យ៉ាងហោចណាស់ មានស្ត្រីចំនួន១៧៣នាក់បានជាប់ឆ្នោតជាមេឃុំ ចៅសង្កាត់ និងយុវជនអាយុក្រោម៣៥ឆ្នាំជាប់ជាមេឃុំ ចៅសង្កាត់ សម្រាប់អាណ្ណត្តិទី៥ ឆ្នាំ២០២២ មានចំនួន ៣៧នាក់ ដែលសុទ្ធតែ
រាជធានីភ្នំពេញ ៖ យ៉ាងហោចណាស់ មានស្ត្រីចំនួន១៧៣នាក់បានជាប់ឆ្នោតជាមេឃុំ ចៅសង្កាត់ និងយុវជនអាយុក្រោម៣៥ឆ្នាំជាប់ជាមេឃុំ ចៅសង្កាត់ សម្រាប់អាណ្ណត្តិទី៥ ឆ្នាំ២០២២ មានចំនួន ៣៧នាក់ ដែលសុទ្ធតែមកពីគណបក្សប្រជាជនកម្ពុជា។ នេះបើយោងតាមលទ្ធផលផ្លូវការនៃការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណ្ណត្តិទី៥ ឆ្នាំ២០២២ ចេញដោយគណៈកម្មាធិការជាតិរៀបចំការបោះឆ្នោត (គ.ជ.ប) នៅថ្ងៃទី២៦ ខែមិថុនា ឆ្នាំ២០២២។
ស្ត្រីចំនួន ១៧៣នាក់ បានជាប់ឆ្នោតជាមេឃុំ ចៅសង្កាត់ នៅ២៣រាជធានី-ខេត្ត លើកលែងខេត្តកែប ។ ក្នុងនោះ ខេត្តកណ្តាល និងខេត្តសៀមរាប មានស្ត្រីជាប់ជាមេឃុំ ចៅសង្កាត់ ច្រើនជាងគេ គឺចំនួន១៨នាក់ក្នុងមួយខេត្ត បន្ទាប់មកគឺខេត្តកំពង់ឆ្នាំង ខេត្តស្វាយរៀង និងរាជធានីភ្នំពេញ មានស្ត្រីជាប់ជាមេឃុំ ចៅសង្កាត់ ចំនួន១៥នាក់ក្នុងមួយខេត្ត ខណៈខេត្តឧត្តរមានជ័យ មានស្ត្រីតែម្នាក់ជាប់ជាមេឃុំ-ចៅសង្កាត់ និង៣នាក់ទៀត គឺខេត្តត្បូងឃុំ ខេត្តព្រះសីហនុ និងខេត្តកោះកុង មានស្ត្រីជាប់ឆ្នោតជាមេឃុំ ចៅសង្កាត់ចំនួន២រូបក្នុងមួយខេត្តៗ។
បើតាមតារាងលទ្ធផលផ្លូវការនៃការបោះឆ្នោតជ្រើសរើសក្រុមប្រឹក្សាឃុំ សង្កាត់ អាណ្ណត្តិទី៥ ឆ្នាំ២០២២ ចេញដោយ (គ.ជ.ប) បានឱ្យដឹងថា យុវជនអាយុក្រោម៣៥ឆ្នាំជាប់ជាមេឃុំ ចៅសង្កាត់សម្រាប់អាណ្ណត្តិទី៥ ឆ្នាំ២០២២ មានចំនួន ៣៧នាក់ នៅខេត្ត-រាជធានី ចំនួន១៥ ក្នុងនោះ ខេត្តសៀមរាបនាំមុខគេ គឺមានចំនួន ១០នាក់ បន្ទាប់មកគឺខេត្តបាត់ដំបង និងរតនគិរី មានចំនួន៤រូប ក្នុងមួយខេត្ត ខណៈខេត្តព្រៃវែងមាន ៣ រូប និងចំនួន ៥ គឺខេត្តស្វាយរៀង តាកែវ ព្រះវិហារ កំពង់ស្ពឺ និងខេត្តកំពង់ចាម មានយុវជនអាយុក្រោម៣៥ឆ្នាំជាប់ជាមេឃុំ ចៅសង្កាត់ ចំនួន២រូបក្នុងមួយខេត្តៗ៕
ចែករំលែកព័តមាននេះ