកទៅដល់កម្រិតពិភពលោក ដោយបិទនូវមុខទំនិញចេញពីទីផ្សារអន្តរជាតិផ្លូវការ»។

មាសដែលជាទំនិញដ៏មានតម្លៃក្នុងគ្រាមានចលាចល – គឺជាការនាំចេញដ៏សំខាន់សម្រាប់ប្រទេសរុស្ស៊ី ដែលក្នុងនោះវាមានតម្លៃ 12.6 ពាន់លានផោន (ប្រមាណជាង15.4ពាន់លានដុល្លារអាមេរិក) ដល់សេដ្ឋកិច្ចរុស្ស៊ីក្នុងឆ្នាំ 2021។

ជាមួយនឹងប្រទេសរុស្ស៊ីដែលដឹកនាំដោយលោកពូទីន ដែលឥឡូវនេះកំពុងស្ថិតនៅក្រោមការដាក់ទណ្ឌកម្មយ៉ាងធ្ងន់ធ្ងរ អ្នកមានបំផុតរបស់ប្រទេសរុស្ស៊ី បានប្រញាប់ប្រញាល់បំប្លែងទ្រព្យសម្បត្តិរបស់ពួកគេទៅជាមាស ដើម្បីជៀសវាងផលប៉ះពាល់នៃការរឹតបន្តឹងផ្នែកហិរញ្ញវត្ថុ។

ផ្សារដុំមាសនៅទីក្រុងឡុងដ៍ បានផ្អាករោងចក្រចម្រាញ់ប្រេងរុស្ស៊ីចំនួនប្រាំមួយរួចហើយនៅក្នុងសកម្មភាពដែលបានប្រកាសកាលពីថ្ងៃទី ៧ ខែមីនាកន្លងទៅ។

ចំណាត់ការចុងក្រោយបំផុតដែលកំណត់គោលដៅលើទំនិញ (មាស) នេះបានកើតឡើងនៅពេលដែលមេដឹកនាំនៃក្រុមប្រទេសអ្នកមានបំផុតទាំងប្រាំពីរកំពុងជួបប្រជុំគ្នានៅភ្នំអាល់បាវ៉ារៀ Bavarian Alps ប្រទេសអាល្លឺម៉ង់ ដោយកិច្ចពិភាក្សារបស់ពួកគេត្រូវផ្តោតលើវិធីដើម្បីទ្រទ្រង់ការគាំទ្រសម្រាប់អ៊ុយក្រែនប្រឆាំងនឹងការឈ្លានពានរបស់រុស្ស៊ី។          

ក្រុមប្រទេសអ្នកមាន G7 ត្រូវបានគេរំពឹងថានឹងទទួលយកនូវរបៀបថ្មីមួយទៀតដែលជាទណ្ឌកម្មមិនធ្លាប់មានពីមុនមកប្រឆាំងនឹងទីក្រុងមូស្គូ និងបានដំណើរការរហូតមកដល់ពេលនេះនូវទណ្ឌកម្មជាច្រើនលើរដ្ឋាភិបាលរបស់លោកពូទីន។ ហើយក្រុមប្រទេសអ្នកមាន G7 កំពុងពិភាក្សាបន្ថែមអំពីជំនួយផ្នែកហិរញ្ញវត្ថុ និងយោធាសម្រាប់អ៊ុយក្រែន ក៏ដូចជាសម្លឹងមើលការកសាងឡើងវិញដ៏យូរសម្រាប់ប្រទេសអ៊ុយក្រែនដែលហែកហួរដោយសង្រ្គាម៕