រាជធានីភ្នំពេញ ៖ ដូចតាមការសន្យារបស់លោកហម បូរ៉ា បុរសមហាសំណាង រួមទាំងតំណាងក្រុមហ៊ុនឆ្នោតនាគសំណាង បានចុះទៅកាន់មន្ទីរពេទ្យ «គន្ធបុប្ផា» នាព្រឹកថ្ងៃទី៣០ វិច្ឆិកា នេះ ដើម្បីបរិច្ចាគប្រាក់ចំនួន៥ពាន់ដុល្លារ (ក្នុងប្រាក់ឈ្នះរង្វាន់៥០ម៉ឺនដុល្លារ) ជូនដល់មន្ទីរពេទ្យខណៈកំពុងត្រូវការជំនួយជារៀងរាល់ថ្ងៃ ក្នុងនោះក៏មានការអញ្ជើញចូលរួមពីលោកវេជ្ជបណ្ឌិត Denis Laurent តំណាងមន្ទីរពេទ្យ «គន្ធបុប្ផា» ផងដែរ ។
លោកហម បូរ៉ា មានលំនៅក្នុងភូមិផ្សារត្រពាំងក្រឡឹង ឃុំគីរីវន្ត ស្រុកភ្នំស្រួច ខេត្តកំពង់ស្ពឺ បានប្រាប់ថា រូបលោកជាអតិថិជនរបស់ឆ្នោតសំណាងនេះ ហើយលោកមានអារម្មណ៍រំភើបណាស់ និងស្ទើរតែមិនជឿទៀតផងថា បានឈ្នះប្រាក់ចំនួន៥០ម៉ឺនដុល្លារ ពីក្រុមហ៊ុនឆ្នោតនាគនាំសំណាង ។
ក្រោយពីរូបលោកបានឈ្នះរង្វាន់ ថ្ងៃនេះលោកបានមកដល់មន្ទីរពេទ្យគន្ធបុប្ផាដោយតាមការសន្យា លោកធ្វើការបរិច្ចាគដល់មន្ទីរពេទ្យនេះចំនួនទឹកប្រាក់៥ពាន់ដុល្លារ ដើម្បីជួយសម្រាលទុក្ខលំបាកនៃការខ្វះខាតដែលត្រូវប្រាក់ជារៀងរាល់ថ្ងៃព្យាបាលក្មេងៗ។
លោកហម បូរ៉ា បានបន្តថា ដោយសារតែលោកបានមើលឃើញពីទុក្ខលំបាករបស់មន្ទីរពេទ្យ «គន្ធបុប្ផា» ក្នុងការស្វែងរកថវិកា ដើម្បីព្យាបាលកុមារក្រីក្ររាប់ពាន់នាក់ក្នុង១ថ្ងៃ ទើបលោកមានចិត្តអាណិតអាសូរ និងបានបរិច្ចាគថវិកាខ្លះៗ ដើម្បីជួយដល់មន្ទីរពេទ្យដ៏ធំនេះ។ លោកក៏សូមអំពាវនាវ ដល់សប្បុរសជនទាំងក្នុង និងក្រៅប្រទេស ដែលមានទឹកចិត្តសប្បុរធម៌ ចែករំលែកធនធាន ដើម្បីជួយដល់កុមារក្រីក្រ ជួយដល់មន្ទីរពេទ្យ «គន្ធបុប្ផា» ដែលកំពុងខ្វះខាត ក្នុងន័យឲ្យមន្ទីរពេទ្យនេះ បន្តជួយដល់កុមារកម្ពុជាបន្ថែមទៀតផង ។
ក្រៅពីជួយដល់មន្ទីរពេទ្យ «គន្ធបុប្ផា» លោកបានផ្ដល់ថវិកាជូនដល់វត្តចំនួន២ នៅឯស្រុកកំណើតរបស់លោក ដោយក្នុងមួយវត្តទទួលបានថវិកា២ពាន់ដុល្លារ និងផ្ដល់ថវិកាមួយផ្នែកទៀត ជូនទៅសាលារៀនមួយចំនួន២ពាន់ដុល្លារទៀត ហើយលោកនឹងមានគម្រោងពង្រីកអាជីវកម្មរបស់គាត់ឱ្យកាន់តែធំទៀត ។
ចែករំលែកព័តមាននេះ