ខេត្តបន្ទាយមានជ័យ ៖ អភិបាលខេត្តបន្ទាយមានជ័យ និងខេត្តបាត់ដំបង បានជួបប្រជុំពិភា
ក្សាជាមួយអភិបាលខេត្តស្រះកែវ ប្រទេសថៃ កាលពីថ្ងៃទី២៣ ខែមិថុនា ឆ្នាំ២០២២កន្លងទៅ
នៅទីស្នាក់ការអន្តរជាតិក្លងលឹក ស្រុកអារញ្ញ ខេត្តស្រះកែវ ក្នុងគោលបំណងដើម្បីពង្រឹងកិច្ចសហប្រតិបត្តិការ សម្ព័ន្ធមេត្រីភាព និងដោះស្រាយកិច្ចការងារមួយចំនួន ។
ភាគីកម្ពុជា ប្រតិភូខេត្តបន្ទាយមានជ័យដឹកនាំដោយ ឯកឧត្តម អ៊ុំ រាត្រី អភិបាលខេត្ត និងខេត្តបាត់ដំបងដឹកនាំដោយលោក ធូ ភា អភិបាលរងខេត្តប ។ ចំណែកភាគីថៃដឹកនាំដោយ ឯកឧត្តមបរិនបញ្ញា ភោធិសាធ អភិបាលខេត្តស្រះកែវ ព្រមទាំងមានការចូលរួមពីមន្ត្រីពាក់ព័ន្ធ និងកងកម្លាំប្រដាប់អាវុធជាច្រើនរូបទៀត ។
ក្នុងកិច្ចប្រជុំនេះ ភាគីទាំង២បានពិភាក្សា ដើម្បីសម្របសម្រួលបន្ថែមនូវកិច្ចដំណើរការច្រកជាប់ព្រំដែននៃខេត្តបន្ទាយមានជ័យរួមមាន ច្រកទ្វារអន្តរជាតិប៉ោយប៉ែត គឺពិភាក្សាការប្រើប្រាស់ប័ណ្ណព្រំដែន អនុញ្ញាតឲ្យចេញចូលហើយកន្លងមកនេះ តែសូមឲ្យប្រើប្រាស់យានយន្តអាចចេញចូលបន្ថែមទៀត ។ ពិភាក្សាការបើកបណ្តោះអាសន្នច្រកស្ទឹងបត់ និងពិភាក្សាការបើកច្រក៤៣ ។ រីឯខេត្តបាត់ដំបង សម្របសម្រួលបន្ថែមដំណើរការច្រកទ្វារអន្តរជាតិគីឡូលេខ១៣ ស្រុកសំពៅលូន ឈមនឹងច្រកខៅឌិន ស្រុកខ្លងហាត ខេត្តស្រះកែវ ។
ក្នុងកិច្ចពិភាក្សាទាំងប៉ុន្មានចំណុចដែលភាគីខាងកម្ពុជាបានលើកឡើងនេះ នៅមិនទាន់មាន
ការសម្រេចជាផ្លូវការនោះទេ ប៉ុន្តែភាគីទាំង៣ខេត្ត គឺបន្ទាយមានជ័យ បាត់ដំបង និងខេត្តស្រះកែវ បានរៀបចំបង្កើតឲ្យមានគណៈកម្មការរួមមួយ ដឹកនាំដោយអភិបាលរងខេត្តមួយរូប ដើម្បីពិនិត្យសិក្សាលម្អិតបន្ថែម ។ ចំណែកភាគីខេត្តបន្ទាយមានជ័យ និងខេត្តស្រះកែវ នឹងមានបើកកិច្ចប្រជុំមួយទៀត នៅសាលាខេត្ត បន្ទាយមានជ័យ នៅក្នុងសប្តាហ៍ទី៣នៃខែកក្កដាខាងមុខនេះ ដើម្បីពិនិត្យសម្រេចជាលទ្ធផល ។
ក្នុងកិច្ចប្រជុំពិភាក្សានេះដែរ ភាគីថៃបានទទួលយកសំណើកិច្ចពិភាក្សានេះ ដើម្បីស្នើសុំបន្តទៅថ្នាក់ដឹកនាំរដ្ឋាភិបាលថៃីសម្រេចនៅពេលក្រោយ ហើយកម្ពុជានឹងស្នើសុំគោលការណ៍ឯកភាពពីប្រមុខរាជរដ្ឋាភិបាលផងដែរ ៕
ចែករំលែកព័តមាននេះ